千金難買…何家千金「超」女成長史

Text ｜Candy Choy

賭王何鴻燊最令八卦友睇得津津樂道要數其四位老婆同十六個仔女嘅八卦新聞，尤其係佢正值花樣年華嘅千金，三房長女超雲、二女超蓮同四房長女超盈嘅外貌、感情事成日都俾人拎黎做話題。雖然「千金難買好感情」，三位現時都係單身，不過三位依家仲係廿幾歲女，又愈大愈靚，讀書又叻，超盈仲要成為咗女強人，啲girl power 出晒嚟，唔靠賭王老豆，靠自己執好內外在美，愈大愈charm駛乜驚冇人要啫？

何超蓮

賭王至索千金

1991年出世嘅超蓮，今年先廿四歲，但四年前已經以一級榮譽成績畢業於英國倫敦大學皇家賀洛唯學院經濟學學士，仲計劃考會計師牌，認真叻女！超蓮仲要係俾外界譽為「最索千金」，精緻嘅五官，仲有均勻嘅身材，女人見到都忍唔住讚佢索啦，何況男人？

超蓮都唔係話由細都大都咁索嘅，細個未識著衫就有啲娘娘地，加上塊面仲有baby fat，勝在個樣鬼鬼地都幾cute。

鐘情暗花女人味look

愈大愈索嘅超蓮，近年對打扮更有研究，出席各大場合都會悉心打扮，早排超蓮參加由家姐超瓊做聯席主席嘅amfAR 慈善晚會就似超deep V 繡花晚裝，性感湯碗胸殺死人！超蓮出席唔同場合多數都以女人味嘅暗花貼身連身裙示人，身材玲瓏浮凸！

超蓮最令人關注的相信係佢之前同吳克群嘅感情，兩人當時由地下情發展到公開，可惜男方又大男人，又疑似偷食，超蓮唯有為四年嘅感情斬纜。不過分手後嘅超蓮又被傳先後有霍啟山同內地富二代劉根森追，又有宇宙G.E.M.同李蘊做好姊妹，有人喺身邊支持，超蓮自然唔會唔開心，keep住靚啦。

何超雲

努力翻新

只係大超蓮兩年幾嘅三房長女超雲，身形比超蓮高大啲，仲要係大女，所以感覺上都係比較tough。超雲之前同陳山聰兩年嘅戀情亦都高調，成日孖公仔現身，雖然最後喺2013年分咗手，仲搞到要去英國讀書療傷，不過超雲都好努力讀完，仲勤做運動，又留返長把頭髮，回復美貌即刻女人味返晒嚟！

經過一返努力，超雲嘅下巴尖返晒。

鑽研時裝

喺英國Saint Martins 藝術及設計學院出身，超雲勁愛時裝，早年仲開咗一間專賣英國、韓國時裝和二手名牌嘅時裝店Chew Closet，依家都仲努力經營緊㗎！

超雲嘅style比較時尚中性，唔似妹妹咁女人味，不過長髮比之前半剷青短髮好得多。

最近有傳佢想同山聰復合，仲話會改佢嘅專制性格，不過阿山聰已經移情別戀咗，相信都唔會復合返㗎喇。同埋果時其實佢地兩位嘅衣著真係幾浮誇，超雲當年唔知係咪愛情滋潤搞到肥肥腫腫咁，呢啲不堪回首嘅過去，都係忘記佢吧啦。

何超盈

改名改命運

四房長女何超盈和超雲一樣都係1989年出生，早年以喜愛夜蒲而出名，仲曾經俾傳媒影到佢疑似吸毒，搞到神志不清喺銅鑼灣時代廣場跌跌撞撞，四年前又傳同林建岳三女林愛兒玩攣情，以為她會繼續反叛，點知佢發奮圖強，三年前改名為何朗禎，更從此改埋命運，現時超盈不僅係深圳政協年紀最細嘅政協委員，仲開始接手父母事業，任三間公司嘅業務總監同項目總監！脫胎換骨嘅超盈，增添咗唔少女人魅力！

2013年一個人喺時代廣場左搖右晃，頭髮亂了，仲有白色粉末喺鼻上，認真嚇人。

與林愛兒嘅戀情當年疑幻似真。

冇再爛玩嘅超盈，個樣乖晒又靚咗，睇爸爸幾開心！

曾喺HKU修讀藝術嘅超盈，早前去咗瑞士讀MBA裝備自己，更考獲特許金融策劃師執照同地產營業員牌照，又曾在保利澳門拍賣有限公司做實習鑑證珠寶，現時更成為董事兼首席執行官，廿六、七歲已經咁叻女，抵讚！

做咗CEO後，超盈嘅衣著打扮成熟咗好多，而且高貴咗。

最近，超盈仲去咗美國波士頓哈佛大學做論壇演講，佢以藝術界界別去分享佢間文化公司搞拍賣會有成兩億成交額嘅經驗，仲引嚟唔少中國留學生搵佢簽名！

何家姊妹圖

超雲、超蓮同超盈，大家都係八十後尾、九十後的年青人，年紀又差唔多，所以容易玩埋一堆，無論係超雲同超蓮，或者超蓮同超盈，都成日癡埋一齊玩，姊妹情深。