「 奶酪陷阱 」狗毛女 VS 時尚靚女 鬥呃男神like?

Text｜ Candy Choy

最近人氣爆燈的新韓劇「 奶酪陷阱 」之所以能夠引劇迷跌入煲劇陷阱，除咗係因為有靚仔暖男朴海鎮、徐康俊同南柱赫外，其實女主角、配角的「反差萌」亦是另一賣點！女主角「洪雪」金高恩絕對唔屬於美女系，梳「狗毛」鬈髮，又唔多打扮，但就令朴海鎮、徐康俊爭女之餘，仲俾痴線男同學跟蹤，反而配角「白仁荷」李聖經有樣有身材都冇人要，究竟咁平凡嘅洪雪點解會撼贏靚女白仁荷？

人氣狗毛頭？

當你覺得洪雪個髮型簡直娘爆，其實依家呢個「狗毛頭」之前「她很漂亮」女主角黃正音、少時嘅泰妍都梳過，呢個鬆鬆散散嘅大鬈髮，竟然煲起咗！就連劇入面係洪雪「粉絲」的女同學都要抄足佢嘅狗毛頭，不過睇睇吓唔知點解又同佢個單眼皮呆萌樣幾夾，加埋徐康俊成日叫佢做「狗毛」，係愈望愈cute嘅。不過勸各位想試狗毛頭嘅，梳前短蔭嘅千奇唔好電埋，因為冇呆萌嘅氣質的話，係好易出事嘅，你懂的。

她很漂亮嘅黃正音呢個爆炸頭其實都幾似掃把頭。

少時泰妍呢個白金髮狗毛頭算係最靚。

劇入面抄洪雪狗毛頭嘅孫敏秀（尹智媛）都cute。

韓模Jae Seo Lee都有梳狗毛頭，但又係前蔭出錯。唔…

白仁荷嘅髮型其實冇問題，仲要係而家興緊嘅two tone色，夠時尚，但其實男人唔太鐘意女人染到個髮色太浮誇，加埋佢個癲喪性格，就算有靚樣，但成個惡女咁嚇死仔仔。所以呢個回合，洪雪以狗毛頭勝白仁荷！

Next Page > 便服又贏靚衫？

簡約法式服VS華麗時尚服

洪雪嘅服飾雖然看似普通，但其實簡簡單單都幾配合佢嘅個性，相反shopaholic嘅白仁荷完全係「來自星星的你」千頌伊嘅翻版，大量名牌又搶眼嘅時尚服飾，不過呢個回合算打和，因為本身李聖經係model又係潮流icon，個樣同身形真係襯絕呢類時尚造型，大家各自carry到啱自己嘅style。不過論討好度，學長柳正知道白仁荷係大駛怪，所以對佢極反感，所以呢，想男神欣賞你，可能要考你襯衫技巧喇，唔係花枝招展就係靚嘅，識襯衫嘅，平嘢都可以襯得靚嘅。

間條衫襯牛仔長裙，有文青feel，條裙其實係以創意、趣味喺London Fashion Week一炮而紅嘅韓牌Steve J & Yoni P，洪雪暗地裡都潮㗎。

橙黃色冷衫係出自法牌Claudie Pierlot，襯爛牛簡單不造作，睇到學長眼定定。

好友幫洪雪扮靚靚果幕，條粉藍色連身裙係來自韓牌Debb，韓國後生女好buy呢個品牌，幾有少女味！

白仁荷嘅衫係李聖經自己代言嘅韓牌LAP，做得代言，衫一定襯絕，再加埋個Roger Vivier袋、人氣長耳環，時尚爆燈。

呢套粉紅色twin set，加金銀飾物就土豪咗啲喇。

Next Page> 真身邊個吸引啲？

金高恩依家係梳中短髮，加埋淡淡嘅妝容，其實幾有氣質兼有型。24歲嘅佢今次係第一次拍劇，不過之前係拍開戲，仲拎過唔少新人獎，今次喺奶酪陷阱首次做女主角，套劇又受歡迎，今年大有機會升呢做人氣韓星！

身高176cm，係YG人氣model的李聖經，電視劇代表作有「沒關係，是愛情啊」，加上靚樣同高佻身形，常被邀請行show、睇show，劇裡劇外都好fashionable！唔講唔知佢原來仲識唱歌，上年參加咗《蒙面歌王》，仲透露7歲已經開始彈琴，咁有才華，今個回合我buy佢喇！

卸下白仁荷嘅花枝招展樣，李聖經平日嘅造型都幾清秀可愛。