凍

凍 返唔駛驚 跟韓、鬼妹五招防寒術同步過「 凍 」

鞋履

Text | Candy Choy

今個冬天天氣真係玩死人,時 凍 時熱,搞到人成日企喺衣櫃面前發呆,完全唔知着咩衫好!呢個星期尾又話 凍 返啦喎,唔想又着到成隻糉咁可以點?眼見歐洲、韓國呢啲成日跌到零下幾度嘅國家,啲女仔好似唔怕凍咁仲係露晒腿、着薄褸,不要去羨慕,不要去妒忌,其實佢地都係有啲暗招啫!

1. 地獄打底王
唔想着得太臃腫,就要無限打底。Heat-Tech 類型嘅貼身保暖打底可以打孖上不突止,絲襪也可以打孖!因為光發熱嘅設計,太陽光通過絲襪纖維轉化成熱能,自然更保暖!另外,韓妹驟眼睇好似就咁露腿,其實佢地係着咗透膚絲襪咋。想再暖啲,襪褲就更加暖,尤其係今年咁興闊褲,着喺褲入面完全唔覺又夠暖!如果唔想着黑絲,仲可以搵針織打底短褲,着喺短裙內,保護住肚仔同大脾,就算對腳光脫脫都唔覺 凍 。

2.暖貼要貼中
暖貼係怕凍人士嘅恩物,但好多人都會因為心急,一拆開就貼喺身,梗係唔夠暖啦!要夠暖,要首先輕輕捽下佢,等暖貼內嘅鐵粉、催化劑可以同空氣接觸,慢慢發熱。暖貼分貼身同貼衣物兩種,貼衣物款,應該貼喺第二層衣物嘅上面,保持暖貼同皮膚嘅距離,貼身款就應盡量揀溫度唔超過58度的,以免燙傷。

想暖貼發揮最大功效,就要貼啱位!想背部暖,要貼喺bra扣上面嘅背部,呢個範圍可以將溫暖傳至整個肩背位。

想四肢夠暖,應該貼近關節位,如果要着低腰褲、短袖衫,可以貼喺腰後。

足部專用暖貼當然係貼喺腳底,但如果你得普通暖貼又想貼腳,就應該貼腳背而唔係腳底,以免受壓燙傷腳底。

 

3.封實頭頸手
人其實最緊要將最常外露嘅部分保持溫暖就唔怕 凍 ,所以一條厚厚嘅頸巾,或者樽領衫,其實比你着幾件衫嚟得更暖,再加埋冷帽、絨帽「焗住」個頭,戴埋手套,就冇機會入風,自然可以唔駛着太多衫都可以保暖!

4.有內膽大褸
韓牌好多大褸其實都愛加入毛毛、夾棉嘅內膽,所以大褸睇起上嚟好似好薄,但其實好保暖,有咗內膽,又唔駛着厚衫,就算幾怕凍 ,加兩件打底衫嘅話,就算你着短袖都唔會「雪雪雪~」啦!

另外,仲可以搵oversized 嘅褸或者衛衣,內裡加完打底底衫,仲可以加多件細size嘅羽絨背心喺衛衣入面,連褸都慳返唔駛着,又或者直接着多件薄身長袖羽絨喺褸入面,打晒底仍然神不知鬼不覺,呢招咪高囉!

5.塗保暖藥膏
鬼妹唔係唔怕 凍 ,係有用一樣你諗唔到嘅武器啫!其實佢地之所以可以露腿,全因用上一種名為Warm Embrocation嘅藥膏,呢種藥膏係本來用喺戶外踩單車嘅時候,用嚟防寒,塗上就好似有層保護膜咁!呢隻藥膏,係可以塗四肢,不過據聞都幾熱,喺香港應該唔駛用到佢嘅,去其他寒冷地區就可以諗諗!

上身打好底保暖,其實光住雙腳都係捱得住嘅。

 

competitvecyclist.com 入面有好幾款Warm Embrocation,計返港幣$150左右,都抵玩。

 

延伸閱讀:
▲ 女星示範!冷帽造型減齡法 http://goo.gl/T68YNM
▲ 皮草以外…… 保暖抗寒時尚穿搭 http://goo.gl/cYIRLC

如欲率先接收資訊,請讚好我們的FB專頁並於「已讚好」選單設定「搶先看」,多謝支持。
More Facebook:https://www.facebook.com/morehk.hk

你可能也喜歡