試用無暇輕透底妝

May 3 2015

講到揀底妝真係一門學問，
剩係講質地同妝效都分為好幾種，
春夏就黎到， 好多朋友都問究竟搽濕粉定粉餅好？
其實無話用咩係最好， 最緊要係睇自己想要咩妝效。
今次就會同大家推介幾款粉底， 等大家有多樣選擇。

我自己係屬於混合性偏乾皮膚，
平時都鐘意用開濕粉＋遮瑕膏＋碎粉咁上妝，
但我都一定會袋個粉餅出街補下妝，
除左補妝，係趕時間唔想做咁多step時，
我就會用個粉餅印兩印上面就出門口。
我面上無乜凸起既瑕疵，
不過都有黑眼圈，色斑同鼻冀偏紅既問題，
我對粉餅既要求就係唔好太乾，
有中度遮瑕度就OK，
以下就試左幾款粉餅既效果比大家睇啦～

Maquillage dramatic powdery UV SPF25 PA++ （5種全新色調）
$300 /Compact; $120 /Case

由慕絲壓縮而成既粉狀粉底，
可以乾濕兩用， 能夠隱藏毛孔，均勻膚色同滋養肌膚，
而且持久度高， 有效持妝10小時。

我自己都買過幾款Maquillage既粉餅，
係我心目中除左佢地既粉盒係超靚之外，
粉餅遮瑕度都唔錯架！
今次呢款粉餅佢話由慕絲壓縮而成，
原本以為摸上去會淋淋地似mousse，
不過質感同普通粉餅無咩分別，
遮瑕度一樣係幾好，
斑同紅印上一層已經遮到，
不過粉感相對會厚啲，屬於中至高遮瑕度，
但又唔會太乾。
岩曬皮膚較多瑕疵既朋友。
均勻度：★★★☆☆
貼服度：★★★☆☆
遮瑕度：★★★★☆

滋潤度：★★★☆☆
透薄度：★★☆☆☆
幼滑度：★★★★☆

HR植物幹細胞再生精華兩用粉餅 SPF 30 PA+++ (6款色調）
$780/refill ; $300/case

HR呢款粉餅含有高濃度植物幹細胞精華，
可以淡化皺紋同瑕疵，自然遮蓋毛孔，
亦可以減少游離基對肌膚既影響，
化妝既同時亦有護膚效果。

HR呢款粉餅含有好多護膚成分，
當然用1,2次就未見到護膚效果啦，
我會著重睇即時既妝效多啲。
呢款粉餅搽出黎比較透薄自然，
粉感無咁重，都算幾貼服，
唔會覺得好乾好cake粉，
可以均勻到膚色，但遮瑕度未算好高，
紅印同黑圈位置要印多層就遮得較好。
如果想有完美底妝既同時又有護膚效果，
就可以試下呢款啦！
均勻度：★★★☆☆
貼服度：★★★★☆
遮瑕度：★★★☆☆
滋潤度：★★★☆☆
透薄度：★★★★☆
幼滑度：★★★☆☆

LANCOME blanc expert brightening compact foundation
SPF 35/PA+++( 7款色調）
＄370/refill ; $100/case
呢款粉餅含有全新光芒粒子，
可以有助折射光線， 令皮膚望上黎有自然既剔透感覺。
另外，亦含有可以吸收大量油分既莓果混合色素，
仲有防油同防水功效既珍珠岩， 可以令妝容長效貼服12小時。

呢款粉質都比較薄而幼細，
均勻膚色方面都OK，
但較深色既瑕疵都要印多兩層先遮到，
佢主打控油，
同埋感覺較乾爽，皮膚乾既朋友用前要做好保濕功夫，

比較岩一啲易出汗同油性肌膚使用。
均勻度：★★★★☆
貼服度：★★★☆☆
遮瑕度：★★★☆☆
滋潤度：★★☆☆☆
透薄度：★★★★☆
幼滑度：★★★☆☆

試完幾款乾既粉餅，
就試下霜狀既粉餅啦～
如果乾性肌嫌用粉餅太乾就可以用粉底霜，
一樣用粉卜印上全面就可以快速上妝，
感覺比粉餅更加滋潤！
以下就有兩個好推介～

Shu uemura the lightbulb oleo-pact foundation
SPF 25 PA+++ (16款色調）＄420

質地絲潤透薄，水潤有光澤，
可以達至6小時水潤，
12小時持久不變色效果。

原本以為佢係cream to powder質地，
不過原來上完面唔會變左粉狀，
會keep住有種岩岩好既滋潤感，潤得黎又唔會太痴笠笠，
感覺好似搽左薄濕粉咁～
而且真係超貼面，無乜粉感，
用黎扮無化妝就岩曬～
有少少自然光澤感覺，
唔會太matte，
遮瑕度都好OK，薄薄一層都夠遮，
懶起上黎遮瑕膏都可以skip，
係深色既眼圈同紅既地方印多層就攪掂，
想個妝keep耐啲on top加少少碎粉就更好。
佢仲有16隻色揀，總有一隻色同你perfect match。
均勻度：★★★★☆
貼服度：★★★★☆

遮瑕度：★★★★☆
滋潤度：★★★★☆
透薄度：★★★☆☆
幼滑度：★★★★☆

Paul & Joe gel foundation $320/refill ; $130/case (5款色調）
Paul & Joe 呢款gel foundation 基底含有80﹪水份，
可以係肌膚形成一層啫喱般既水凝薄膜，
有遮瑕效果之外，又可保持輕盈補濕。

呢款粉底既質地幾特別，原本望落去就似韓國氣墊粉咁，
但完全唔係果回事！
禁落去都覺得佢充滿左水份，
質地淋淋地，軟軟地～
有少少似mousse咁，
搽上去感覺就更加薄，又好貼面，
仲有中度遮瑕度，
所以令我都幾驚喜！
感覺就似之前sonia rykiel 出既豆腐粉底，
不過sonia rykiel已徹出香港，如果之前係佢地就粉絲就唔洗失望
可以試下用Paul & Joe呢款啦！
不過我揀呢個色深左dd，
大家記住揀色都最好去專櫃試上面就最好。
均勻度：★★★★☆
貼服度：★★★★★
遮瑕度：★★★☆☆