龍震天,兩性關係,姻緣,婚姻

龍震天:成功個案分享擁有甜蜜美滿愛情全靠「6大實用感情守則」

網絡熱話

每個星期都會有不同的網友及客人來信多謝我,她們都會透過我的 blog 學到事情,進而讓自己的感情運有所突破,我在此要和她們說多謝。今天的這篇分享,並不單只是謝謝那麼簡單,而是她真心將她學到的事情告訴我,我們在當中也可以重溫及學習我的重要而實用的感情技巧。我常說,不要只相信我,請只相信事實。我說了出來,也不一定是真確的,但大家可以用邏輯思維想想,經過自己的邏輯思維才去接受也是可以的。

撰文:龍震天|圖片來源:劇照

龍震天:6大實用感情技巧讓你擁有美滿愛情

A 小姐分享

龍師父,啱啱同男友喺希臘返來,喺Oia面對住愛琴海睇日落,好浪漫好寫意!但重點係,無龍師父呢兩年嘅無私奉獻,教我地要理性談情,我相信無今日嘅我地,喺今時今日香港嘅局勢,我希望帶返啲愛情正能量俾大家。呢篇長論文,係經過不斷重覆又重覆咁去溫習每篇blog同情到龍匙而寫,歡迎分享,亦希望回饋師父,將你嘅重點一一列出,讓各網友仍相信網上交友係可行,總會揾到合適嘅一位。

(龍師傅註:對,理性談情是很重要的,道理很簡單,因為我們是活在現實的世界之中,如果想法不現實,那現實生活之中所發生的事,很多機會都是自己不想看到的。所以,要感情成功,要有心愛,要男人離不開你,首要就是用理性談情。也有很多人誤解了,以為理性談情很悶,其實不然,理性談情也可以很浪漫的,你的男朋友也當然可以送花,給你驚喜,他可以對你好,你們也可以去很多浪漫的地方如看日落,去沙灘,也是沒有問題的。只是在兩個人的關係評估上,你需要理性而已,例如兩個人還未見面,就已經覺得大家很適合,可以結婚;還未見面,下世都約定了,明明一個在香港,一個在美國,也會想成「只要兩個人願意,就沒有解決不了的問題」,明明是愛,卻努力避開對方,努力甚麼都不做甚至乎拒絕,而會想成對方就會落力追求,明明自己發脾氣有情緒,卻會想成「如果對方很愛我,他就會容忍我讓我發脾氣」,這些就是不理性之事。)

1.網上交友(除非你有其他更有效嘅方法識異性)

我網上交友已經係講緊ICQ年代,讀書時已知圈子細,要識人除左網上,就真係無咩機會。但年少輕狂,又女校出世,加埋公主病上身,感性思維,有唔鍾意就會嘈,要全世界就晒自己,只要係我鍾意就得,所以由22歲起,只拍過五次拖,第二個拍咗三年更已儲錢結婚,當時27歲,希望大家一齊30歲就結(同男友同年,係我網上識嘅朋友嘅朋友)。但任性嘅我又點會咁快定落來,所以就不停發脾氣,到最後分手。之後又開始返網上交友,on and off都見不少男仔,但總係開始唔到,我估就係師父所講,外表,再加細心溫柔體貼照顧,我係唔夠好。直至分手後一、兩年,我報咗個fashion course,識到同我世界唔同嘅人,佢地就教我可以再點執吓個外表,亦印證龍師父所講朋友嘅重要性,之後外表開始女性化,改變思維先可以改變命運。

(龍師傅註:說得很好,外表是初賽,內在美是決賽,缺一不可;開始時,必然要注重自己外表,因為外表是你的入場券,是你初步讓異性對你感興趣的地方。另外一樣很重要的是,很多人都不想網上交友,這很正常,這也是沒有問題,不過你一定要回答第二個問題,就是除了網上交友之外,你有甚麼實的社交圈子可以認識異性?如果沒有,網上交友依然是在你來說最好的方法。)

2.微笑、點頭、離開

正因我有幾個女性朋友都係齋坐唔做野,有個仲選擇坐以待斃,等白馬王子騎馬敲門來揾佢,又或者係覺得「點解我要改」之際,我就選擇一條佢哋唔會揀嘅路,就係師父所教要改變思維,先會改變到個結局,每日做住相同嘅事,又點會有改變呢?慢慢我就「群」多咗讀fashion果班朋友,留意佢地一舉一動,接受意見,慢慢改進。同時我亦參加meet up嘅活動,按照自己興趣去認識新朋友,讓自己主動去同不同人練習,而唔係“當見到我鍾意嘅人就會唔同”,從而改變個結局。

(龍師傅註:對,練習是很重要的,等於奧運比賽一樣,不會你平日沒有練習,而突然間在比賽會得到優異成績。愛情也是一樣,別在想遇到自己喜歡的人就會突然間變得很有吸引力,而是你要在每個人面前,都要有吸引力,然後吸引到自己喜歡的對象。)

3.細心、溫柔、體貼、照顧

性格慢慢由男仔頭,到學咩叫做同理心,同時我當時年紀已經有33、34歲,就係嗰陣時經朋友送上一本龍師父嘅書,我就慢慢開竅,過多一年亦有見過師父批命,當時你亦講過我可以進步嘅地方,我就朝着呢個方向進發。網上交友明顯地多咗男人約出來食飯,好快就識到第四任男友,可惜拍咗半年我哋就分手,因為佢太小家,又斤斤計較,亦只掛住揾錢發展自己補習社,同佢根本無時間溝通見面。我當時亦有將被愛放大,成日問佢幾時陪到我,最終佢揀事業,我揀愛情而分手。但係呢段關係度,我學識體貼,佢要成日講書,我每次見佢都焗滋潤湯佢飲,體諒佢夜晚補習,我都放工去佢補習社度見佢,中秋節整月餅送俾佢同佢屋企人⋯⋯⋯⋯,所以我再次鼓勵圈子細嘅朋友,網上交友絕對係一個方法,必定要跟師父所教,主動一天認識四五個,一個月就有一百二十個,但要分辨出渣男、揾食男、小費男同sales男。

(龍師傅註:對,很同意,網上交友必然不會一認識就是正確對象,中間必然有過程;你只要知道,不要和不值得的男人交往,一早能夠清楚分得出那些是壞人而馬上停止交往,然後不停再找,有一千對三的能力,你就必然能夠成功。過了一段日子未能成功,就要客觀審視,想想自己有甚麼問題,然後改變,再認識。)

4.等價交換

我一向都有copy and paste龍師父blog嘅重點,首先係要揀個正確嘅人,因為一開始就揀錯,之後嘅都會係錯。我之前果四個(除準備結婚果位)都唔啱我,所以我一直keep住網上交友,直到揾到現在呢位,龍師父教過:要有穏定愛情,必然要符合三個條件:

1. 男方經濟自己可以接受(我搵得多過佢但可接受)
2. 男方對自己的專一性(佢自己自動自覺報到每日行蹤,但我無要求過)
3. 男方愛自己多一些(佢好錫我,佢知我錫家人,亦愛屋及烏,時常擔心我)

(龍師傅註:對,這是其中三大重要條件。)

師父亦講過,要睇男人唔係聽佢講過啲咩,而係做過啲咩,當時我同四位網上男士都keep住有聯絡,見過面都可以考慮發展,正當此時,我爸爸入左醫院,因為獨女關係,同兩老關係甚好,家人係首位,我就將呢件事同時同呢四位男士講,結果係隨口問候下,無關心,問候完一句就完,講返佢自己想講既野,第二日當無事發生過。唯獨我現任男友每日都以朋友身分去問候我關心我,出院後我地傾多咗好多野,原來佢都好重視家人,好多價值觀同佢好似,興趣都夾(做瑜珈、游水、去旅行會住hostel等),之後就第一次約見面。

佢外表普通,正正經經,因為都傾咗成個月,感覺佢人品唔錯,食三次飯都係佢俾,又送我返屋企,每次出來都感覺舒服,有講唔完嘅話題,所以好快我哋就一齊左。去到35歲,我好清楚知道自己重有咩去交換,女人青春係有限,唔應該用自己寶貴的時間,去交上不確的對象,所以揾到個符合晒龍師父所講嘅三個條件,我已經滿足,亦想過簡簡單單生活,愛情去到尾後淡如白開水一樣。

(龍師傅註:這很重要,女人的青春很有限,但有很多感性女人,完全不介意去浪費青春,和一些一早已經知道沒有結果的男人拍拖,浪費時間之餘,甚麼也得不到,到老一場空,才來後悔,不停說「早知」。其實這些都是一早已寫在前頭的,只是自己有沒有心去理解,有沒有決心去做而已。)

5.LAP技巧

好耐無聽師父再提呢個技巧,聆聽係我最弱嘅一項,因為師父講過,九成的東西,對方必然不會告訴你。所以必然要自己學懂聽得出男友嘅需要,可惜我呢一點未能掌握得到,所以都希望師父可以再教吓,有時我仍然會犯「做人不是坦白一點就好」呢個錯誤。欣賞對方其實係好重要,如果只放大對方嘅缺點,而唔識得感恩,對一段關係都唔會有好發展。女人有個錯覺,就係「奉旨」,我曾經有個朋友教過我,佢講得好啱,就係男友同老公其實都係一個陌生人,唔係你阿爸阿媽,對你好唔係一定要奉旨。佢講完我自己諗,佢話醒咗我,呢個陌生人點解要無條件對自己好?

佢無欠咗我,所以佢對我做嘅一切,我都好多謝佢,所以我哋兩個已經拍咗年半拖,仍然會係上一輩所講,做到相敬如賓一樣,我哋為對方做咗嘢會講“多謝”、“唔該”、“你真係好好”等讓對方知道,大家嘅付出而對方嘅回饋係一種尊重,好似講到好老餅,但有時真係覺得,要維繫一段長感情,係真係要真心付出,真係要講出來。

(龍師傅註:這很重要,很多人以為拍了拖,確認了關係,就可以忽略了「謝謝」,「唔該」這些感謝詞,其實完全錯了。你想想,確認關係前對方對自己很客氣很好,確認關係之後對方變得沒有禮貎,一切都是必然,你會怎樣想?其實女方只是在潛意識之中不停提醒男生「你不要和我確認關係」,「認識到我是你的厄運」,「我們關係好你的運就會越差」,「你越對我好我越對你惡」這些負面訊息。可憐很多女生都不知就裏,努力發放負面訊息,去到分手的時候才全力扮無知及奇怪問為甚麼,已經太遲。)

讚賞呢家嘢,我比較好啲,男人,都是英雄主義的動物,分別只是多或少而已;沒有英雄主義,不需要備受讚賞的,那不是男人,送給你也不要。我係果啲粗心大意嘅女人,男友比我細心,睇嘢睇得好仔細,所以每每佢睇到一啲我睇唔到嘅野,我都會大讚佢,讚啲好實在既野。例如有一次我搵路,但確實我係路痴,我話嗰度有某某餐廳,佢無講過任何野(就算我行錯路),之後佢見到嗰間餐廳嘅廣告牌,叫我去睇,之後我地跟住去就搵到我地想搵嗰度。我打蛇隨棍上,馬上說:「你好醒呀,見到個廣告牌,如果唔係我哋肯定有排搵,你好叻呀!」
我男友笑咗,話返我叻啲,最後都去到果度。

仲有一次係我開個乳酪蓋,開極都開唔到,我男友就幫我開,開咗之後我又講如果無咗你,我就食唔到呢啲咁好食嘅嘢食,好彩我身邊有你,好叻呀!之後佢笑住話我,其實係我無耐性開,但從佢嘅笑容話我知,男人係好受女人讚佢,無論大小事都好,男人係需要被肯定。

(龍師傅註:一定是,不過很多女人做不到,為甚麼?很難做嗎?不難,這些事情很複雜嗎?不複雜,但為何很多女人都做不到?關鍵只在於自己的陰暗面,有好勝心,覺得讚賞了對方,自己就輸,其實全錯。你想想,一個慈祥的媽媽,不停讚賞爸爸,然後爸爸很愛她,賺到的錢都全給了媽媽,那媽媽何輸之有?只是有些執著偏激之人,總覺得讚賞男人自己就輸,盲目地追求贏,卻不明白真正的贏是甚麼,其實是蠢得很。但有很多人都甘願蠢一世的,明知是蠢都要做的,那就不在我的控制範圍之內。你要想的,是你想要做蠢人,還是叻人,自己想。)

6.融入佢圈子

我地拍咗兩個月就見對方家長、朋友,我外出時都必定買手信俾佢家人,過時過節會送下生果、應節食品去見佢地,一見面就好主動同佢家人傾計,對方家人對我好好,佢嘅同事朋友亦知佢拍咗拖之後有好多改變,兩個人一齊係需要進步,亦因為我地鍾意去旅行,所以都會以游水為目的地,每事都有商有量,而慢慢步入結婚階梯。佢已經準備好首期買樓,亦因為我地兩個都只係草根家庭,唔介意同我家人住,解釋話因為我獨女,父母好重要,佢有個家姐,所以佢唔介意之後抽居屋,佢俾首期,之後我地慢慢儲錢去供,建立我地嘅小家庭,而且我地唔會要小朋友,有多餘錢就去歐洲旅行。稍後我地會去開聯名戶口,之後一人一半儲錢供樓,再從申多次,只去睇個男人做啲咩就夠。

龍師傅註:這是很重要的,因為要去到結婚,之前必需要先見雙方家長,朋友,之類,如果男方一直遲遲諸多籍口,不讓自己見對方的家人,朋友,自己就要想,是否對方根本沒有心和自己有進一步的發展,只看事實。)

總結

確實,龍師父重教我哋好多嘢,例如︰同意你不同意的東西、女人不要給男人麻煩、不要讓我們談一談、天賦知識技能、男人,就是要不停被受鼓勵的動物、睡覺,是男人其中的一個生理需求、異地戀等同癌症三期尾、感情上談得不好,大部份情況都是沒有按照邏輯思維思考等,只要大家細心溫習龍師父所教,針針見血嘅說話,我相信大家都好快搵到另一半,過甜蜜嘅生活。他日我哋準備結婚,我會將師父所有有關「未結婚已分手」嘅文篇再細讀,提醒自己唔好犯同一樣嘅錯。再一次,謝謝師父!

A小姐

(龍師傅註:好的,謝謝 A 小姐的來信,真的將我所教過的技巧一次過再重溫,非常精彩!大家也可以學到感情技巧,應用在自己日常的感情生活之中。)

(作者簡介:龍震天,玄學家,作家,擅長替客人分析感情個案,推算姻緣運,一生運程;出版書籍二十八本,題材包括男女感情個案分析,感情技巧,語言學,行為解碼學,心理學,潛意識,改思改運,記憶術等。)

龍震天 Blog: http://lungchuntin.com

龍震天 Facebook: http://facebook.com/lungchuntin1

情侶相處之道是甚麼呢?

想維持長久關係的妳都會問過!過了熱戀期的甜蜜的階段,情侶相處之道技巧就十分重要,而擁抱姿勢也有不同的意思,想了解你的另一半更多請看

我如何得知心儀對象是否喜歡我?

心儀對象的一舉一動總會牽動著自己的心,只要留意這些男人喜歡你的徵兆,就能看出他到底喜歡或不喜歡你。而尋找靈魂伴侶也是十分重要,想知道你和另一半是否為靈魂伴侶嗎?就從幾個特點開始看吧!

你可能也喜歡

Recommended