5月心水好物推介

網誌

又隔左一段時間無同大家share過心水好物啦!
今次我地幾位shopping精都儲左唔少貨呀,
好物就當然唔少得有之前去韓國買既正野啦,
當中又有咩咁正呢?
就要拉落去慢慢睇啦~

CANDY 好物:

今次我要推介我用左好耐既兩個美容工具,哩兩個工具分別可以瘦面同深習清潔皮膚都十分正!重點係兩樣都唔超過20蚊!

1. 排水腫瘦面棒 ( DASIO $12 )

我自己一直都有包包面既煩惱,仲好容易有水腫添!哩個瘦面捧我用左大大話話2,3年了,其實操作好簡單,我自己就係睇電視劇既時間起勢碌!大概10-15分鐘,因為有哩個工具代替用手按摩,所以碌耐D都唔會手軟!

唔需要我講,大家都知按摩對面部血液循環同新陳代謝幾有幫助啦,重點按摩仲可以意想不到既瘦面去水腫功效添!

來回碌腮位水腫位置,少少”怨怨 ”地好舒服的,上用力,落冇力,有提升效果,唔會拉鬆皮膚。之後可以拉埋頸則淋巴位置,排走毒素同水腫。

有時我會碌埋鼻兩則位置,我自己碌完即時有修鼻翼效果嫁,大家都可以試試!

——————————————————————————-

2. 超柔軟深層潔面刷 ( MINISO $15-20 )

哩個深層潔面刷係十分柔軟!我平時卸完妝之後就會用哩個潔面刷+洗面奶輕力打圈洗面,用左一星期到發覺自己皮膚變得柔軟了!同埋少左粉刺,所以洗面夠乾淨真係好緊要呀!( 因為我係敏感皮膚,以前都用過某個過千元既電動潔面刷,但係我用完之後皮膚會發紅,所以唔太岩自己,不過我媽咪就幾岩用,所以就送左俾媽咪了。)

另外一個開心大發現就係大家有冇發覺有時敷完D CREAM MASK由其係CLAY MASK好難清洗?細力洗就好難洗得走,大力捽又怕傷皮膚,用左哩個潔面刷係可以好輕易推走,又快又唔洗用力捽真係好爽呢!

所以好野都一樣可以有貴有平呢~:)

Joan:

Bath & Boby Works shimmer mist (購自美國 約55hkd)

大家有睇開我地嘅分享應該都知我特別鐘意有香味嘅野~ Bath & Body Works係外國一個比較大眾嘅body care品牌, 佢嘅沖涼產品都非常好用, 主要係有好多款不同嘅香味適合唔同人嘅喜好~ 鐘意甜味,果味又或者花味都總有一款啱~

呢支body mist係一個住係美國嘅朋友買俾我做手信~ 佢嘅味道係甜甜嘅vanilla味~ 平時嘅body mist通常味道都keep得晤耐~比較易散, 但呢支mist我朝早用完佢嘅味道大約keep到黃昏都仲有淡淡甜味~ 非常long last, 有時唔記得噴香水都唔怕(本人係每日唔噴香水出街會唔舒服嘅人)

呢支mist特別之處除左一般補濕同香味外, 就係有閃粉混左入去, 噴出黎會閃令令, 有時夜晚出街食飯或者去party噴下真係閃足全場~

佢嘅閃粒屬於比較粗粒而且非常密~ 鐘意誇張就非常適合啦!

10ml便攜香水瓶 (購自日本 約150hkd)

另外一樣都係關於香味嘅product, 就係便攜香水瓶, 雖然香港漸漸都有唔少水貨店有類似嘅product, 但係日本買平啲之餘呢款仲係特別版添 我呢個粉紅控即買, 仲有皮套保護香水撙, 好䀡心!

可以自行fill鐘意嘅香水帶出街, 輕便之餘仲好靚! 而加係出街必備物品之一!

瓶口係旋轉式, 只要扭出黎就可以噴出香水! 樽頂仲有閃石,lady得黎又有啲華麗~

fill香水只需要係瓶底注入, 非常方便呢!

Yuki:

今次雷品就無喇~好物就有兩件!
首先就係以下呢枝makeup remover。

INUF / [minINUF] Makeup & Sunscreen Remover $90

INUF 呢個本地護膚品牌相信唔少sis都聽過,
INUF = I Never Use Foundation,
每個女生都想擁有即使唔上粉底都好有氣息、零瑕疵既皮膚,
其實我好out既,都係家姐介紹比我先識呢個brand,
佢地主打用純天然成分,無動物測試等,
而所有產品都係黎自美南加州一間受GMP認可既實驗室同廠商。

我自己聽完覺得佢地既理念好吸引,
一直都好想試下佢地既產品,
早前知道佢地有喺金鐘Lab Concept擺pop up store,
所以就去買左幾款travel size既產品試試喇!

其中有呢款makeup remover,
藴含全天然天竺葵萃取物,有機羅馬洋金菊及青瓜精華,
佢地亦註明係適合任何敏感脆弱皮膚,
我自己用完都覺得好surprise,
因為佢既卸妝效能真係好好,
防水產品都一樣卸到,
而且上面無任何刺激感,
卸後仲好似用左保濕toner一樣咁水潤清爽。

用既時候只要噴濕化妝棉,直接打圈抹走妝容,

圖2 係抹一次既效果,
對於唔係特別防水既產品基本上一抹就會甩,
圖3 係敷2-3分鐘喺防水彩妝上,
之後再抹就已經完全卸晒所有彩妝啦~
效果好好之餘,皮膚亦好水潤!

雖然佢地仲有好多正野,但價錢就比較貴,
呢枝travel size價錢係90蚊,
平日90蚊可能已經買到大大枝remover,
但對於敏感肌膚/去旅行既朋友,呢枝就十分適合啦~

另一樣要介紹既就係我喺韓國購入既facial stick啦!

ETUDE HOUSE / moistfull collagen Facial Stick 約$50

呢枝係我現時化妝袋中必要有既產品,
真係自從有左佢,尷尬情況都少左。
因為我本身咀角位、鼻樑位都比較乾,
近排仲生左啲暗粒搞到人中位都好乾,
乾皮經常現形!
尤其係化妝時,容易出現kick粉情況(如圖1)。

呢枝facial stick係moistfull系列,
其實我自己都幾鍾意呢個系列,
水潤舒適,仲有淡淡既香味,
設計細細枝,拎出街就非常方便。

用佢搽上面時感覺水潤、涼涼地,
佢既質地唔會太潤,吸收後變清爽,

而我最like就係佢可以撫平我面上既乾皮,
再上粉就更加貼服自然,即時解決乾皮問題!

呢枝facial stick喺香港門市都有售賣,
如果大家行開都可以去睇下架~

Janice:

W.DRESSROOM NEW YORK / Clear Perfume 購自韓國 約$50

今次要推介比大家既係上次喺韓國買既home fragrance,
其實我屋企都好多香水,咁點解會買佢呢⋯
就係因為我地住果間airbnb既廁所抽氣系統唔係好夠力⋯
我地成6個女仔⋯都要去下廁所既⋯
所以第一晚就拿拿臨落Olive Young搵下有無清新噴霧。

去到見到呢款,開頭都覺得貴貴地,
不過店員話淨係得呢隻,
所以最後都買左,揀既係西柚味。
買既時候都留意唔到原來佢係cologne黎,
所以味道好持久,而且唔似人工味,夠fresh!

用唔晒呢枝home fragrance宜家就放左喺workshop用啦~


你可能也喜歡

Recommended