鬧爆網民: 好少見咁低b留言! 前港姐冠軍為囝囝與網民公開對罵被指無品

2005年港姐冠軍葉翠翠入院開刀誕下第二胎「小小王子」,一眨眼,細仔已經出世4個星期啦!不過,最近翠翠一直在其個人社交網同網民公開發生罵戰,有網民就覺得翠翠同網民對罵,涉網絡欺凌同人身攻擊!究竟發生咩事?

原文刊於:東方新地、新monday|圖片:Facebook、Instagram |編輯:150cm女孩@Central

港姐葉翠翠細仔滿月

時間過得快,一眨眼葉翠翠細仔「小小王子」已經出世4個星期啦!葉翠翠就趁囝囝滿月,上載一張小小王子嘅近照上個人社交網,唔少網友都大讚小小王子好可愛,亦有網友指B仔對眼好似媽咪,連葉翠翠睇到個留言都表示認同。

葉翠翠與網友公開駁火

不過,最近葉翠翠就於個人社文網與網友公開駁火,互相隔空對罵。事緣係葉翠翠於上星期二發文,指自己好唔開心,因為佢親眼見到工人搣大仔「小王子」個鼻,事件令佢感到非常不滿,並問工人為何要咁樣做,最後翠翠仲話因為太唔開心而又暈又嘔。

其後,有網友留言撐翠翠,但同時亦有網民批評翠翠,認為佢過分緊張,其實只係小事一樁,仲叫翠翠放鬆啲。

葉翠翠鬧爆: 好少見咁低b留言

其後,葉翠翠再次發文,表示有網民留言不滿翠翠叫自己個仔做小王子,結果又再一次令翠翠呢位媽咪感到非常不滿,指自己點叫個仔唔關其他人事,又指對方嘅留言低b。

原來翠翠其實都忍咗某部分網友一排,皆因有網民一直批評翠翠「香港小姐冠軍咁無品」、「做藝人做到咁小家」等,翠翠當然不甘示弱,還擊回應「依家網絡都有好多病患者」。

不過,翠翠一直都有留意留言批評佢嘅網民,指原來有鍵盤戰士活躍於社交平台及專門攻擊人,並為囝囝受網絡語言攻擊而護航,直斥對方心理變態!

葉翠翠涉網絡欺凌?

對於有人認為佢直斥網民涉網絡欺凌,翠翠接受傳媒訪問時,表示好多人為咗攻擊而攻擊,反問對方話佢就得,但佢話對方就唔得?而且,翠翠覺得攻擊佢嘅網民係低B,所以先直接話對方低B,若然覺得對方有病,就會話佢有病,咁做都係直接表達自己感受。

另外,翠翠續指藝人其實都係人,認為藝人唔係一定要硬食一啲無理嘅攻擊,同時又話:「最搞笑係有人話我,點解叫個仔做小王子,我真係覺得好好笑,係咪我畀人欺凌呢?」

歌手吳若希曾為女兒同網友開火

自2017年4月23日誕下女兒Giselle後,Jinny因為有朋友把女兒的正面照post上社交網,Jinny隨即在FB鬧該友人「屎忽生上腦」及「我冇呢啲onX朋友」!之後再有網民發表言論,批評Giselle的樣貌及Jinny未婚生女等,更罵其女兒是「冇老竇」、「有個咁爛口嘅老母」等,字眼極度侮辱。Jinny一下子如火山爆發揚言:「我真係會同你死過!」

 

口不擇言

眾多反吳若希網民一窩蜂狂插,Jinny以一敵眾全力開火,對於其中一個指控,佢嬲爆回覆:「我發誓!如果我有,我個女即刻死」以及「你老母生你出嚟好悲哀」。雖然網民來意不善,但Jinny以阿女條命來還擊,絕對係過火,而且連人家媽媽都出動埋,有唔少持平的網民亦加把口勸佢要收斂,唔好再作口孽。

你可能也喜歡