王賢誌 同志

王賢誌家世顯赫!公開出櫃搞男男綜藝撐同志:真心相愛唔需要分性別

娛樂資訊

廣告

顯赫世家出生的王賢誌自2016年和圈外男友結婚後一直過著甜蜜生活,而他更毫不避諱公開談論同志話題,更曾經出席節目受訪表示,剖白自己出櫃等心路歷程,更坦言性別並非一大障礙:「真心相愛唔需要分性別」。

王賢誌無懼性別公開出櫃結婚「真心相愛無分性別」

中學時期已經移居加拿大的王賢誌,回流返港後先後加入TVB和亞視,並經常被指派到節目做主持,不但節目受歡迎,更令他成為炙手可熱的節目司儀。除了演員和司儀的工作外,王賢誌更涉足商界,更成為東華三院主席,現時更成為家族企業王氏港建執行董事。

王賢誌 同志
(圖片來源:[email protected]

出身顯赫之家

今年51歲的王賢誌出身富貴,爺爺是王氏港建的主席兼創辦人、父親王忠桐則是現任主席同樣也是東華三院前主席,家族身家至少30億,絕對稱得上是富貴人家。而年輕時他更移居加拿大,於當地大學畢業後曾在華人電台工作,後來才回流返港。

王賢誌 同志
(圖片來源:[email protected]

親戚多知名人士

除了顯赫家世,王賢誌更擁有眾多知名親戚,當中要數最為人認識的一定是視帝鄭嘉穎,他是王賢誌的表哥,兩人的爺爺和外婆是親兄妹。向海嵐則是其母親的表妹、妹夫則是藝人周勵淇和名模周汶錡的表兄弟,可以說不少親戚都投身於演藝界。

多次遭質疑同志身份 終出櫃兼結婚

王賢誌入行後多次被媒體拍到出入同性戀酒吧的照片,因此遭外界懷疑其為同志,但他都一向少理。直到2013年,他在香港電台同志節目《自己人》承認同志身份,更於2016年和交往7年的男友在加拿大溫哥華結婚。

王賢誌 同志 2016年和交往7年的男友在加拿大溫哥華結婚。
2016年和交往7年的男友在加拿大溫哥華結婚。(圖片來源:[email protected]

曾遭侮辱同志身份 回應獲讚高EQ

今年1月,王賢誌的母親離世,他於社交平台上發文悼念亡母,許多網民紛紛表示節哀順變之際,卻被一網民攻擊他同志身份,質疑其父母沒有教導好子女,更諷刺表示:「如果生到孝順嘅仔女正常結婚生仔令到父母開心,一般都會長壽好多。」令網民眾怒。不過,王賢誌雲淡風輕表示:「人的一生不在乎有多長壽而在乎活得有多精彩及有何意義,仔女是否孝順亦不在乎是否有結婚生仔令父母開心,似乎誰的理解能力比較清楚,誰的思想比較正常一點,顯而易見,祝安好!」令網民們稱聲拍手叫好。

王賢誌 同志
(圖片來源:[email protected]

王賢誌結婚 感激屋企人支持

鄭:幾時知自己喜歡同性?

王:其實由細到大都應該好清楚,唔好講性取向,鍾意食啲乜嘢、着咩顏色嘅衫,冇人比自己更清楚,呢樣嘢好細個已經好肯定,只不過係幾時可以同人講、同人分享。我哋個年代唔似依家新一代咁幸運、咁open,喺我二十幾歲最青春、人哋拍得最多拖嘅階段,我其實就冇,我成日同人講Kevin係我第一個,呢個係事實。

鄭:幾時向家人出櫃?

王:應該係十幾年前,當時因為自己有其他生活上唔開心嘅嘢,講真大家喺同一個屋簷下生活咗咁耐,邊個趷起條尾都知咩事,我嗰次唔係好理性,將自己唔開心嘅嘢一次過講晒,對佢哋嚟講又唔係超級surprise,大家都估到,爭在未confirm,同埋我講完之後都冇分別,冇拍拖、冇識到任何人,繼續好努力做緊電視台,所以有個好大嘅緩衝期。

鄭:最初屋企人有冇反對?

王:唔係反對,佢哋可能會同我研究,係咪真係唔得呀?當然唔係一講就接受,但又未去到大家想像電視劇情節好激烈、喊苦喊忽呼天搶地,我好感激我屋企人,無論工作任何嘢,如果冇佢哋支持根本做唔到。

王賢誌 同志 仔仔一堂 王賢誌 老公 plt 節目《仔仔一堂》英文名 Boyscation,早在今年5月開拍,王贀誌強調唔係「自肥」,希望帶出正面訊息。
節目《仔仔一堂》英文名 Boyscation,早在今年5月開拍,王贀誌強調唔係「自肥」,希望帶出正面訊息。(圖片來源:[email protected]

王賢誌以為自己會孤獨終老

鄭:感情路上有冇遇過因為你係藝人或者有錢而接近你嘅人?

王:冇喎!我成日以為自己會係孤獨終老,喺我身上冇乜桃花,又或者我太自我、太鍾意自己,尤其初初做藝人,好顧自己形象、着咩衫,好投入做電視台工作,嗰時我真係日日有嘢做,做音樂節目、K-100,有嘢做已經好開心,冇諗其他,甚至逢係大時大節一定要做嘢,覺得都好吖,橫豎我冇拖拍,唔使諗節目。

大剖白!王賢誌與Kevin相識經過

鄭:同Kevin點識?

王:我成日都講好刻意經營,好想遇到理想對象,往往諗得太多,有時誤打誤撞反而遇到。我開始好active想識人係07至09年,我成日夜蒲,亦都係離開TVB,眼界擴闊得好快嘅一個階段,嗰個階段遇到啲人覺得OK、有興趣,點知人哋對我冇興趣,嗰時覺得冇咁多顧慮,點解都識唔到人呢?直至09年一個party場合,朋友介紹識咗Kevin,識嗰晚大家非常之有好感,全晚旁若無人傾偈傾成晚,第二日我同屋企人去旅行,同佢冇聯絡,都諗住又係另一段霧水情緣,點知返嚟大家都好想搵對方,同一時間收到訊息約出嚟,佢本身係澳門人、住澳門,跟住嗰一、兩個禮拜好頻密嚟香港見,好快就開始。

鄭:鍾意Kevin啲咩?

王:識得嘅第一晚一定因為外形,我識佢嗰時佢係長頭髮、戴粗框眼鏡不修邊幅,我好記得嗰晚我全晚同佢傾偈,已經好多人喺度藐,覺得我點會有興趣,我唔知點解覺得佢有種魔力,覺得呢個人就係,佢亦因為我有好多改變,譬如我同佢講覺得佢頭髮好長,佢好快為我特登剪短頭髮,唔好話我改變佢形象,但我覺得係互相影響對方。初頭外形當然吸引,但之後係佢嘅性格,我同佢性格好唔同,我鍾意fashion扮靚,佢麻麻哋,聽歌睇戲口味都唔同,佢煮嘢食好叻,我係唔識煮嘢食,佢好鍾意種植,有段時間鍾意皮具,自己整背囊,鍾意咖啡又會上堂學,每次有興趣嘅嘢會好投入,投入到可以教人,我係幾欣賞,大家可以互補長短。

王賢誌 同志 仔仔一堂 王賢誌 老公 plt 王賢誌表示自己同另一半性格好唔同,「我鍾意fashion扮靚,佢麻麻哋,聽歌睇戲口味都唔同,佢煮嘢食好叻。」
王賢誌表示自己同另一半性格好唔同,「我鍾意fashion扮靚,佢麻麻哋,聽歌睇戲口味都唔同,佢煮嘢食好叻。」(圖片來源:王賢誌提供 )

感激爹哋出席婚禮 勝過任何解釋

鄭:幾時同點解決定結婚?

王:今年我哋同屋企人一齊去旅行,會經加拿大,我諗既然一齊去加拿大,不如結婚咯,我一講,佢覺得OK,好唔romantic、冇求婚、冇戒指、冇跪地、冇花,係覺得啱timing就做,過兩日就同屋企人講,屋企人支持,我哋先同某啲朋友講,開始book地方。結婚呢個念頭以前有諗過,最熱戀嘅時候一定有諗,但唔會去做,因為太快,屋企人未認識得對方咁深,經過七年我覺得係幾啱嘅timing。

鄭:大家見到你爹哋出席婚禮好感動,佢係咩心態?

王:佢咩心態你要直接問佢,我都好感激我屋企人,我爹哋媽咪、我兩個妹,仲有Kevin屋企人,佢哋中間當然有啲猶豫位未必好明白,都有問「你哋都一齊生活咁耐點解要結婚?」我咪解釋,一男一女點解要結婚,有時未必為生仔女,係為咗承諾、肯定、責任,我講完佢哋覺得都係嘅,中間冇好大嘅衝突,但話完全冇咩?又唔係,我諗最好嘅解釋係有七年嘅時間做後盾,佢哋識得Kevin七年,有七年嘅時間令大家認識得好深,勝過我任何嘅解釋。

王賢誌 同志 仔仔一堂 王賢誌 老公 plt 今年初王賢詩分享舊照,當中包括首次出席東華的回憶:「老豆做東華,跟佢去見識,掹車邊參加人生首個ball。」
今年初王賢詩分享舊照,當中包括首次出席東華的回憶:「老豆做東華,跟佢去見識,掹車邊參加人生首個ball。」(圖片來源:[email protected]
王賢誌 同志 仔仔一堂 王賢誌 老公 plt 王賢誌獲邀成為「國際不再恐同日」大使。
王賢誌獲邀成為「國際不再恐同日」大使。(圖片來源:[email protected]

婚後生活如常 老公Kevin人氣急升自覺有使命

鄭:作為同性結婚而又公開嘅香港藝人第一人,你覺得外間對你結婚反應點?

王:我哋冇改變到生活方式,譬如今朝我哋一樣落樓下食早餐同去超級市場買嘢,我覺得多人望咗,望完就細細聲講嘢。我覺得今次傳媒報道幾positive,始終係一件開心事,某程度上我哋都咁光明正大,其實亦都冇咩衰嘢俾大家寫,傳媒都好幫忙,識我嘅朋友個個都好開心、好支持,但亦都肯定出面有人會覺得我太誇張、太極端,呢一刻我唔會去諗太多人嘅諗法,因為冇辦法satisfied所有人嘅意見。

鄭:呢件事Kevin都紅咗,佢習慣咗傳媒嘅注意力未?

王:如果我遇到一個人,係香港土生土長大,我未必可以同佢行咁遠,第一,佢知我係邊個,第二,佢嘅思想、眼界又唔同Kevin咁,我認識Kevin嘅時候,佢完全唔知我係邊個,佢喺L.A.睇電視都唔會睇到我啲節目,所以我哋開頭嘅交往係舒服,佢又好open,朋友都知佢性取向,喺朋友面前唔需要掩飾,大家相處更舒服,今次公開之前都有同佢商量,佢都好支持,某程度我哋有個使命,唔係要鼓勵或者教育大家,我覺得既然真心相愛,其實唔需要分大家係咩性別,timing適合結婚,大家都應該送上祝福。

王賢誌 同志 仔仔一堂 王賢誌 老公 plt 二人月前對訪東京,於銀座打卡,是接近三年來的首次外遊。
二人月前到訪東京,於銀座打卡,是接近三年來的首次外遊。(圖片來源:[email protected]

長子王賢誌坦言 冇傳宗接代壓力

鄭:想要小朋友?

王:其實我年紀唔細(受訪時45歲),呢樣嘢真係要好小心考慮,唔係為咗呢刻想有而有,因為係一件好長遠嘅事,如果我六、七十歲佢先至啱啱讀完書,我驚個距離太遠。

鄭:你係獨子,冇傳宗接代壓力?

王:冇呢個壓力,我唔會因為呢個壓力而做呢樣嘢,而我屋企人亦都冇呢方面嘅壓力俾我。

鄭:結婚爸爸有冇送層樓俾你?

王:冇喎!所以我話唔有錢囉!

鄭:你介唔介意人話經濟上要照顧Kevin?

王:冇人話過,同埋佢都有自己工作能力,有好多唔同嘅興趣,某程度如果我做佢做嘅嘢,我冇佢咁叻㖭!

鄭:佢依家嘅工作係咖啡師?

王:佢嚟緊會有新嘅工作安排。

鄭:會唔會安排佢幫你手做生意?

王:咁又唔會,佢冇興趣呢方面。我哋性格好唔同,先可以互補長短,如果大家做埋同一樣嘢,會更加多機會有衝突。而且由朝到晚一齊,會冇咁多嘢share。

鄭:七年感情生活裏面,有冇咩高低起跌?

王:我諗每pair情侶都有好多經歷,過咗熱戀期,開始冇以前咁大忍讓或者犧牲,過咗就要面對現實,同埋七年之癢都有啲道理,啱啱上一、兩年,我哋有啲磨擦,生活上嘅嘢無啦啦可以發到好大,當然未去到好危險嘅地步,如果好早結婚反而未必捱到,但因為經過咁多up and down再做呢件事,反而令大家更有信心。

王賢誌 同志 仔仔一堂 王賢誌 老公 plt 二人非常合拍,不時放閃。
二人非常合拍,不時放閃。(圖片來源:[email protected]

鄭:咁多年有冇其他引誘?

王:我都話自己唔係好多桃花,咁難得先有一個,不過我未拍拖之前,真係冇乜人對我有興趣,我又唔係咁容易遇到啱,啱啱拍拖一、兩年,突然多咗好多人對我有興趣,最大引誘嗰一、 兩年,但最熱戀亦都係一、兩年,所以任何人都唔會俾我睇得上眼。

鄭:咁多年嚟出街有冇拖手或者親熱?

王:喺外國有,香港冇,始終係人都認得我,同埋又唔需要咁刻意咁做,喺屋企都可以,使咩喺街拖手俾人睇。依家都唔會因為結咗婚係人都知而做,最緊要自己舒服。

娛圈生涯漫長

鄭:講番你喺娛樂圈嘅日子,事業有冇高低潮?

王:唔算高、低潮,一路都平穩向上,但時間好長、好慢,我喺TVB十三年,開頭真係由茄哩啡開始做,之後做半夜音樂節目主持,到做黃金時間K-100、旅遊特輯主持、大騷、拍劇,過程係好漫長,到我已經三十幾歲,我唔知到四、五十歲先至去到咩位,值唔值得再等落去呢?同埋電視台嘅變化太大,好多嘢自己控制唔到,所以選擇離開。諗番轉頭,如果當日我冇放棄,我未必得到感情,電視台話我聽幾時返工、明日要拍乜、下個月飛去邊,因為我連自己嘅時間都控制唔到,到離開咗TVB,我可以控制番自己時間,鍾意做乜就做乜,同其他電視台合作都係佢哋就我,唔使我就佢哋,我有好多空間同時間發展我其他嘅嘢,做生意、東華(東華三院第二副主席),可以好認真去拍拖,有得有失,相輔相成。

鄭:有錢人做娛樂圈,會唔會好多冷言冷語?

王:依家唔係,以前係,我要澄清我唔係好有錢,我住九龍,唔係住香港,我冇私人保鑣、私人飛機,出入有時自己揸車,有錢極有限啦,我屋企環境唔係差,九十年代入TVB有司機送返工,當時只不過係做茄哩啡係誇張嘅,當然會惹嚟好多閒言閒語,啲人覺得我係咪入嚟玩,嗰時唔知我性取向,會覺得係咪嚟媾女、想出名,亦都好慶幸我自己好鍾意做娛樂圈,經過好多年,我嘅表現,無論觀眾與幕後,有個認同。

鄭:仲嚮往幕前演出?

王:有機會我會做,但依家我會識揀有啲咩係啱我做或者應該做。

鄭:結婚有通知表哥鄭嘉穎、表姨向海嵐?

王:有同佢哋講咗聲,表哥可能好忙,忙緊拍劇、拍拖,表姨我最近同佢食過飯,但我結婚嗰日佢要開戲嚟唔到。

影片:王贀誌剖白同性婚姻

鄭紹康專訪後記:一世好朋友

在溫哥華讀書的時代已經認識王賢誌,轉眼已經20多年,想不到第一次跟他做訪問,正是他剛剛和Kevin結婚後第一個專訪。我和Vinci並不是每晚煲電話粥的那類好知己,然而,大家的思想頻道確有類似的地方,畢業後也在這娛樂和社交圈內發展,有些時候我們會一起研究一下應該如何處理人際關係、事情和新聞,亦有些時候會來個意外驚喜,甚至殺大家一個措手不及。想深一層,人生的確需要這樣角色的人在身邊,互相提點加些良性競爭,這樣才真真正正是知己知彼,百戰百勝的一世好朋友,再次恭喜Vinci和Kevin!

王賢誌 同志 仔仔一堂 王賢誌 老公 plt 鄭紹康Francis),有名「天下第一關」,知名公關公司天機掌舵人,亞洲女首富何超瓊愛將,富豪名人天王天后知心閨密。為本刊主持欄目【星惜天下】,道盡娛圈名流秘聞軼事。
鄭紹康(Francis),有名「天下第一關」,知名公關公司天機掌舵人,亞洲女首富何超瓊愛將,富豪名人天王天后知心閨密。為本刊主持欄目【星惜天下】,道盡娛圈名流秘聞軼事。(圖片來源:新傳媒照片庫)

常見問題

有什麼Netflix、Disney+推薦及必睇劇集?

為大家整理一下截至目前為止小編追過的Netflix影集清單,必睇Netflix電影或劇集片單;而Netflix上有不少美劇都被稱為神劇,小編整合了一系列必看美劇推介。當然,不少得韓劇BL劇推薦。Disney+方面,則可以一看電影片單推介

有什麼必知演唱會購票資訊?

眾多歌星準備開演唱會,整合2023年演唱會購票資訊,本地歌手包括黃妍許冠傑鄭欣宜。外地方面,包括周杰倫周興哲五堅情五月天八三夭林俊傑NCT DREAM。情人節禮物相當苦惱?編輯精選出不同類型的實用情人節禮物之選,包括女朋友篇男朋友篇。而為另一半送上朱古力禮盒或自製朱古力也是不錯的選擇,10大朱古力牌子推介。單身的你想要求姻緣,則可到香港各區最靈「求姻緣」寺廟

圖片來源:新傳媒照片庫、[email protected][email protected]_official、[email protected][email protected]、王賢誌提供

你可能也喜歡