一舞傾城︱李嘉靚靚老婆「翻版沈月」遇車禍慘被撞斷胸骨　涉事司機不顧而去

李嘉爆老婆遇車禍慘被撞斷胸骨

李嘉2021年跟太太在內地領證結婚，不時在社交網跟太太晒恩愛！不過原來在去年10月，他太太在內地揸車俾人撞，撞到成架車車頭爛晒，李太斷了胸骨，但當時李嘉身在香港，當時隔離措施仍在實行，他未能即時返去，李嘉太太當時在意外現場喊住致電老公，當時李嘉就算返去都要隔離14日，那一刻令他好無奈，更覺得好對太太唔住。李嘉更嬲爆表示，涉事司機後來失了蹤，至今仍未被捕，他指現正打官司，太太都調理緊，他謂盡量一不用開工便會抽多點時間照顧太太。

李嘉憶述太太車禍一刻：攤在車上無法呼吸

李嘉坦言太太當時情況危急，在意外現場俾人撞完，攤在車上無法呼吸，他表示那種感覺好無助，好彩側邊有輔警出現送她去醫院。這件事令李嘉好有陰影，現在一收到太太電話會不自覺緊張起來，他指聽到那刻直頭個腦如爆咗粒原子彈，好無助，盡可能諗辦法聯絡朋友，幫他照顧太太，李嘉慶幸太太仍能打電話給他。現在若朝早收到太太來電，他更笑言已留有陰影怕太太又出事。

李嘉6歲開始習武　獲封「功夫狂人」

李嘉自6歲開始習武，在1999年加入TVB動作特技演員訓練班，畢業後擔任龍虎武師，曾接拍劇集《城寨英雄》、《大帥哥》、《飛虎》、《包青天再起風雲》、《失億廿四小時》等，獲網民封為「功夫狂人」。自加入TVB24年，李嘉一直都是飾演一些不起眼的閒角，如侍應、黑社會大佬、賓客、大隻男等角色。直到2010年，李嘉終於在劇集《巾幗梟雄之義海豪情》飾演日本人「黑木少佐」，首次獲得屬於自己的角色名。劇中他飾演日本軍人，有日文對白，當時被不少網民大讚口音標準，可惜角色太早死，未有太大發揮。

TVB人工低兼職做保鑣！李嘉為崔始源護駕10分鐘袋$x,xxx

李嘉自細開始習武，佢喺台慶劇《大帥哥》飾演張衛健好兄弟「冬來」一角成功入屋，之不過眾所周知大台人工低藝人收入有限，為咗生活好多時都要兼職或自己開舖增加收入。李嘉都唔例外，佢除咗開店、拳館，原來仲兼職做埋保鑣，年前被發現喺機場為韓星崔始源護駕開路，不過李嘉直言做保鑣時非必要唔會用武力！

李嘉為崔始源做「明星保鑣」

唔講唔知，原來李嘉一直有做藝人以外的工作，包括保鑣及曾做過輔警，而佢亦曾經為荷里活巨星做保鑣。雖然功夫了得，但李嘉就表示：「盡可能不使用武力去解決問題，懂得臨場應對較為重要。」而早前崔始源來港，大會安排保鑣開路，李嘉被發現係保鑣之一！佢事後接受訪問表示早在十多年前做輔警時已跟這間保鑣公司合作，後來成為藝人也有客串做保鑣，只是大家不察覺而已。

崔始源在機場現身前後不過15分鐘，到底做保鑣薪酬有幾多？李嘉拒絕透露，但直言隨時好搵過做藝員。據知，做明星保鑣的酬勞以時薪計算，但時薪最少也有一千元，而每次出動的最底要求為4小時，即係話李嘉當日為崔始源做保鑣約賺4千元，又真係好吸引。

抵港臨上車前，崔始源同fans自拍，保鑣李嘉也被攝入鏡！

做足19年配角近年捱出頭

六歲開始習武的李嘉唔講唔知原來加入了無綫十九年，不過多年嚟都只係做唔起眼嘅閒角，如賓客、侍應、大隻男等角色。

直至2010年，李嘉喺《巾幗梟雄之義海豪情》飾演日本人黑木少佐，李嘉終於有屬於自己嘅角色名！由於李嘉飾演一個日本軍人，有日文對白，當時更獲網民讚佢發音標準，可惜該角色早死，未能令佢有所發揮！

而直至近年嘅《城寨英雄》，李嘉飾演一位城寨惡霸馮夏滿，成功令大家對佢嘅印象再次加深！皆因劇中佢侵犯林穎彤飾演嘅鑫鑫，將猥瑣賤格演得入木三分，網民除大讚演技了得之外，拳拳到肉嘅真功夫更係打得出色！

李嘉憑表情交到戲

在《大帥哥》除咗主角張衛健好搶鏡外，飾演冬來嘅李嘉雖然極少對白，但就有好多觀眾激讚佢單靠表情已交到戲！

身型粗獷嘅李嘉喺劇中不但扮演一個唔多出聲嘅營長，加上可能要扮一個為人內斂嘅人，所以佢喺劇集對白唔多，但勝在怕醜表情交足戲，表現出單純天真嘅性格，其演出再次令人眼前一亮！

感激張衞健一路扶持及鼓勵

李嘉曾在訪談節目中透露，是張衞健的忠實粉絲：「我見到佢（張衛健）第一刻係嗰種粉絲見到偶像嘅興奮，又唔敢過去，又好想過去攬住佢嘅感覺，最後我都錫咗佢個頭一啖！」完全係個小粉絲嘅行為，非常可愛！

雖然係個小粉絲，但提到張衛健，李嘉就以前輩及大哥尊稱，非常有禮。同時，佢表示自己好欣賞對方會用心思鑽研劇本及帶動對手，亦認為對方好專業及好照顧台前幕後工作人員嘅情緒，皆因張衛健會嘗試營造一個開心嘅工作環境俾大家，例如喺廠設小食部免費供應小食及生果！李嘉喺訪問中，亦不忙感謝張衛健喺拍劇嘅時間及於佛山時，大家互相扶持同鼓勵，令大家好似一家人！同時，李嘉更直呼有幸同張衛健合作拍劇：「我好幸福啊！」。

舊愛俄羅斯女友患腦瘤 「功夫狂人」李嘉接拍多部微電影為幫補醫藥費

「功夫狂人」李嘉18年返內地工作時，喺火車上邂逅俄羅斯前女友Yana Kobza，二人好快就發展異地戀，李嘉間唔中都會飛去當地搵前女友。拍拖半年嘅李嘉最近飛到去前女朋友家鄉見家長，一齊玩煮飯仔又玩射擊，睇落非常開心。

李嘉仲同前女友家人自拍，相信喺TVB劇都未見過佢溫柔一面，呢張真係顯得好融洽啊！

甜蜜背後，原來都有苦澀故事。女友不幸發現腦部有腫瘤，並要做手術。李嘉表示前女友接受緊治療，依家唔知腫瘤係良性定惡性。好可惜係劇集《大帥哥》就快出街，宣傳期同做手術嘅日子撞晒，李嘉話一有時間就會飛過去。

除左拍劇同教功夫，原來李嘉都有經營飲食生意。不過為咗可以有多啲時間陪前女友，李嘉已經辭去餐廳股東職務，再接拍幾部微電影希望可以幫補下醫藥費。