智慧女生｜Tiffany & Co. 全球市場總監 香港至紐約 公開晉身高層職場之道！

Tiffany & Co. 全球市場總監 Monica 由香港至紐約 公開晉身高層職場之道！

閱到 Monica 的履歷，自然猜想她是在一個充滿時尚氣息的環境長大，她卻笑著否認：「我父母都係教書嘅，係好平實、唔奢華、物質上唔會好富足嘅家庭，父母成日教導我哋內涵比外表重要。但我又自細好貪靚，好鍾意自己揀衫褲鞋襪，可能真係天生！」

Monica 大學時期修讀廣播傳訊學系，曾在電台、4As 廣告公司工作，但她很快就意識到自己的熱情在時尚行業，先後任職過 Gucci 和 De Beers，當年香港零售行業發展迅速，大有前景，她就抓緊每一個機會，終在2008年進入Fendi，由廣告和公關職位開始，開始她晉身高層之路！

常轉工不利升職 全面了解公司至少3-4年

現在年輕人很容易轉工，甚至覺得轉工是步步高升的階梯，不喜歡留在同一公司太長時間，反觀 Monica，每份工作都是以數年計，她卻認為這才是深入了解一間公司的機會：「當你想喺一間公司擔當重要職位，要知道其實需要3-4年先可以了解晒一間公司，睇到間公司或者品牌嘅進步，了解公司喺市場上嘅優劣勢。再 Senior 啲嘅時候，仲要對其他部門有所認識，尤其是國際性公司，甚至除佐當地市場仲要了解公司喺全球嘅市場發展同定位，其實每一日都係學習緊，冇咩可能話一兩年就識晒啲嘢！」

Monica 提醒年輕人，

當找到一間適合長遠發展的公司，就不要輕易轉工，用足夠的時間了解公司，對升遷有絕對性的幫助。

專注現在 活在當下

有別於一般的成功人士，對職業生涯有著長遠的計劃和目標，Monica 竟說自己是一個「冇計劃」的人，「坦白講我唔係一個 well-planned 嘅人，我只係好專注做好現在，做好目前嘅工作，反而唔會諗太多計劃太多。職位同錢都唔係我最重要嘅推動力，我係真心鍾意工作上嘅滿足感，對工作有熱誠，例如做PR，搞到個成功嘅大型活動我會好開心，呢啲滿足感唔係錢可以滿足到！」由短短的專訪會談當中，也感受到 Monica 的友善和對工作的熱誠，對公關出身的她而言，能一步步爬上高層之路，熟練的社交手腕和人際關係圈子是助力吧！

最難搞是「辦公室政治」

職場上看似順風順水，Monica 自言最困難的不是工作，而是「辦公室政治」，「工作上最唔開心就係遇到唔太夾嘅老闆，試過有個老闆好著重辦公室政治，件事點樣去定啱定錯呢？咩都係佢話事，冇準則。工作上錯折、失敗一定會有，唯有當係訓練自己嘅機會，最緊要唔好對自己失去信心！」己所不欲，勿施於人，當 Monica 身在要職，她明白到團隊合作的重要性，作為一個 Team Leader，她的工作是要令其他人發揮得更加好，公司的發展並不是任何一個人的功勞。

為升職移居紐約 平衡生活節奏的契機

2019年，Monica 迎來事業上的另一高峰，由 Tiffany & Co.的香港區市場總監，晉升至全球市場總監，條件是由香港主場轉移至紐約生活和工作，面對八十多歲的父母，初時她也有猶豫，幸得父母支持，「佢哋成日話唔想成為仔女嘅負擔，你有你自己嘅人生，可以自由去選擇自己嘅路。」

由繁忙的香港轉到紐約工作，對 Monica 而言不只是工作，而是一個重大的生活轉變。在香港時，Monica 已醉心瑜伽練習十多年，她笑言在香港就只能捉緊 Lunch Hour 去練習，「每個同事都知道我Lunch Time 唔係趕食飯，係趕去做瑜伽！」對她而言，瑜伽不只是體能上的訓練，而是一個生活模式，令她找到工作以外的滿足感和生活樂趣。移居紐約，Monica 終於得到 Work Life Balance，考取她夢想中的瑜伽導師資格，現在 Monica 更是三間紐約瑜伽中心的兼職導師呢！

當然紐約嘅工作競爭性都好大，工作時間好長，都係8am-10pm 咁工作，但美國人好重視 Work Life Balance，講求生活上的平衡點，要喺高壓工作之下享受生活！

香港 vs. 紐約 職場大不同

一個人孤身到紐約工作，想必不是易事，緃在同一間公司升遷，由香港區辦公室到紐約總部，感覺當然不一樣，「去到紐約先發現，香港真係好細！只係世界上一個好細好細嘅 market！以前喺香港同事唔多，依家紐約同事多佐咁多，當然人事上會再複雜咗，件事係放大咗十倍！到真正嘅高層位置，先知道原來真係出外要靠人，成事要靠關係。」

Monica 曾在美國流學，對紐約尚算熟悉，重回舊地也不算很難適應，最不習慣竟然是天氣！她笑言自己最愛陽光，但美國冬天時間長，「呢邊11月到4月都係落雪，所以有時都要去旅行離開吓，長時間天氣咁凍，個人都好攰都唔舒服！」

回望過去 菱角漸減 成就平衡人生

工作上的名成利就，回望過去十年，Monica 覺得最大的改變是心境，「後生時當然好『好Chur』，咩都要做到最好，將自我放到好大，會追求最大最好最豪華、好多行內朋友、上雜誌會開心有滿足感。到咗依家呢個階段，呢一切都唔再重要，明白到唔需要人哋去認同自己嘅成功。依家只係想為自己、為公司做好件事，希望自己可以再開心啲、放棄多一啲自我，順其自然咁去搵返平衡點。」她謙虛說現在還未算是理想生活，但總算 On the Way！