瘦唔到因為唔執屋？十五分鐘 執屋 減肥一take過！

Text ｜Candy Choy

你諗都冇諗過，一間雜亂嘅房間，竟然係令你瘦極都瘦唔到嘅其中一個原因？日本依家興緊「斷捨離減肥法」，你心諗，執屋關減肥咩事呢？但當你聽到「屋嘅物件減少咗之後，連體重、脂肪都下降」，仲有人成功減咗十一公斤後，你係咪即刻好想知點解可以做到呢？

凌亂房間會致肥

房間係我哋除咗返工、返學以外，逗留最長時間嘅地方，所以要令房間擁有整齊乾淨嘅環境，先可以令精神、心靈安定，相反雜亂嘅房，會令人心煩，自然容易導致身體代謝失衡，造成致肥嘅元兇。所以用「斷捨離」方法 執屋 ，房乾淨咗，自然身心健康，心情愉快，再加上 執屋 都要體力勞動，減肥就會更得心應手。

執屋 =/=將物件移位

執屋 嘅斷捨離就係「整理」「收納」「打掃」，好多人以為「整理」，就係將屋企散亂嘅物品收回原來嘅地方；而「收納」，就係將物品收去一個整齊嘅地方，例如盒、櫃，有種眼不見為乾淨嘅諗法。其實斷捨離嘅真正意義係要令人心情舒適，整理其實係是指「處理」，係要判斷物品已經用唔到，係精簡需要嘅物品，而且將唔需要嘅物品掉走。

實踐斷捨離

1.放棄「掉咗好嘥、遲早有用」嘅物品

唔好因為驚浪費而keep住好多冇用嘅嘢，因為最後你擺多幾多年都會係冇用。

2. 別買太多收納用具

應該要減少不必要嘅物件，而唔係將現有嘅物件擺入收納櫃、箱，到最後你只會覺得屋企冇空間感。

3.只被自己鐘意嘅物品圍繞

開始過著只有自己所喜愛嘅物品圍繞喺身邊嘅生活，你嘅每一日都會變得愉快。

4.實用唔代表可以喪買

只要你唔減少數量多到幾乎要滿瀉出嚟嘅嘢，收納就永無止境，所以實用嘅嘢都要斷捨離。

5.大忙人可以逐步整理

大忙人其實只需要執十五分鐘，每日小小嘅累積，都可以有滿足感，慢慢睇住屋企變乾淨，心情都會變好。

6.同一類嘅要集中放喺一個地方

睇起嚟整齊、舒服又方便。

進階廚房斷捨離

搵嘢食，自然要去廚房，定期清雪櫃多餘嘅食物，又或者睇吓儲物櫃有幾多一直擺放但冇食過，甚至過期嘅食物，可以令自己更加清楚咩食物先係你食得最多／最少，就知道自己會唔會食過量，同埋整齊嘅廚房，食物唔會亂放，自然食慾都唔會失控喇！