細數5對圈中疫下兩地相思伴侶：李彩華不敵「疫情異地戀」離婚 鄧麗欣、王子隔空放閃！

5對圈中疫情異地戀伴侶

疫情異地戀伴侶1.鄧麗欣 & 王子

拍拖兩年，Stephy 同台灣藝人王子 ( 邱勝翔 ) 因為疫情關係成十個月冇得見面，曾一度傳出情變。不過最近二人又隔空喺 IG 放閃，Stephy 陪媽媽切生日蛋糕，王子仲口花花曲線行伯母政策話：「 阿姨比你（Stephy）漂亮！」證明感情冇變過！

疫情異地戀伴侶2.楊丞琳 & 李榮浩

楊丞琳要準備台灣演唱會，李榮浩要為 《中國好聲音》做導師，結婚又係新婚冇耐就要經歷大半年分離，連首個結婚紀念都要分開慶祝。好彩兩口子不斷隔空宣示掛念同愛意，好似生日、紀念日李榮浩會空運禮物送愛妻，而楊丞琳上月演唱會尾場，又孖李榮浩喺大銀幕連線合唱，甜到漏！

疫情異地戀伴侶3.莊思敏 & Brian

今年三月，莊思敏趕喺四十歲生日前閃嫁台灣老公楊秉逸(Brian)，可惜另一半喺台灣有珍珠奶茶生意，莊思敏亦要留港工作，新婚冇耐已經分隔兩地，連婚後首個生日都要隔空視像慶祝。不過二人話會盡量每三個月見一面，保持新婚熱情，近日老公飛來香港慰妻，相隔三個月終於可以團聚。

疫情異地戀伴侶4.林利 & 台灣老婆

疫情期間，林利雖然要返香港拍劇工作，不過都寧願隔離28日兩邊走回台灣探望太太。明明可以私下或者見面講嘅事，林利太太陳貞均都忍唔住公開出po，鬧爆台灣女星不時私聊林利，又傳靚相畀老公，林利於是公開反問太太：「我不能有朋友嗎？」又請求太太畀啲空間：「握太實彼此都會痛」，感情似乎備受考驗。

疫情異地戀伴侶5.李彩華 & Eric

舊年二月同內地商人黃彥書(Eric)閃婚，今年二月仲高調放閃慶祝緊一周年紀念，點知一場疫情搞到分隔兩地，李彩華上月公布已經喺九月同丈夫簽紙離婚，據悉正是因為聚少離多令感情生變。