張寶兒親自設計婚紗、岑麗香透視婚紗仙氣滿分！11對閃爆溫馨藝人婚照回顧

原文刊登於：東方新地｜圖片來源：東方新地

11對閃爆溫馨藝人婚照回顧

蕭正楠 黃翠如

18年偷偷哋旅行結婚，19年蕭正楠、黃翠如呢一對突然發布婚照，原來已經喺峇里島補辦婚禮。陽光海灘藍天加鮮花，襯晒呢對簡約又真性情的兩口子。

袁偉豪 張寶兒

去年求婚、年初置埋6,000萬新居，本來話等疫情過後再安排婚禮，袁偉豪同張寶兒呢對最後都係等唔切，終於上月喺新居會所舉行簡單而溫馨嘅小型婚禮。新娘子張寶兒一身透視婚紗係自己設計，貴氣得嚟盡顯好身材。

楊茜堯 羅子溢

16年楊怡（現名楊茜堯）同羅仲謙（現名羅子溢）先在英國註冊結婚影埋婚照，再回港舉辦婚禮大宴親朋好友。喺英國古堡影婚照仲出埋白馬車，十足浪漫童話。

鍾嘉欣

當年正值事業巔峰，鍾嘉欣突然傳出喜訊，返加拿大嫁畀相識僅十個月、年齡相差十三歲嘅脊醫 Jeremy。天性乖巧，純過蒸餾水，鍾嘉欣嘅婚照都係純樸得嚟夠晒傳統。

苟芸慧

曾經因病體重暴增至160磅，好彩婚前搵到暴肥根源， 「肥苟」苟芸慧登時變番做靚 苟。18年同另一半陸漢洋去咗韓國影婚照，換足四套婚紗，靚到好似公主一樣！

胡杏兒

15年同李乘德Philip共偕連理，大日子當然唔少得胡說八道會齊腳做姊妹陪嫁。其實今時今日，身為兩母之子嘅杏兒，依然 keep住最佳狀態，不過做新娘子當日，更加係神采飛揚，透視婚紗凸顯身材fit到漏！

鄭嘉穎 陳凱琳

結婚兩年、兩年抱兩，計番數18年8月行禮、翌年2月大仔Rafael出世，陳凱琳原來陀住三個月肚嫁鄭嘉穎，難怪已經係近年最靚港姐，陳凱琳嘅婚紗look再升埋cup，全場驚艷！

舒淇 馮德倫

舒淇同馮德倫結婚四年，呢一pair當年非常低調，緋聞傳足多年，16年喺毫無預警之下突然公開婚照宣布結婚，雖然婚紗襯波鞋、頭上和手腕只有紅繩做裝飾，不過兩人面上的燦爛笑容已經勝過一切。

陳豪 陳茵媺

眨吓眼，陳豪、陳茵媺長子Aiden剛剛慶祝完七歲生日，回想七年前（2013年6月）陳豪、陳茵媺喺巴黎完婚，一輯婚照簡單又溫馨，一對璧人襯到絕。

岑麗香

岑麗香同老公強強，當年係經朋友介紹而結識，未見面先通電話，傾傾下傾出愛火花，拍拖一年就決定結婚。二人回到出生地加拿大結婚，仲好有心思到當地名勝影婚照，香香一襲修身JennyPackham星星透視婚紗，著出仙氣。

孫慧雪

雪雪16年同老公Edwin結婚，婚禮當日仲坐住馬車出場。原來拍拖多年，雪雪曾主動求婚，可惜Edwin認為未係時候，二人因此分手，之後Edwin才發覺生活中不能沒有雪雪，決定重新追求，終在迪士尼準備驚喜並成功求婚。