浸梅酒

青梅當造 自家浸梅酒

網誌

經過北角街市發現20蚊3磅青梅,聞落梅味濃郁似乎就快熟透,於是膽粗粗買3磅青梅回家試浸梅酒。

望著3磅青梅毫無頭緒,唯有請教Google大神,發現大量浸酒報告,原來浸之前,可以用清水\鹽水,甚至有人直接用孖蒸清梅,順手消毒,而我選擇用鹽水洗,聽說可以去青梅表皮的苦澀味。

清洗之後要徹底風乾濕水青梅,看過幾篇文章內都強調這個關鍵步驟,穩陣起見,我出動抽濕機對準兜梅狂抽,一夜之後,青梅更熟,開始黃添!要快手進行另一個重要步驟,就是用牙籤挑去青梅上的蒂 (黑色部分),據講挑唔清的話,浸出來的酒會有苦澀味。

為了令梅汁容易浸透,入樽之前用刀在梅表面『界』幾刀,不過要避免刮到果核,否則又會令酒變苦。

將玻璃密氣瓶清洗,用滚水消毒,放入青梅和冰糖,然後倒入米酒。先講酒,歸納各派浸酒經驗,一定要揀酒精濃度20度以上的,有人試過用一般日本清酒,不過酒精濃度只有10至15%,浸出來唔夠味,而大部分都見議用九江雙蒸,酒精濃度30%,由於我飲梅酒都一向鍾意溝雪碧,所以最後揀酒精濃度25%的鏡月燒酌,一支$45/700ml,幾抵。至於放糖,有人試過用日本沖繩黑糖或蜜糖,不過要比用冰糖多一倍份量,浸出來的酒先至有明顯甜味,而我這次用原色甘蔗冰糖,比例是700ml酒+20粒青梅+200g冰糖,剛好fit入1.5L密氣玻璃瓶。待冰糖溶化之後將密氣瓶上下倒轉一下,令糖水與米酒混和,此時青梅由沉變浮是正常的。另外也有後加糖的派別,浸一段時間待梅汁盡出之後才加入冰糖,之後再封瓶待發酵。究竟幾耐先飲得?眾說起碼6個月,而我打算浸夠9個月啦!

總結材料:
3磅青梅 $20
1500cc密氣玻璃瓶 約$40 (購自日本城)
700ml 鏡月燒酌 約$45 (超級市場)
500g 原色甘蔗冰糖 約$15 (超級市場)

*其實大多數人都用 1kg青梅+1000ml米酒+300g冰糖,不過由於我唔想用裝薑醋咁大個樽來浸酒,一來重二來廚房冇位,所以自行改份量,希望浸出來分別只是太甜或太濃味,而我老公就食住花生等睇九個月之後我試飲個樣……(fingercross)

你可能也喜歡