尋味首爾(1)
上星期同大家分享左我去首爾瘋買，
唔少同事朋友都話要托我買返幾件，
甚至叫我開網店，等我再考慮下啦～
今個星期就帶大家去首爾搵正野食，
講真，去到韓國求其揀一間都好食，
無論係cafe, pizza店, 或者韓食，
好少遇到啲好難食。
我今次有幾間心水推介，
黎緊去韓國既朋友可以bookmark低試試！
第一間要介紹既係甜品店，
食得太多韓野間唔中都要試下其他食物中和返，
如果唔係好快就食膩。
其實韓國都好流行食冰，
單單喺明洞就已經有成十幾廿間，
而我去既呢間好似台灣都有，
有時去到啲cafe食，生果又唔夠新鮮，
又甜到漏，冰又唔夠棉，
所以推介呢間既原因就係佢既新鮮芒果，
雖然都加左糖水，但味道好好。
呢間甜品店位於明洞，
佢既位置唔太難搵，就喺A-LAND附近。
行街行到攰就可以黎呢度休息下。
我地幾個order左幾款甜品，
其中有呢款芒果冰，
（另外仲有菠蘿冰揀，有成半個菠蘿架！）
特別既係佢上面有啲乾既cranberry，好有咬口，
加埋啲冰，甜甜酸酸，成個組合都好夾，
又唔會太甜，又有啲脆脆、煙韌，
好多種口感夾埋一齊，very good！
對比起台灣既棉棉冰，我覺得呢款好食好多，
台灣果啲加左糖漿，太甜，啲味太假，
我自己就麻麻啦～
隔離外果杯係紅豆冰，我自己就唔推介，
本身已經好甜，上面仲加埋cream，又甜又肥！
另外呢款窩夫超鬆化，
你地見到中間果個球其實唔係雪糕黎架，
係芋頭蓉！
（有其他配料揀，好似係芒果）
係咪估唔到呢，
呢個芋頭蓉唔會甜，入面仲有芋粒，
同埋隔離既雲尼拿雪糕一齊食，味道好夾，
好腍身，好好食！
我已經唔記得食左幾多錢，
不過喺得明洞都唔會貴，
喺明洞，價錢唔係考慮因素，
最緊要好食！
我地入到去，發覺呢度既擺設好特別，
有好多唔同包裝既可口可樂樽，
有啲display corner，
仲有啲相架、道具比你影相用，都幾得意。
我好欣賞呢邊地方既裝修，
就算未必係好豪華，
但每度都會有個主題，
係同朋友聚腳既好地方～
等緊野食既時候望到廚房果邊既大火爐，
佢地係用大火爐去焗pizza，有好多唔同款式。
我地就揀左呢個雙拼pizza，
兩邊都係蕃茄汁底，茄汁個味好好，
一邊topping主打芝士，
唔知點解韓國邊度都好多芝士野，
但係又唔漏，味道好好。
另一邊topping主打薄切火腿，
一樣都好好食，唔會韌，
個皮好鬆脆，皮邊唔硬，餅底薄，料唔會過多，
就算叫左意粉再食埋呢個都唔會太full，
4個女仔share，每人兩塊就最好～
平時點carbonara都會驚味道太濃太漏，
但呢個味道好好，醬汁唔會太濃味又唔杰身，
扁意粉又煮得岩岩好，軟硬適中，
平時太漏都未必可以食晒一碟，
裡面係菇菌類，好香～
我自己好鍾意食肉醬意粉，
平時都會自己落廚煮下，
對肉醬意粉可以話係好有研究，
呢一款醬汁帶酸味，遮過左肉味，
味道太勁，如果唔鍾意酸就未必岩喇，
佢既意粉就一樣都好ok，
但個汁方面真係有待改進。
呢間西餐廳我極力推介！
位於惠化站附近，有個好大既休憩地方，
喺大空地轉入內街就會見到，
只要見到呢個THEATRE就會搵到餐廳位置，
側邊有個牌，再上樓就到～
如果想exactly知道個地點，可以上網睇下。
開頭望入去見到無人仲以為close左，
可能係呢個時段無咩人黎，
成間餐廳都好舒服！
一睇就知，啲裝修又係我杯茶～
見到佢牆上有啲相話拍過韓劇，
不過我好少睇，所以都唔知係邊套。
唔好睇呢度好似好high end咁，
其實啲野食都唔貴架，
頭盤range 9,000至14,000won，
碟碟都好大碟，好抵食。
我地點左沙律同一款頭盤，
兩款都好好食。
呢款就多啲唔同既菜，煙肉，必食！
頭盤芝士蓄茄上面有水牛芝士，
芝士味唔濃，配新鮮蕃茄，味道好好，
沙律菜上面有啲杏仁片，好有咬口，
加埋醋，呢個配搭係好好食！！
最後我包辦晒成碟，仲好想再encore～
呢度既意粉都係大約10,000won，
pizza最貴都係16,000won，
我地幾個穩陣派，都係揀左啲平時揀開既款式。
呢個白汁意粉都好好食，唔膩，
因為我地團入面有人唔食茄汁就點左呢個，
佢既材料多，味道穩陣，一般人都較易接受，
唔係太正宗既做法反而好ok，
因為有時太正宗意大利野唔係好岩亞洲人口味。
呢個pizza真係估唔到咁好食！！
唔知大家見唔見到其實仲有一小碟汁係用黎伴黎食，
我諗都無人估到係蜜糖！
勁好食，好好味！
真係未食過加蜜糖呢個食法，
批面係青蘋果，中間係芝士餡料，加上清甜既蜜糖，
酸酸甜甜，好味到爆燈！
仲有個餅底係好似印度薄餅咁，煙煙韌韌，
呢款係韓國model介紹一定要試，
初時都半信半疑，原來真係好好食。
韓國成日都有新野，
今次就因為有朋友介紹，
抽左啲時間去左貨櫃商場COMMON GROUND朝聖，
(地址: 首爾廣津區紫陽洞17-1，「建大」地下鐵站6號出口)
如果你問我使唔使去，我就答一定唔使！
初時以為呢度好大，但比想像中細，
Zone 1 係男仔野，Zone 2-3先係女仔野，
仲唔超過50間，好少！
我覺得無咩野睇，食下野都ok既，
呢度女仔衫好多都係大路款，無咩特別，
去梨大、弘大都搵到。
男仔衫款反而多啲，隔離街都多sporty野，
同男仔朋友一齊就可以黎行下，
如果成班女仔真係唔太建議，
另外就係一個新既化妝品牌－moonshot，
喺度行行下見到佢地既妝相廣告，
model既誇張彩色眼影吸引左我去睇，
後來先知呢個品牌係由YG Entertainment創立。
佢地啲化妝品包裝好簡潔，好容易睇到入面既顏色。
我就試左呢張相前面果款balm狀的foundation，
上手後有冰涼感，遮瑕度高，感覺幾好，
夠貼面，帶微令身效果，
價錢42,000won，唔算好貴，推介大家去試下！
仲有後面果款枝裝foundation，效果都好ok！
gel狀eye shadow其實都有日本品牌出過，
我鍾意個質地，又夠實色、唔易溶，
呢度有好多隻顏色，而我自己就買左呢款啡紅色。
今次就分享到呢度，
如果想睇多啲我去韓國旅行既分享
就記得留意住啦～
如欲取得更多第一手美容及扮靚資訊
可瀏覽Girls Talk Main Blog：
www.girlstalk.hk/blogs
或 Like我們的Facebook專頁：
www.facebook.com/janicelammakeup
