大澳

秋遊 大澳 10大懷舊小食逐檔試

美食

廣告


Text |Carrie Photo |Clay Lam

搭船搭車去 大澳 為「掃街」,未出發前有諗過係唔係誇張咗啲,不過由碼頭開始一路食到過橋去埋吉慶街,冇一間冇一檔令人失望,集中晒各式懷舊美食。反正秋高氣爽,約埋幾個朋友一邊歎懷舊小食一邊水鄉郊遊,回程搭巴士去東涌outlet shopping,好一個充實美滿的周末!

1.紫貝天葵茶 $12

搭船同搭巴士都是在碼頭落船,第一件事梗係買定支飲品傍身,在 大澳 仲飲礦泉水?梗係揀紫貝天葵水或羅漢果茶,清甜解渴,你覺得好熱的話,仲可以問店員買支雪到結冰嘅,拎住半日仲都係入口透心涼。唔口渴唔買住唔緊要,沿途都有得買,都係$12-$15支。

2.乒乓球魚蛋 $12/2粒

有乒乓球咁大魚蛋唔難,有乒乓球咁彈先算合格,有辣有唔辣,彈牙有魚味,千祈咪覺得好味就食多幾串,一路行入去大把好嘢食,唔好用晒啲quota呀!

3. 滷水巨型墨魚 $40/碗

唔好乜都話東瀛同泡菜國先係好,當你食緊日本啲八瓜魚鬚懶滋味,韓國又食咩辛辣魷魚,滷水墨魚係本地口味,巨型墨魚肉厚,滷水夠入味而不過鹹,爽口冇梳打粉味,$40夠三個人拮拮吓,都每人食到四、五件,唔算貴噃!

復興行

地址:大澳永安街4D舖

4. 隱姑雞屎藤茶果 $8

唔好再話雞屎藤呢個名肉酸,佢做出嚟特別有質感同味帶甘,茶果中佢係最好味嘅!所以唔使落餡搓到細細粒咁,賣相精美又易食,隱姑呢檔做得最好,係花款唔算多,行前幾步,有紅菜頭茶果、南瓜茶果,不過懷舊嘢都係正宗好食嘅!

5. 想食餡咪買埋鹹茶果囉,都係$8,眉豆剁蓉,一咬開香味湧出嚟!

正宗隱姑茶果

地址:大澳永安街11號A

NextPage>>炭爐烤魷魚就成日食,嚟到大澳仲有乜嘢選擇先?6.烤黃花魚魚子乾 $30-$50對

去台灣必買手信烏魚子,最近又有酒店新開魚子醬吧,閒閒幾百、幾千甚至幾萬先有得食,其實大澳平民版食魚子別有風味,幾十蚊有交易,$40一對都有兩至三吋長半吋闊嘅黃花魚子乾,即時炭爐烤香,魚子味少少腥但好脆口,送啤酒同汽酒都唔錯!

7.烤瀨尿蝦乾 $20/12隻

老闆對自家出產好有要求,魚子講明唔落味,佢話食原味最好食;瀨尿蝦本身淡口可以揀辣唔辣或少辣,每隻曬乾後有無名指咁長,未曬乾都應該唔細隻,平時怕食瀨尿蝦因為要剥殼,今日食得好輕鬆,正!

 

炭燒夫妻檔

永安街18號舖對出街檔

NextPage>>過橋喇!吉慶街仲精采呀,唔好錯過!8. 芝麻綠豆砵仔糕 $5/每件

過咗橋第一眼除了見到令女士心花怒放的名貴花膠,跟住就係令我同攝影師雙眼發亮嘅砵仔糕,芝麻味嗰件好香,唔使落豆都已好夠味!白糖綠豆嗰件豆夠稔又唔太甜,唔覺唔覺就食晒!

蘭姐砵仔糕

地址:大澳石仔埗街A段12號地下

9. 即炸沙翁 $9

從冇諗過連沙翁都可以即叫即做睇住佢炸,炸好仲睇住佢撈糖再熱辣辣逐個入袋,外層脆口淡淡蛋香,內層鬆軟,新鮮就係好味保證!

大澳金門餅店

地址:大澳吉慶前街66號

10. 蝦豬餅 $25

有個好可愛嘅英文名Husband,情侶同外國遊客實買!用大澳名物淡味蝦醬同濃味蝦膏煮碎豬肉,即場煎薄酥餅,加生菜夾埋碎豬肉卷起賣。同我一齊買嗰個太太話,食左咁多檔小食最鍾意呢款,因為落咗好多菜,的確係!減淡豬肉鹹味之餘同時心理上冇咁肥囉!

 

張財記

大澳吉慶前街41號地下

NextPage>>街就掃到差唔多嘞!搵間餐廳坐低先!蘇廬 Solo

響大澳消費嚟講佢唔算平,不過行入去響露台位坐低,簡直有世外桃園感覺,外面好多遊客好嘈,入到去望住出面嘅棚屋,覺得好寧靜同relax,好舒服!食物都係水準之作,咖啡迷必點冰滴咖啡(Ice-drop coffee),前舖open kitchen睇住逐滴漏出嚟,冇花冇假!

冰滴咖啡 ($40)係黑咖啡,味道帶甘不酸,是香港人較喜歡的口味。墊杯碟上放有幾條橙皮糖,同黑咖啡好夾。

唔想飲齋啡,推介冰搖咖啡($45),杯內冇冰,所以比一般凍咖啡濃,而且口感滑很多。

New York Cheese Cake($35)聽說是自家製,芝士味香濃但不膩口,硬度剛剛好,手藝很正宗。

Solo三寶多士($50),在烘香的法包片上放滿羅勒番茄、蜂蜜芥末鮪魚及青木瓜xo蝦醬蟹肉,三款帶來截然不同的口感,難得加入大澳風味蝦醬fusion多士,不一樣的地道風味。

Solo 蘇蘆
地址:大澳吉慶街86號地下

NextPage>>唔好以為一味玩懷舊,大澳就冇新店,今年四月就開咗間貓cafe!
貓澳

熱心照顧流浪貓的爽朗女生German,半年前決定放棄事業,全心全意照顧流浪貓,於是開辦這間貓café,一方面可以維持生計,自己也養不到自己怎照顧流浪貓呢!同時可以讓部分貓兒們有棲身之所。同時亦劃出空間支持本地創意藝術,讓不少本地藝術家將以貓貓為主題嘅藝術品寄賣,食物和飲品款式雖然不甚特別,但走進來,貓兒已是一碗無限量供應嘅心靈雞湯。

黃貓沙($38),即鮮菠蘿沙冰,雖味道偏甜,但飲得出是鮮菠蘿做,口感算不錯。

玫瑰花茶一壺配蒜蓉或砂糖貓多士六小片($70),貓多士切成貓頭形狀,十分可愛。

貓仔響店內四圍行,有時會特登坐在你旁邊,有一隻個幾鐘頭也在睡,像掛起一個day-off牌。即使選坐門口露天座位,亦有不愛入屋嘅貓兒響度團團轉,好似響度話你知,大澳就係咁自由自在。

貓澳

地址:大澳吉慶前街67號地下

註:每位最低消費$28

前往大澳實用資料:

由屯門碼頭搭船前往大澳,詳情可瀏覽http://www.fortuneferry.com.hk/

亦可在港鐵東涌站B出口的巴士總站搭乘11號巴士至大澳巴士總站,車程約50分鐘

延伸閱讀

▲旺角食街 九大最受歡迎精品小食

HTTP://GOO.GL/JI9SYU

▲掃葵涌廣場13必食 超靚「生日蛋糕」雪條

HTTP://GOO.GL/XNLRQX

如欲率先接收資訊,請讚好我們的FB專頁並於「已讚好」選單設定「搶先看」,多謝支持。
More Facebook :https://www.facebook.com/morehk.hk
 

你可能也喜歡