10對圈中明星好兄弟盤點：周柏豪ICQ主動結識袁偉豪、謝霆鋒為陳奕迅赴湯蹈火！
娛樂圈有不少出名的姊妹淘，如：胡說八道、七魔女、少婦聯盟等，鏡頭後不時都會相約見面，感情甚好。我們經常都看到女星放閨蜜照上IG晒友愛，但大家可能好少留意到圈中男生的兄弟情！以下是圈中十對明星好兄弟，相比下他們走低調路線，少點留意男星私下生活都難察覺到啊！
原文刊登於：東方新地｜圖片來源：東方新地、Instagram
10對圈中明星好兄弟盤點
明星好兄弟 1.劉青雲 黎耀祥
本來係無綫電視營業部文員，1985年祥仔黎耀祥就係睇咗劉青雲做主角嘅招生廣告，因而動心決定報讀無綫演藝訓練課程。86年首次做電視劇《銀色旅途 》閒角咁啱遇上劉青雲做男主角，自此二人展開長達三十四年嘅友誼，年年都約埋拜年仲會兩家人一齊飯敍過生日。
明星好兄弟 2.鄭伊健 黎諾懿
05年拍攝電視劇 《隨時候命》成為羽 毛球波友，黎諾懿自爆於05至07年間自己最窮困，要住劏房、捱麵包，全靠伊健叫佢去屋企揀衫著見人，又會介紹佢畀相熟導演拍戲，至能夠解困。不過黎諾懿最終都成功報恩，因為佢介紹咗個好老婆蒙嘉慧畀鄭伊健，算唔話得！
明星好兄弟 3.周柏豪 袁偉豪
唔係走紅後入 TVB 至結識，周柏豪同袁偉豪原來早於入行前做 model 時已經係舊相識，柏豪自爆當年用 ICQ 主動結識袁偉豪，之後加入娛樂圈仲有問過袁偉豪經驗，家陣新婚嘅袁偉豪仲搬埋入同一屋苑，同柏豪一齊做鄰居。
明星好兄弟 4.林峯 吳卓羲
林峯99年入讀藝員訓練班，同遲佢一屆嘅吳卓羲喺電視劇《 大唐雙龍傳 》中碰頭，並一齊走紅、一齊被無綫力捧、一齊長大再一齊離巢外闖。兩人friend 到互相有屋企鎖匙，林峯仲會親自改裝私家版風扇做禮物，買底褲又會買埋兄弟嗰條，仲話一日一個電話好黐纏。
明星好兄弟 5.陳奕迅 謝霆鋒
同期出道，又曾經同屬一間唱片公司，陳奕迅、謝霆鋒識於微時，共同經歷過風風雨雨。當紅時已經會結伴傾偈賞月傾天光，謝霆鋒更話過，陳奕迅係唯一一個唔可以幫佢生仔，但會為佢赴湯蹈火嘅人。
明星好兄弟 6.梁朝偉 杜德偉
85年參加新秀歌唱大賽入行，杜德偉即與同期剛剛喺電視圈起步嘅梁朝偉結為好友，仲有呂方、鍾鎮濤等大班老死一齊玩大蒲大，個個如今年過五十都定期聚會，彼此開騷、出碟、電影上畫必定到場支持。杜德偉12年娶老婆，梁朝偉都畀面做兄弟團㗎！
明星好兄弟 7.古天樂 鄧一君
97年加入電視台冇耐嘅鄧一君，因為拍攝《 美味天王 》同古天樂成為好友，其後更五度合作友情愈嚟愈深厚。鄧一君05年離開娛樂圈，轉行擔任理財顧問，多得老友古仔幫襯，之後開士多賣車仔麵，都有古仔花到人又到。今年開拍電影版《 尋秦記 》古天樂只係開句聲，鄧一君就即刻出山順手過戲癮。
明星好兄弟 8.苗僑偉 黃日華
三哥苗僑偉早前接受崔建邦、張秀文主持嘅節目《諸朋好友》 訪問，被問到會帶邊個朋友上嚟，三哥只講咗兩個字 「黃華」 。三哥同華哥同屬第九屆藝員訓練班，畢 業後同被力捧、同步走紅，一樣喺電視台搵到愛妻，一樣都係老婆奴女奴，四十年來一齊走過高山低谷，華哥仲剖白最近經歷喪妻之痛都係全靠三哥陪伴度過。
明星好兄弟 9.張繼聰 張振朗
33歲張振朗明明同40歲張繼聰，無論背景、年齡都有段距離，不過就因為玩復古電單車啱嘴形而相逢恨晚，除咗會約埋一齊玩，仲一齊揸古董電單車遊車河，張振朗女友楊偲泳離巢過檔古天樂旗下，有傳都係張振朗託張繼聰幫手搭路。
明星好兄弟 10.蕭正楠 黃祥興
蕭正楠同黃翠如18年4月秘密結婚，不過同年3月已經被黃祥興一個唔小心，喺節目《 1＋1的深情 》爆響口，天大秘密得黃祥興知情，點會唔係老死？原來蕭正楠08年加入 TVB 已經認識黃祥興，基本上一齊長大。
有什麼Netflix、Disney+推薦及必睇劇集？
為大家整理一下截至目前為止小編追過的Netflix影集清單，必睇Netflix電影或劇集片單；Disney+方面，則可以一看電影片單推介。
