李佳芯電視史上最靚法官、胡定欣最入型入格!女星最索律師法官look比拼
一年一度,台慶劇名單正式公布!《使徒行者3》在 11月9日八點半起,打響頭炮!而載譽歸來的《踩過界II》則在11月16日起九點半首播,新一輯中有新加入法律界的女神張曦雯、蔡思貝和簡淑兒,兩位大律師、一位是檢控官,齊齊戴假髮穿黑袍。其實歷來法庭戲都是電視台最愛的題材,歷代花旦好多都飾演過律師法官,大家心目中,究竟哪位最有型、氣場最強、最無可取代?
撰文、圖片:東方新地
張曦雯挑戰視障律師
氣質高尚,張曦雯16年開始拍劇後,不少角色都是演專業人士或者女強人。白色醫生袍穿得多,這次加入《踩過界II》不止演律師,還是一位視障律師,事前準備功夫一點也不簡單。
蔡思貝sharp醒大律師
在第一輯中飾演「癲姐」蔡思貝,將由師爺升呢成為大律師,成個人脫胎換骨唔同晒,索咗又sharp咗,今輯仲會同新加入嘅張曦雯爭仔㖭!
簡淑兒律政新手
甜美型宅男女神簡淑兒飾演律師會唔會可愛柔弱過頭?Jessica話呢個角色係千金小姐出身,又係啱啱畢業嘅律政新手,所以整潔啲、溫柔啲、任性啲,不過極有正義感。
鍾嘉欣努力上進好律師
回流四個月拍新劇《 兒科醫生 》,以為會激起鍾嘉欣嘅戲癮,殊不知反而令嘉欣 BB 決心唔再離開一對兒女,宣布呢套劇大有機會係佢最後一部作品喎……講番轉頭,07年入行僅僅三年,嘉欣 BB 就加入經典神劇《 溏心風暴 》飾演常在心一角,扮演努力上進嘅律師都好搶㗎!
胡杏兒兇神惡煞做律師
眨吓眼,原來兩輯《 怒火街頭 》已經係十年前嘅事,當年嘅女主角胡杏兒一頭短髮兇神惡煞,再睇番今日嘅杏兒溫柔顧家母愛澎湃,真係做戲先見到佢個惡樣!
宣萱律師專業戶
作為上世紀無綫出產最多續集、最影響深遠嘅法庭劇,《 壹號皇庭 》系列有最多視帝視后甚至樂壇天后飾演律師,係呀,鄭秀文同王菲都有份做律師同檢控官,仲有另一個專業戶宣萱。作為留學英國多年嘅高材生,宣萱講得一口流利又好聽嘅英語,唔搵佢演律師至奇!
陳慧珊御用專業女強人
講到無綫史上御用專業人士女強人,非陳慧珊莫屬。拍劇多年,陳慧珊多次喺電視劇中扮演律師,當中包括 《妙手仁心》 、《壹號皇庭》及《創世紀》 。
李佳芯電視台史上最靚法官
點解冇份做續集《踩過界 II》?都怪 big boss單立文上集大結局推咗佳芯BB落懸崖囉!有名你叫360度無死角花旦,佳芯 BB喺《踩過界》嘅大法官look,絕對稱得上電視台史上最靚法官。
黃翠如剪髮減肥現大律師風範
名列節目巡禮2021年度重頭劇之一 《七公主》 日前拍峻,而第一女主角黃翠如 飾演嘅顧家大家姐都係大律師。為套戲,翠如剪咗一頭長髮仲減肥十磅,都係為咗令角色更強勢更有大律師風範。
陳法拉《法外風雲》大律師
學有所成嘅陳法拉終於喺HBO劇集《Undoing 》中亮相,不過第一集得嗰兩句對白兼且係群戲做背景板,露面都唔知有冇兩分鐘。13年離開無綫前最後一套劇,法拉擔任女一嘅《法外風雲》 ,就係飾演大律師。
楊怡(現名楊茜堯)大律師最難演
失驚無神改名叫楊茜堯嘅楊怡,9年前喺劇集《 真相 》中飾演大律師,入行多年演出經驗豐富嘅「 茜堯 」,都話呢個角色係歷年最難演、最吃力、最多對白嘅一次。
徐子珊為求上位不擇手段
11年重頭劇《 潛行追擊 》有黃宗澤同徐子珊演一對,Bosco 係大奸,而女朋友都唔弱,劇中子珊飾演嘅大律師為求上位不擇手段,色誘埋上司于洋上床。
有什麼Netflix、Disney+推薦及必睇劇集?
為大家整理一下截至目前為止小編追過的Netflix影集清單,必睇Netflix電影或劇集片單;Disney+方面,則可以一看電影片單推介。