裕美節目後感觸決網上尋父　熱心網民幫助下即有消息

裕美網上尋父望能一家團聚

現年32歲的中日混血兒裕美，原名為和田裕美，在香港土生土長，跟父親和田具久失聯了20年，近日在IG上傳「尋父啟示」。

不少網民看到後也幫裕美搜尋任何線索，相隔一日後竟有最新消息。有網民發現，有一個與裕美父親同名的Twitter帳號，加上頭像更是裕美小時候的照片。

她馬上開個新帳戶並追蹤對方，再出帖子上載與父親舊照，盼望對方回覆：「如果他是真的，我希望他會回覆，等待中……」雖然，裕美暫時未收到任何回覆，不過，她上載了多張童年照懷緬一下。

裕美曾患抑鬱症自殘

裕美中學成績未如理想，會考零分，但自小對演藝有興趣的她，決意要向演藝道路上闖一番。2002年，參加全港普通話歌唱大賽後入行，其後，更簽約陳百祥旗下做歌手，初時入行受公司力捧，但可惜星途多年來也一般。當年更曾因工作壓力而不幸患上抑鬱症，因病情令情緒受到影響，不時胡亂服藥外，亦試過割手腕及撞牆等自殘行為，後來經過治療後已治好了。

裕美自爆用錢解決婆媳關係：每月畀5、6位數字家用！

裕美向來敢言，這次接受黃婉曼的直播訪問，她一開始就話自己冇底線，有問必答，更把與林作及林媽媽的真實相處情況公開。她表示，早已習慣林媽媽無視她，亦堅決不會主動討好對方。由與林作拍拖開始，林媽媽無時無刻都想棒打鴛鴦，她嫌棄裕美出身，除指她離過婚，學歷又低，但卻未有淋熄林作對裕美的愛火，反而令裕美更博命賺錢來證明自己。

裕美用錢感化林媽媽

裕美在直播中說：「林作當初同我講，只要你搵得夠多錢，我阿媽就會當你金咁拜，初時我都唔信，依家我搵到錢，林作話佢阿媽對我ok啲！」她認為女性獨立有好處，有經濟能力，講句嘢都可以大聲啲！

裕美：我依家搵錢撻林作㖭！

裕美話林媽媽唔係太睇重個女仔賢唔賢淑，她是要講條件，要夠威：「我做乜要迎合佢呢？我做生意唔係為咗佢，從來冇男人養過我，以前試過男友冇錢又想出去飲酒，問我攞錢，我點都唔會靠對方。以前我好渴望有婚姻，有完美家庭，我失敗過，依家大個咗有錢，你甩我就甩我囉，我亦唔需要你。我依家搵錢撻林作㖭！每個月畀5位至6位數字家用佢，佢只會回番一萬畀我，我依家可以大聲踐踏佢、鬧佢。」

林鍾大戰獎金已使約20萬

林作又主動提出林媽媽和裕美來場「大戰」，若真係要打，就搵金主鍾培生贊助，但這個提議不被裕美睇好。此外，提到早前「林鍾大戰」過後，林作收到鍾培生94萬多元獎金，他表示，主要花在維修兩部車和家中的浴室、冷氣上，共計使了約20萬，又分了88,800元給拳賽教練，攞個好意頭。

裕美擔心被指無風度

而裕美則表示，在節目播出後已事隔兩個月，但兩人關係不但無緩和，反而變得更差，不過，她擔心和一個媽媽級打擂台，會讓人覺得她「蝦」對方。裕美表示，若上台她一定會贏，事關她平時打林作都好大力，但她不想讓人覺得她無風度，因為對方始終是長輩。裕美又指，鍾培生不可能贊助兩人上擂台，因為他之前贊助也只是想自己成名，而贊助她和林媽對戰，於鍾培生沒有任何好處。

裕美數臭林作3大不是！

裕美表示，以往每段交往都不會超過一年半，但與林作可以拍拖近3年好難得，又話林作性格與人品都好好，不過，她依然唔滿足。在直播中，竟全方位數臭林作，就連私生活都拎出來分享。當中，林作一個陋習裕美話接受唔到，仲話唔想同佢有下一代，黃婉曼聽完都覺得太過尖酸刻薄。

裕美最不能接受林作成日露械

原來過去裕美無論拍拖或結婚，每段關係都不會超過一年半，不過，她與林作拍拖快3年，她表示，二人各方面都很夾，她亦很支持林作經常做出很爆的事情，不過，林作經常露雀是她最不能接受的事。她說：「佢成日露械，喺屋企唔著褲，我個女性好友喺度都照咁做，仲話自己啲毛係啡色，拎個黑色銀包出嚟對比，追住我朋友，佢仲剪咗一執毛擺喺我朋友隻手度，好癲！」裕美指，唔止朋友，林作竟連未來岳母都唔放過，試過在她面前一絲不掛浸浴。

裕美大數林作孤寒

雖然，裕美話林作性格好，為人又專一，但對於錢銀方面就好「度縮」，裕美用他廿幾三十蚊都會計住，所以裕美平時唔會用佢一分一毫。然而，林作的口不擇言，有時連裕美都頂佢唔順。原來，當年第一次見裕美媽媽，林作已經原形畢露，裕美說：「佢第一次見我媽咪已經講性器官嗰啲咸濕嘢，仲笑我阿媽，我諗普通女仔一定接受唔到佢，佢都係想搵個支持佢做呢啲爆嘢嘅人！」

裕美坦言：唔想同林作生B！

至於結婚憧憬，裕美矛盾地表示，自己本來想生小朋友，但唔係想同林作生，因為怕仔女個樣似佢。裕美在訪問中更多次揶揄林作其貌不揚，難與她那位好似碧咸咁靚仔的老外前度相比，雖然林作家境富裕乜都有，但裕美就大爆他最想得到的是跟裕美「造愛」：「真係迫唔到，望住林作個樣真係唔想要……」在旁的黃婉曼聽到裕美多次踩林作，都忍唔住話裕美尖酸刻薄。