港姐冠軍翁嘉穗fb賣廣告吸客惹負評！ 被挖陳年冠亞軍爭男人精采史

原文刊於：東方新地｜圖片來源：東方新地、翁嘉穗fb及IG圖片、鄭紹康IG圖片

港姐冠軍翁嘉穗闊太生活

翁嘉穗攞完港姐冠軍已經趕住嫁人，喺娛樂圈真係冇乜發展過，闊太生活無憂得閒出席吓上流社會ball，又幫老公鄔友正名下嘅海馬牌做吓宣傳，keep住曝光率，15年突然再生多個細仔，翁嘉穗產後更加活躍同高調，不時喺社交網公開私生活照片，最近佢仲喺fb落廣告狂谷自己個網頁，唔通想學人做KOL吸粉？

翁嘉穗太高調被挖臭史

港姐冠軍翁嘉穗突然咁高調一定有啲原因，佢又唔係sell嘢，好大可能係想刷存在感。不過好衰唔衰就引起一班中年網民嘅注意(當年係97，事隔23年，後生仔唔會知佢係乜水)，重提當年佢參選港姐時嘅黑歷史，咪就係佢喺亞軍李明慧手上撬走鄔友正囉！

趁情敵公幹奪愛

97年嘅港姐翁嘉穗係冠軍，李明慧係亞軍，佘詩曼只係季軍，當年李明慧同翁嘉穗關係非常之差，唔係因為大家係競爭對手，係因為大家係情敵。話說翁嘉穗現任老公鄔友正當年係李明慧嘅男友，因為鄔友正旗下公司當年係港姐選舉嘅贊助商，鄔友正因利成便同李明慧打得火熱，相戀十日就宣布會喺同年閃婚，李明慧當時以為可以嫁入豪門，就向無綫提出解約。期間李明慧去美國公幹，就係呢個時候傳出翁嘉穗同鄔友偷偷約會，翁嘉穗仲對外公開自己先係鄔友正嘅正印女友，不過重點係鄔友正亦好維護翁嘉穗，仲向李明慧悔婚，最後李明慧成為最大輸家，解約無綫冇得撈，有傳獲鄔友正補償120萬，不過最大損失係冇得嫁入豪門。

失鄔焉知非福

呢段咁精彩嘅港姐冠軍同亞軍爭佬歷史真係好經典，李明慧當時雖然雙失(失業又失戀)，但佢好快就重整旗鼓，再接再厲，她先轉行做稅務會計師，呢個唔係重點，重點係佢後來因為工作關係喺美國認識咗教育家、慈善家陳樹渠嘅細仔，即係現任丈夫陳燿陽，仲喺03年正式結婚，婚後生咗一對龍鳳胎，比起情敵翁嘉穗差，老公家底有過之而無不及。李明慧嫁畀陳燿陽後就專心過住少奶奶生活，早年一家人移居美國生活，近年先回流返香港。李明慧有今日嘅幸福人生，真係要多謝當年翁嘉穗橫刀奪愛咯！