去元朗睇樓以外 試齊13懷舊美食

美食


Text |Carrie

元朗多咗好多新樓盤,但唔代表元朗冇晒特式,尤其懷舊美食,仍然很多,多得在元朗長大的好友帶路,尋找了不少老闆落手落腳做足幾十年兩代人的正牌老店,亦有一些老店換上時尚新裝,但親切仍舊美味依然,值得花上一個周末來細味!

1黑豆豆腐花 ($10),黑豆做豆腐花的確少見,聽說黑豆含豐富花青素及維他命E有助抗衰老…不是天天來吃不用想太多,它的吸引之處是味道更香濃,傳統方法造份外香滑,難怪店內只有兩張小枱,長期坐滿,客人卻願意拿着熱騰騰的豆腐花企在舖前吃,有幾好味可想而知。

除了供應黃糖及糖漿供客人調味,更提供薑汁,體貼窩心!

2 迷你砵仔糕($10/4件),從蒸籠拎出來的迷你砵仔糕仲熱辣辣,只有黃糖味,只分有豆冇豆,入口彈牙不太甜。

阿玉豆腐花

地址:元朗阜財街2號宏豐大廈地下12號舖

3 燒燒賣($10/五粒),唔知燒賣點解叫燒賣,不過元朗燒賣皇后就賣的就應該最名副其實,因為佢賣的燒賣係燒燒賣。燒過的外皮不會乾晒硬晒,反而變得更香口,豬肉燒賣肉質算爽口,記得淋上秘製醬汁先最滋味。

4茶葉蛋($4),周圍都有茶葉蛋,點解會係推介?一拎上手就聞到茶葉香,顏色深得像薑醋蛋般深色,但入口不會有苦澀味,正值秋冬,買回家晚飯加餸都唔錯。

元朗燒賣皇后(妙舒)

地址:元朗阜財街2號宏豐大廈地下11B及11C號舖

Next Page>元朗有間七十一,永遠門口都企滿人…

 

5七十一腸粉($8/份)及魚蛋($14/2串),元朗原居民個個都話由細食到大,七十一老闆肥仔兩公婆半世人都係賣腸粉魚蛋,由街邊檔做到入舖,早兩年業主加租就決心退休唔做,令全元朗人都好失落,老闆盛情難卻就搵舖重開,賣番一模一樣的美食。點解咁吸引?自家製腸粉打魚蛋已攞晒分,但更吸引是其醬汁,老闆娘親自調校,連豉油都係煮過嘅,所以大部分食客都好似我哋咁,買魚蛋都放埋上腸粉度,索埋啲汁最好味。

七十一

地址:元朗又新街40號地下

6 孜然烤雞髀($18)、烤薯仔($10/5件)及炸豆腐($10/4件),近年好多人鍾意食韓國炸雞,愛其香口惹味但就略嫌肥膩咗啲;呢度單啲雞髀係烤焗嘅,仲有好多口味選擇,心水推介係孜然烤雞髀,少少辣但超香口,一隻有部手機咁大都係賣$18,兩個人都夠食;見到其他食客叫埋烤薯仔同炸豆腐,連皮烤焗夠外脆內軟,豆腐炸得金黃惹味,好多街坊會買回家做餸。

香加雞專門店

地址:元朗建業街49號地舖

電話:2478 8246

Next Page>懷舊小食係好味,有得食得舒服啲就最好喇…7 雞髀沙律($32),問過好多人最懷念嘅快樂小食係乜?七成人都答炸雞髀同紅豆冰,萬芳響1959年已經開業,及後1964年結業,再由太子仔重開,近年再大裝修,保留懷舊風味同菜式,最受歡迎就係雞髀沙律,望上去好似炸得好燶,入口出奇外皮脆口鬆化,廚師特別響骨位削開,等客人更易切,茶餐廳式沙律,味道普通勝在正宗。

8 紅豆冰($20),唔少睇少一杯紅豆冰,冰要夠碎但唔易溶,紅豆要稔但爽口,花奶多得來要夠奶香,難怪全部客人枱面都有一杯喇!

9 薑檸樂($18),從來唔飲凍飲如我一定要揀薑檸樂,沿用七十年代的做法,樽裝可樂,幼切薑絲,即叫即煲,薑味十足!

室內環境裝修過,氣氛依舊但就光潔整齊。

萬芳冰室

地址︰元朗建德街45號時景花園地下
電話︰2870 2777

10永年士多車仔麵($29/3餸1麵),70年代的確係一間士多賣埋車仔麵,街坊話冇食過呢度嘅車仔都就唔係元朗人不過第三代接手後,新裝修改革,走時尚新派快餐路線,但賣的車仔麵湯底同食材都保持原汁原味,難怪keep到舊客之集,仲多了一批新搬入元朗的粉絲。

11斑蘭咖央多($10),好多街坊習慣咗嚟坐吓傾吓偈,唔肚餓都落嚟叫件多士飲杯嘢,下午茶時間套餐都係$20。

永年士多變左時尚快餐店,老街坊話真係有啲,但附近中學生就好受落。

永年士多

地址:元朗教育路88號寶城洋樓2-4號地舖

電話:2477 3816

12西關風味牛腩蒸腸粉($28),聽個名以為西關係日本地方,西關其實響廣州,呢度老闆係廣州人,所以呢度嘅菜式都係地道廣州風味,最經典應該係牛腩蒸腸粉,響薄滑的蒸腸粉配五香牛腩,腸粉夠薄份外爽滑,牛腩亦炆得稔同入味。

13 西關咸湯圓($30),用糯米粉搓的小粉圓,配陳腎、蝦米、雞絲及土尤用上湯煮,感覺同食開的湯圓完全兩回事,味道鮮甜,值得一試。

西關粥品

地址:元朗西菁街23號富達廣場118號舖地下

電話:6348 9641

Next Page>懷舊之外,元朗都有新氣象…彩 Aya日本黑油沾麵($78),開業年多得八個位,每日都係排長龍,得三款沾麵選擇都咁有吸引力?原來是日本老闆連拉麵都親自造,每朝回來做中午的拉麵分量,賣完就冇,所以賣剩十幾份麵就叫員工出來截人龍。湯底得三款,但因自家製拉麵,可以好多變化,日日有兩款供應,今天的是紫菜同蕎麥麵,有時會有荷蘭豆麵同西蘭花麵,老闆笑說最受歡迎是檸檬拉麵,可惜今日食唔到。沾麵湯底味道濃郁,黑油帶蒜香,食完麵可以叫店員加些熱水落湯飲埋,才算完美。

蝦沾麵($83),一擺上枱就聞到蝦香味,想像唔到佢用幾多蝦同蝦殼先做到如此效果。

彩 Aya

地址:元朗建德街26號益利大廈地下14號舖

電話:3686 0130

逢星期二休息

白雪公主的怪獸爆谷雪糕($42),聽說是因為其中一位投資者是元朗人,所佞這間叫白雪公主的韓國甜品店是少有第一店就紮根元朗的過江龍,大部分韓國有的甜品這間店都可以吃到,香港最受歡迎應該係Sweet Monster Ice Cream系列,在香滑牛奶雪糕上放不同食材,呢杯爆谷雪糕更是皇牌中的皇牌,雖然連埋大量焦糖食甜咗啲,不過難得爆谷仲好香脆,值得加分。

白雪鮮果蛋糕($45),店員話cake都係女生最愛之選,於是叫一件試吓,可能係響雪櫃擺得太耐,明顯出現乾硬化跡象,賣相雖好,味道卻強差人意,須要改善。

白雪公主The World Dessert Café

地址:元朗教育路44-50號兆明樓地下A舖

電話:2529 4900

延伸閱讀

▲秋遊 大澳 10大懷舊小食逐檔試

http://goo.gl/2b8xga

▲秋風起郊遊 大埔15大懷舊必食

http://goo.gl/jczjw5

如欲率先接收資訊,請讚好我們的FB專頁並於「已讚好」選單設定「搶先看」,多謝支持。

東京旅遊恩物教你食、買、玩攻略!自訂旅遊書$40蚊起!

 

 

你可能也喜歡