名古屋Outlet

購物精天堂!名古屋Outlet 超過300間商店 日本最大Outlet掃貨攻略

Article

日本人票選最悶蛋的國內大城市,連年敬陪末座的名古屋終於有賣點了!剛完成擴建工程的名古屋Outlet MITSUI OUTLET PARK 爵士之夢長島,三重縣outlet,全場合共有302間特賣場,名花之里、長島啤酒園、長島溫泉樂園及麵包超人兒童博物館等等,上月尾開幕即成為日本最大的特賣場,而附近有長島度假村,至少要玩兩日一夜先夠時間,以後邊個仲敢話飛去名古屋冇地方好玩!

撰文:Onki|攝影:Man |原文:947期《新假期》、GoTrip|編輯:Casey

一日唔夠行!名古屋Outlet掃盡302間特賣場

特賣場位於三重縣,但離名古屋市只是短短50分鐘車程,地點不算遠。今次擴建的第5期有成100家新店進駐,連同裝修後重開的47家店,新面孔算幾多,行起來也特別有新鮮感。研究過值得行的品牌商舖和食店,包括:

日系衣飾:CIAOPANIC、PEACH JOHN、RonHerman、MargaretHowellA.G.O.

山系品牌:THE NORTH FACE、 Haglöfs、new balance、Barbour、Mackintosh、Onitsuka Tiger

雜貨:松本清(Matsumoto Kiyoshi)、PLAZA、LE CREUSET、JINS、AfternoonTea

食店:Eggs’n Things、gelato pigue café creperie、名產松阪肉朝日屋、morozoff、BOUL’ANGE Cafe

new balance factory store(South Area 2/F)$273起波鞋開倉

去日本特賣場的最大目標:掃波鞋!人人都會走去NIKE和adidas兩大鞋倉掃貨,但記者行勻發現筍貨只在new balance factory store搵到!新場貨多款齊,折上折的款式通通攤在鞋架上,好易搵。超卡娃兒女裝款的粉紅色 574,鞋籠內有毛毛,食正今年秋冬毛毛潮回歸,$378好抵玩!男生也不愁買唔到嘢,搵到連市區街舖都唔多見、配色日味極濃的M577YP、 M9915SP,$1,470一對係貴少少,但至少比街價平了¥5,000/ HK$350,加埋有得退稅,慳番條數夠買多對都仲得!

KEEN(South Area 2/F)低至半價!超抵買行山鞋

日系行山友好多都會著KEEN的行山鞋,有著過經典鞋款Jasper就知道有幾舒服:鞋面夠軟、鞋底抓地,功能性滿分加埋顏色繽紛,襯衫一流。而日本時裝友最愛的水陸兩用的UNEEK,超多顏色揀,雖然未有發現聯乘系列筍貨,但在特賣場是平時公價的7折,幾抵買!

Haglöfs factory-outlet(South Area 1/F)山系友必備!絕色功能服

北歐瑞典的戶外品牌 Haglöfs應該係大細超,日本比起香港買到的風褸外套顏色超繽紛,鮮艷活潑得來完全冇娘味!店內男女裝比例平均,可以搵到4千多的GORE-TEX到一千有找的風褸,價位合理!買完風褸,行李仲有位,真係可以考慮買埋對行山鞋,保暖防水唔跣腳,冬天雪地著一流。

THE NORTH FACE/ Helly Hansen(South Area 2/F)Outlet價!掃日系功能服

特賣場唔准提有幾折,識途老馬自己心算就知有幾抵,每次去日本outlet的THE NORTH FACE/ Helly Hansen都可以買到破產!今年冬天置裝必備的闊身絨褲、燈芯絨漁夫帽、衛衣……通通都可以outlet價買入。而有心機搵的話,有不少讓日版 THE NORTH FACE 搣甩娘味的Purple Label系列貨色,今次無慮入手的Purple Label藍色叮噹袋風褸,用埋購物券埋單一千蚊有找,執到寶呀!

松本清(South Area 2/F)行完又行!藥妝散貨場

沒有女生能在藥妝店松本清空手而回的!即使明知是連鎖店,但總要每家店都要逛一逛才安樂。日本全國只有6間松本清 outlets,雖然叫作特賣場,但其實不少藥妝的定價跟其他分店相若。咁點解要行?因為這裡可以搵到好多熱賣藥妝,7千款商品整齊列陣,唔使四圍撲都有貨,慳番啲腳骨力!雖然公價貨冇減,但就有唔少特價套裝,採訪當日發現雪肌精有限時 特價套裝,打咗個6折,平到喊呀!市區的藥妝店好少做到呢個價錢呀!

PLAZA(Park Side Area 2/F)必掃雜貨 x 藥妝

松本清藥妝偏向實用,未必合少女們的口味,少女想要買可愛潮流藥妝品雜貨,就要鎖實PLAZA 。雖然是outlet特賣場店,但內裡賣的貨色跟在市區分店的也差不多,又快又新!一路行,發現有好多 PLAZA 限定貨色,在其他藥妝店是沒有的。大手購入人氣的SABORINO蘋果蜜糖面膜,手快有手慢冇呀!

CIAOPANIC(South Area 2/F)6折起!日系女生打扮

打算去買衫的女生在這裡是可以買到瘋狂,新場內有moussy、MERCURYDUO、X-girl、w closet、MAJESTIC LEGON及Samantha Thavasa等外,大牌還有BALENCIAGA、 SAINT LAURENT、sergio rossi、HUNTER及BURBERRY等等。 要數CP值高的日系品牌,品質及款 式走長青路線的CIAOPANIC,絕對值得花時間慢慢買。Biker白色褸、羊咩咩袖衛衣及格子絨帽這些今季必備的items,完全唔似在outlet賣的過季款,百幾蚊已經有交易,好多日本妹會成套買起,反正價錢唔貴,不善配搭的人,就不用再為襯衫而煩惱。

LE CREUSET(South Area 2/F)超值!買煲送碗+筷子托

每次去日本outlet見到LE CREUSET,永遠都心郁郁掙扎在「買 VS 不買 」的邊緣,只因價錢實在太吸引!幾乎每季都有不同的限定版,紅葉限定版一樣搵得到,繪上紅葉圖案的瓷碗只是HK$294!而最搶手的LE CREUSET 搪瓷煲套裝,只要$1,400已有齊招牌搪瓷煲、飯碗及筷子托,LC 迷的攝影師看到已雙眼發光,無慮入手!

DENHAM(South Area 1/F)意大利牛王

來自荷蘭的牛王全部百分百意大利製,創辦人 Jason Denham曾經為LVMH、Kenzo、Ben Sherman 及 Levi’s 擔任牛仔褲顧問,出品絕對有保證!牛仔褲暫時只得6款,平時買條要成2萬幾円,依家在 outlet 買只要6折就可以買到,潮人必備!

JINS(South Area 2/F)廠貨即配即戴

有戴眼鏡的哈日族理應都在 JINS 買過眼鏡,貪其款式靚、服務好、一個價錢全包之餘,仲可以即日攞走!在長島特賣場的 JINS,同樣可以有即配即戴的服務,最平的圓形膠框眼鏡只要¥3,900/HK$273 起,$133就可以有副太陽眼鏡,好抵!

PEACH JOHN(South Area 2/F)必備戰衣

日本 outlet場內大多由兩大內衣品牌雄霸,長島就有日本內衣品牌PEACH JOHN,好多粉色、喱士的夢幻設計,價錢百零蚊港紙買到全套,難怪超受女生歡迎!

慳時間!快靚正3大醫肚熱點

Eggs’n Things(South Area 1/F)夏威夷忌廉山班戟

次次去東京原宿班戟店Eggs ‘n Things都大排長龍,這家來自夏威夷的人氣班戟,有如一座忌廉山,甜點迷可以吃菠蘿+夏威夷果仁班戟,酸咪咪正好中和忌廉山膩滯感。而鹹食推介SURF & TURF SHARE PLATE,牛扒不會一味死腍,有肉味又 多汁。建議大家可以攞定位,再去對面Francfranc行陣!

gelato pique café creperie(South Area 1/F)邊走邊吃!鹹班戟

來到長島,有心理準備要行足一日先行得完這4萬幾平方米的巨無霸級特賣場,大家即使為了爭取時間去 shopping 也不可以虐待自己的腸胃。新擴建部分食肆林立, 當中有不少更是首次在outlet開設分店!次次去outlet都好期待可以食到gelato pique café creperie的班戟,即叫即做的班戟用上了法國的 ECHIRE牛油來製作,聞到那陣牛油香已垂涎欲滴。最新與守山乳業聯手推出的百年元祖咖啡牛奶雪糕外,雲呢拿口味呈藍色,打卡一流。

morozoff(South Area 1/F)即焗抹茶芝士撻

日本有名的洋菓子店 morozoff 在長島開設了「モ ロゾフ釜だしチーズケーキ」芝士撻專門店,用上北海道產芝士,即時在店頭製作,以獨家製作的釜爐即時烘焗,入口撻底超脆,每季仲有3款的季節限定口味,食極唔厭!

MITSUI OUTLET PARK爵士之夢長島

地址:三重縣桑名市長島町浦安368

電話:+81(- 0)3-5927-9320

營業時間:商舖10:00am-8:00pm,美食廣場 11:00am-9:00pm,周末及假日 10:30am-9:00pm

交通:

1. 從名鐵巴士名古屋站搭乘巴士至「 長島溫泉 」下車,車程約50分鐘,車資 ¥1,060/HK$74

2. 從中部國際空港出發2號巴士站,車程約60分鐘,車資 ¥1,500/HK$105

網址:mitsui-shopping-park.com/mop/nagashima/tw/index.html

你可能也喜歡

Recommended