元朗好味點心與甜品 – 大肚腩及Wins Goodies
最近身體不佳，每天放工作後筋疲力竭，有時放工後前往做瑜伽和跑步途中，總出現「不如返屋企食飯和早啲瞓」的念頭，幸好這念頭很快便打消，做完運動滿足地回家。
上周六工作整天後，星期日起床仍疲倦，但6月參加了50公里賽事，總要開始練習，幸好沒有下雨，中午走上我的後花園「雞公嶺」，行了十幾公里，然後提早晚飯和甜品。
元朗有很多中式小店，粥店和點心店特別多，之前誤闖誤撞吃過著名的朱兆記，其實又想試點心好耐，終於去試吓經常行過都好多人的大肚腩點心專門店，下午四點幾都只得兩張「吉」枱，心諗元朗人又真係好喜歡吃點心，這裡點心全部十幾蚊和廿幾蚊一款，份量係聰明地比一般酒樓減半，蝦餃一份兩粒十六蚊，仲有舊式鵪鶉蛋燒賣, 不過最欣賞係豬膶腸粉,好多又juicy的豬膶和好薄的腸粉皮，埋單只吃了一百蚊。
坐著歎吓茶和吃飽後，便到最近的最愛甜品店Wins Goodies，因為上次想試檸檬撻卻賣哂，見到朋友在ig推介，今次專程前往, 到達時剛6點，我還記得第一次經過這間甜品店，門口掛住個牌寫著「晚飯時間6:30pm-7:30pm」, 當時心諗, 有無咁巴閉, 開門做生意, 竟然有晚飯時間，今次趕及其晚飯時間前到達，原來下午時段主要售賣蛋糕, 十多款蛋糕, 連飲品, 每款六十幾蚊，今天終於試了檸檬撻下午茶餐，還連一杯香濃的熱朱古力 (雖未至Angelina或Passion的級數, 但絶對水準之作)，第一次吃過拿破崙，是高級甜品店和酒店水平，後來睇番雜誌介紹才知原來老闆以前原來係Kowloon Shangri-la和Ritz Carlton的pastry chef, 他每天都坐鎮，還記得第一次前來幫襯, 他很熱情地拿著i-pad向我們推介weekly special, 而每個店員都會很在意地問我們甜品的意見， 跟市區這些流水作業式的so -called高級甜品店大不同，真心感到由老闆至店員都係對甜品店之出品有一份passion。
希望有機會可以試哂呢度既甜品
