環遊世界 蜜月造人 蕭正楠 黃翠如 8月結婚

text:東方新地 | edit:Cherie |photo:黃翠如IG 、蕭正楠IG、東方新地

環遊世界 蜜月造人 蕭正楠 黃翠如 8月結婚

黃翠如有樣有家底性格又好，蕭正楠執到寶當然想長揸，不過翠如BB事業心重，一直唔想收山做人妻。但時間唔等人，已經35歲的翠如BB與蕭正楠都鍾意小朋友，唔想做高齡產婦，二人已有共識先結婚後造人。據知今年初佢哋已經有結婚嘅共識，一齊攞咗8月大假，但後來公司安排佢哋拍《Do姐再Shopping》，所以先打亂咗佢哋嘅計劃。近月蕭正楠拍完《深宮計》，《Do姐再Shopping》嘅拍攝進度又比預期快咗，佢哋8月就可以如期外遊。據悉蕭正楠提議8月喺外地先註冊，出年再補擺酒大搞，佢哋跟手已經向公司攞定出年大假，講明到時乜嘢大job都一律唔接。雖然翠如過往拍旅遊節目去過無數國家，但佢始終想與蕭正楠環遊世界 ，趁度蜜月努力造人，有望一年完成兩件人生大事。

蕭正楠飛日本畀驚喜

月初身在橫店為《深宮計》拍外景的蕭正楠，知道可以提早煞科，即買機票飛去東京會合拍緊《Do姐再Shopping》的翠如BB，蕭公子本來諗住突然出現畀女友一個驚喜，點知畀朋友出賣爆料，翠如仲去機場嚇番佢轉頭！據知二人結婚的消息傳遍整個無綫，知情的Do姐鄭裕玲早前亦漏口風，對於《Do姐再Shopping》打亂二人假期，Do姐講笑話：「叫佢過埋嚟囉！結婚呀？咁我會拍埋佢哋返嚟，到時話畀大家聽，哈哈哈！」

今個月中，蕭正楠在橫掂拍完《深宮計》外景，即飛日本會合黃翠如，二人爭取時間蜜遊東京及北海道。

早前 蕭正楠 黃翠如 一齊現身Big Big Channel節目，鏡頭前後都黐到實，人逢喜事樣都零舍sharp醒。睇吓失戀洪永城，個樣似足冇水洗面，真係好大分別。

黃翠如貴為一線花旦，蕭正楠穩步上揚亦唔弱，無綫近年亦開綠燈畀佢哋以情侶檔搵錢，婚後更可名正言順夫妻檔酬勞幾級跳。

翠如BB接男友返家

翠如BB與家人同住大埔寶馬山，一屋都係女人，蕭正楠到訪留宿甚不便，為爭取見面時間，二人早已於蕭正楠寓所過同居生活。上星期蕭正楠到尖沙咀出席《深宮計》煞科宴，至晚上11時許散席，佢經貨「車立」由秘道離開，但原來翠如BB一早已在隔籬街等候，見到本刊記者，負責做柴可夫的翠如BB紅都面晒，耷低頭好含蓄，聽到記者話佢幸福有個好女友接收工，蕭正楠冧笑回應：「係呀！係呀！都好夜啦！」睇得出將踏入人生另一階段的 蕭正楠 黃翠如 都心情靚絕。

黃翠如熟練地揸車返回蕭正楠的華景山莊寓所，落落大方任影，不過二人紅都面晒。

蕭正楠激讚翠如：一個不能錯失嘅老婆！

日前蕭正楠與曹永廉為新劇《超時空男臣》做宣傳，蕭正楠接受本刊記者訪問，談到翠如現年35歲，係時候計劃結婚及生小朋友，蕭承認：「會嘅會嘅！我會好認真諗呢個問題。(有冇諗過以咩形式結婚?)簡單為主啦！為咗屋企人都要從長計議啲，要plan好啲。我會畀一個好難忘嘅回憶佢，需要時間諗諗。(同翠如鍾唔鍾意小朋友呀？) 鍾意，當然鍾意啦！」當被問到翠如係咪一個不能錯失嘅老婆？蕭正楠冧爆話：「當然啦，佢係一個好女仔。錯失佢嘅男仔，我都唔知可以點形容佢嘅錯。」晒死人咩！

貼地夫婦 蕭正楠 黃翠如 秘密睇樓

除了先結婚後造人，原來 蕭正楠 黃翠如 都想在將軍澳買樓築愛巢，據知去年二人不時低調秘密睇樓盤，目標主攻將軍澳區三房一廳單位，蕭正楠亦承認有睇樓，為的是方便返將軍澳電視城，不過至今仍未睇啱心水樓。而黃翠如亦向傳媒透露希望能儲夠首期買樓：「一直都希望買樓，但喺香港比較困難，之前我有睇過唐樓，我係師奶心態，愈等樓價就愈升。」

慳家翠如 拒靠富爸爸置業

黃翠如小時候家住馬鞍山恆安邨，爸爸黃永華於九龍灣經營魚檔，98年跟伯父、即聯旺集團（8217）主席黃智果做建築和裝修，並出任行政總裁，生活先開始富起來。雖然黃翠如父母喜歡買賣物業，現持有多個住宅及商廈單位，但翠如現時並冇物業，亦唔打算靠屋企畀首期置業，而蕭正楠名下只有現居的華景山莊單位。

黃翠如有個聯旺集團富爸爸，被封百億千金，但佢從來唔會洗腳唔抹腳，用的一分一毫都係自己辛苦工作賺回來，堅決不靠父蔭。翠如近年都係住村屋，架cooper揸咗幾年都唔換，衣食就更加慳，經常着贊助嘅免費衫！

曹永廉自爆做伴郎 唐詩詠做伴娘

身為老友的曹永廉即場爆響口，話蕭正楠有計劃結婚：「其實我都聽過嚟緊呢兩年佢會結婚。(搵咗你做兄弟未？)有講過但我未應承，佢希望我做伴郎，睇吓我到時有冇時間啦！(睇住佢哋開始拍拖，有咩感想？) 佢哋係一對好甜蜜嘅情侶，好錫大家，成日掛住喺口邊，我知道佢哋冇乜鬧交，同埋佢哋好慳，各方面都好配合到，我都想佢快快趣趣結婚，生個小朋友啦！」至於將來會唔會做契爺，阿廉就話要將來先算，因為做契爺好大壓力，自己又未必常常有時間見面同關心對方。而身為翠如閨密的唐詩詠，都走唔甩會做伴娘陪嫁。