蔡思貝成視后大熱！網友：「賓妹變天鵝 」細數出道七年十個緋聞男友

原文刊於：東方新地｜圖片來源：東方新地

蔡思貝出道七年進化之路

初出道時短頭髮瘦蜢蜢，到今個月無綫台慶劇都由佢主演漸顯大將之風，昔日的黑黑實實男仔頭到今日的視后大熱，一起看看蔡思貝的進化之路！

喺TVB機會多多劇接劇，都不難發現蔡思貝確係可造之材可塑性極高，依家一樣係留短髮，不過皮膚已變白皙，望落成個人亦充滿光彩

2014年拍劇、2015年已經擔正劇集《衝線》，並獲提名台慶頒獎禮最佳女主角。之後幾乎年年有提名，蔡思貝終於2017年憑 《踩過界》 嘅趙正妹一角，獲得最受歡迎電視女角色大獎。

入行七年話題多多，除咗係新一輩小花中最多緋聞嗰個，蔡思貝更被指與game界網紅達哥撞樣，不過當事人就話自己生得似木村拓哉多過似達哥。

七年十個緋聞男友

被封為 「緋聞女王」 ，並非浪得虛名，入行七年來同蔡思貝傳過緋聞嘅男星 名單水蛇春咁長，佢嘅情史真係冠絕電視城。

1.胡鴻鈞

從去年開始已經被發現交往極頻繁，十日之內約會三次，今年感情有增無減，一架車兩份揸無分彼此，不過兩人對緋聞暫時未有正面回應。

2.余德丞

蔡思貝跟余德丞因為拍攝旅遊節目而成為好友，年紀相近外形亦相襯，交情非淺早已傳緋聞多時，當日余德丞出事入院都係蔡思貝第一時間到達探望。

3.王浩信

合作第一輯 《踩過界》時，緋聞滿天飛，幕後更盛傳二人於劇組聚餐時，曾單獨反鎖喺VIP房內消失十幾分鐘，其後王浩信亦被拍到開車往女方香閨，更有指蔡思貝曾經為王浩信自殘。

4.洪永城

16年初，洪永城仲同唐詩詠拍緊拖時，蔡思貝被影到單獨相約洪永城陪跑即時傳出緋聞，正印唐詩詠當時表示唔介意。

5.張振朗

但凡與蔡思貝合作過的男演員似乎都無一倖免，拍攝《踩過界》除咗埋王浩信身，亦有指向另一男角張振朗狂放電，唔理男方有正印陳芷尤，一樣挨身挨勢又撒嬌。

6.周志文

16年間被拍到與周志文單獨約會睇戲，一齊去台灣拍劇取景時，又有指蔡思貝主動摸上男方酒店房過夜，周志文承認此事，不過就表示二人係朋友關係。

7.麥秋成

14年入行一年即同排舞師麥秋成熱戀，一年不到有指因為蔡思貝身邊有要好男友令男方提出分手，麥秋成其後更用英文出 po，意有所指稱「不要再讓人浪費自己時間」。

8.鄭俊弘

都係14年，蔡思貝身邊有麥秋成，鄭俊弘就同姜麗文拍緊拖，蔡思貝同鄭俊弘因為過從甚密，又情侶檔拍廣告被指有非一般感情。不過月初鄭俊弘同何雁詩大婚，蔡思貝都有份做伴娘。

9.羅仲謙

15年同羅仲謙合拍《衝線》，有傳無懼男方個當家花旦正印楊怡，主動約食飯又當眾為男方扣皮帶，有指嬲到楊怡要親自去片場監場。

10.沈震軒

都係拍《衝線》期間，有指蔡思貝分身有術，繼羅仲謙、周志文後，再向沈震軒埋手，等埋位期間經常埋身主動示好。