杜如風拒靠父幹夠真性情獲網民大讚

杜如風 VS 梁芷珮 旅遊達人大對決

杜如風和梁芷珮近日分別在無綫和J2主持個人旅遊節目《解風大阪》與《北極潮什麼》。兩位旅遊達人的主持風格一直受到網民熱議，杜如風就被指太我行我素又港女；梁芷珮就頻頻製造公關災難，加上語速太快，令不少觀眾都指睇到頭都痛埋。最近，就有網民作出「杜如風vs梁芷珮」大對決，出乎意料之外，竟然大部分網民都留言力撐杜如風，更指其節目應該放81台，大家又點睇呢？

杜如風真性情夠好笑 獲讚有特色

「日本旅遊達人」杜如風（Helen）繼上次《解風東京》之後，今次再度為J2旅遊節目任主持，轉戰關西大阪主持《解風大阪》。有別於過往，今次節目播出之後，不少網民都留言大讚杜如風夠搞笑、夠爽直、主持風格有特色：「人人都一樣做主持，只有佢與眾不同，13點但係做嘢認真起來都好有水準，間唔中都爆吓啲金句 」、「其實我覺得佢講嘢好似癲癲得得，但有時會彈幾句詩或者好僻嘅詞語，文學水平應該有返咁上下」、「其實幾好呀，佢開心，我又睇得好開心」、「正所謂鹹魚白菜各有所愛，佢嘅旅遊節目係好有個人特色」、「最有風格女主持」等。

網民指大台風格反而拖杜如風後腿？

有網民更指出，更加喜歡剛出道的杜如風，認為當時用低預算拍節目的杜如風夠真又更加貼地，相反現在以大台方式拍旅遊節目，反而拖其後腿：「我覺得佢最好睇嘅係冇乜budget時期」、「佢拍嘅風行全世界，印象仲好深刻」、「佢呢種”拍法”，多資源反而無幫助，以前，風行東京真心好睇，因為用心share用心做。依家呢d ，係為做而做，唔係唔用心，但無左一開始果種初心。」

杜如風被指不停消費梁朝偉

雖然，今次杜如風《解風大阪》好評如潮，但今次杜如風就被指不停消費偶像梁朝偉，睇到觀眾都覺得煩。今次，杜如風於《解風大阪》中推介的校園主題 café時，以一身中學生打扮，喺節目中呼喚偶像梁朝偉，不少觀眾都指：「已經唔好笑，可唔可以唔好再睇梁朝偉」、「煩到喊」、「知道你鐘意梁朝偉喇」。杜如風由出道開始已經不停提及自己明戀梁朝偉，又指屋企擁有過百樣有梁朝偉親筆簽名的珍貴收藏。

杜如風家父背景超猛料 曾於比賽奪得全國冠軍入名校

現年48歲的杜如風，人生歷練十足。原來她大有來頭，媽媽盧佩貞是退休中學教師，爸爸是前嘉禾電影公司宣傳部經理杜惠東（杜Sir），在電影圈地位高，故她經常在片場出現。由於爸爸為雜誌翻譯日本娛樂資訊多年，令她通曉日語。她畢業於加拿大的麥馬士達大學，主要修讀城市規劃，副修日語，曾參與當地「在加國學生日本語演講比賽」，奪得全國冠軍，得到獎學金，更因此獲日本駐加國大使夫人賞識，推介她畢業後到東京的御茶水女子大學，主修日本文學，因此放棄多倫多大學的碩士課程。要知道御茶水女子大學是非常難入的名校，不少日本的傑出女性都是畢業於此。

杜如風拒做寫字樓要入娛圈 由低做起

學有所成後，杜如風曾做寫字樓工作，做過市場策劃，會在放午飯時回家睡午覺，然後在公司告示牌寫「Out meeting」（外出會議），相當搞笑，她坦言不適合做朝九晚五的工作，連媽媽都經常說她懶惰，不斷重複罵她。

她沒有利用爸爸的人脈成為大明星，反而獲爸爸向英皇電影推薦擔任日本電影的字幕翻譯，成為編劇學徒、電視台編劇、電影編劇，由低做起，不完全是「成功靠父幹」。她先後擔任過有線電視旅遊節目的資料撰稿員，有份參與電影的劇本創作。 2007年，她為無綫生活台拍攝《流行東京》而人氣急升；2009年，她和Now寬頻電視以主持外判合作形式，拍攝共三輯《風行全世界》和《風行全中國》的節目。整個節目由資料搜集，行程編排到訂機票、酒店及租車，全都是杜如風和導演二人處理，表現可謂獨當一面；2015年，穿著非常有個人風格的她更與好友成立時裝品牌FUNGOLIA。

之後，她拍攝過不少TVB旅遊節目如《流行首爾》、《東京攻略》、《関西攻略》、《九州攻略》和《北海道攻略》等，有時更添食，拍了不少番外篇，帶領觀眾遊走日本每個角落。

拍節目接爸爸噩耗仍頂硬上 自稱不孝女

杜如風爸爸杜惠東於2016年因腎衰竭逝世，享年75歲。與爸爸感情深厚的她，曾自稱不孝女，自爆當年接到爸爸噩耗仍頂硬上繼續拍攝節目。在節目《関西攻略》中，她剖白對爸爸的感受，表示爸爸一直都十分支持自已的工作，而且希望她能將正能量、快樂帶給觀眾：「由上次喺日本收到媽媽話Daddy病危，就即日返港。本身都計劃返香港一星期後再去日本拍，之後同媽媽商量咗就過去拍埋，唔好半途而廢，我諗Daddy都想我咁做。拍嗰時仲可以，個腦掛住對白，Focus拍攝。」 杜如風在鏡頭前仍然笑面迎人，但鏡頭捕捉到她眼睛爆微絲血管：「有晚瞓唔着，嚎哭咗一晚，爆微絲血管令到一邊眼紅到似紅眼症。基本上10集有五集都紅咗眼，但都要繼續拍。」可見她十分專業。

杜如風怨「臭朵」10年冇拖拍

除此之外，杜如風在活動中接受傳媒採訪時亦大呻自己身邊沒有追求者，而且已經持續10年沒有拍拖。杜如風表示自己單身多年，全因「世界級港女」的稱號，懷疑港女的臭朵令身邊的追求者都被嚇跑。她更自嘲自己很Dry，Dry到如海味一樣。她直言雖然自己已經單身10年，但絕對不會主動追求別人。她亦表示愛情應該要是寧缺莫濫，自己已經降低了擇偶要求，希望緣分會快點來臨。

坦承身邊沒有合適對象 鍾情於姊弟戀

當傳媒問道身邊的朋友為什麼不給她介紹對象的時候，杜如風表示，身邊的朋友都已經盡力介紹，已經介紹到冇朋友好介紹，但依然沒有合適的人選。杜如風一直鍾情姊弟戀，她曾多次在訪問中表示，她眾多戀情中只有兩段感情不是姊弟戀。她解釋自己之所以會鍾情於弟弟，是因為覺得年紀小的能夠明白她的想法，成熟的男生反而跟自己想法差異太大，難以溝通。

自稱從不花男友錢 求平反港女臭朵

「世界級港女」的臭朵令杜如風單身10年，令她非常困擾。她多次澄清自己毫不拜金，自己雖然喜歡購物，但所有東西都是由自己付錢，絕對不會要求男友付錢。而且，在和男友約會和去旅行的時候都是用AA制，所以希望傳媒大眾能夠趕緊為自己平反，不要再叫自己做「世界級港女」。

曾大曬自己有媽媽養 從來不需要養家

杜如風出身於小康之家，父親生前為電影公司經理，所以從來不需要擔心錢銀問題。她亦曾經於訪問中大曬自己從來不需要養家，自己只需要繳付自己的卡數就得。杜如風媽媽亦曾經心痛愛女工作辛苦，說假如杜如風不買衣服的話，自己是可以養杜如風一世！

梁芷珮語速出事 被封為「旅遊界容羨媛」

至於另一邊廂，梁芷珮就被網民留言鬧爆，網民都指其語速太快，加上把聲又唔好聽，每次睇其節目都會好頭痛：「鐘意如風多過梁芷珮，梁芷珮好嘈，成日有嘢上身咁」、「梁芷珮係旅遊界容羨媛，語速令人困擾」、「呢個女人好嘈，感覺極光會畀佢講到嚇走」、「佢好嘈，又做作，一見佢就覺得好煩」等。

梁芷珮變負評王 曾笑住同鯨魚屍體合照

梁芷珮每隔一段時間就會傳出醜聞。就好似早前同老公一起遠赴南極拍攝旅遊節目事後，曾經在南極遇上一條已經擱淺2個多月的鯨魚屍體。梁芷珮當時馬上與鯨魚屍體合照之餘，其老公又走近鯨魚，超仔細地拍下鯨魚屍體的每一部分，並且在社交網站上發文寫道：「係鯨魚…嘅屍體呀！擱淺左2個月左右，真係第一次咁樣睇到鯨魚咋。」

網友喪補：點解要咁開心仲笑得出

該發文一出，網民紛紛留言炮轟​​梁芷珮殘忍，留言：「其實點解要咁開心仲笑得出」、「點會笑得出，呢樣嘢即刻可以unfollow你」、「笑咩呢？」等。

被廣告商「劃清界線」 梁芷珮發千字文反擊網友：劏房都住過

此外，去年梁芷珮應廣告商邀請進行直播，惹來不少「反TVB」網民留言攻擊，廣告商亦因此與梁芷珮「劃清界線」，搞到梁芷珮發千字文回應網友！話說廣告商於2021年5月25日請了TVB藝人梁芷珮開直播，卻惹來不少「反TVB」網民留言攻擊。該廣告商上年11月已經找過梁芷珮直播宣傳一次，今次是第二次。不過該廣告商於去年已將梁芷珮「劃清界線」，將所有相關貼文及影片刪除。

面對被攻擊，梁芷珮發了千字文回應，她一開始提到感激一班支持她的粉絲：「首先我好想喺到多謝喜歡我，follow我嘅粉絲，一個普通嘅師奶仔可以儲到十幾萬粉絲，我已經好滿足，好開心，能夠有今日嘅成績，我真係好感恩，我係一個好勤力嘅人，因為我嘅人生唔係為我自己一個人而活，而係為咗屋企三個小朋友，我唔係來自一個有錢嘅家庭，20歳嫁咗人，老公當年亦都係一個普通嘅20歲o靚仔，當年啱啱加拿大返嚟，我哋冇靠屋企人，未搵到工又冇地方住，劏房都住過。」

梁芷珮：希望各位高抬貴手

最後，她提到希望各位高抬貴手：「好感恩呢幾年可以幫公司拍旅遊節目，多人認識咗，多咗好多KOL嘅工作，收入穩定咗，就可以比到更穩定嘅生活三位小朋友，我哋每日都好努力咁工作…希望各位高抬貴手，唔好因為我來自邊到，喺邊間公司做嘢而抹煞我嘅工作機會，我只係一個努力工作，賺錢養大仔女嘅媽媽，世界上每一個父母都係咁，你哋如果唔鍾意一樣嘢，其實真係可以唔睇或者直接block咗我，然後follow返你地喜歡嘅嘢，我個人好簡單，有嘢就做，有工就開，大家開心，簡簡單單就得㗎喇。」