《 親親我好媽 》 江美儀演活怪獸家長

報讀兩間幼稚園

為讓子女能考進心儀小學，家長們可謂無所不用其極，劇中的江美儀日常生活中亦不忘訓練女兒Venus，如飲水時唔可以話飲的是「水」，而要講「H2O」…… 另外又幫個女報讀兩間幼稚園，上午一間下午一間，佢認為每間幼稚園都有唔同優點，教育方式亦有唔同，希望女兒可以通通都學晒。結果江美儀自己都搞亂了，幫Venus着錯校服，要即刻喺車上更換！

為地址租劏房

香港名校唔少，不過自己唔一定住喺名校網內，若希望跨區報讀名校，就唯有「借地址」！現實中有人會借親戚或朋友的地址幫子女報讀學校，而劇中江美儀就選擇直接租單位，雖然個單位有40年樓齡，內裏甩皮甩骨，不過由於地址喺名校網內，所以照租可也！而且江美儀老實地道出事實：「我們只是用這個地址來報讀學校！」都唔係自己住，理得佢劏房定豪宅？

Portfolio很重要

小學面試競爭激烈，小朋友要成功突圍，唔少人認為一份優越的個人資料夾（Portfolio）能增添不少分數。劇中黃智賢每月的收入全都要上繳江美儀，自己就得老婆分配的少少零用錢，全因大部分收入都花喺女兒身上，報讀各式各樣的興趣班及補習班，就算通宵排隊報名都在所不惜，就是為讓女兒多幾張證書，Portfolio靚啲。

家中一字馬特訓

米雪在劇中飾演江美儀的母親，是一著名芭蕾舞學校校長、一位貴氣逼人的女士。佢唔鍾意孫女叫自己「婆婆」，而要叫「Grandma」；又唔俾孫女抱緊自己，怕自己件靚衫會整皺，寸到呢！米雪就認為Venus天資不足，拒收佢為學生，不過江美儀就不服氣，喺屋企幫Venus進行特訓，於是又係苦了女兒……

教堂做義工爭「宗教分」

另外江美儀久唔久會跑去教堂做義工，又喺神父面前扮晒虔誠，就係希望盡早成為教徒，增加報考教會學校的機會率，爭取俗稱的「宗教分」！但信仰唔係得把口講就得，而且領洗程序亦非一時三刻可以完成，江美儀竟然求神父破例安排佢喺女兒小學面試前授洗，神父睬佢都傻！

生B不忘求校長

劇集末段，終於到了Venus小學面試的大日子，Venus本來表現不俗，但忽然想起之前目睹一位小朋友因不適而被媽媽責備，故大哭起來。兩夫婦安撫無效，校長唯有請他們離開，面試以失敗告終。江美儀心有不甘，事後苦苦哀求校長再俾多次機會。

眾人爭論期間，江美儀突然肚子作動要生BB，但佢仍不放過一絲希望，一直捉緊校長麥玲玲隻手，送院期間一邊痛一邊繼續要求對方俾機會，真係令人深深感受母愛的偉大…… 最後校長在醫院飯堂同Venus再作一次簡單會談，而江美儀亦母女平安，開心晒！