李居明踢爆陳自瑤王浩信已分開！Yoyo嚇窒冷淡12字回應

原文刊於：東方新地｜圖片：無綫娛樂新聞台截圖、陳自瑤IG、王浩信IG

李居明踢爆陳自瑤冇同王浩信復合

堪輿學家李居明日前在灣仔舉行梵文書法展，請來好友陳自瑤（YoYo)做剪綵嘉賓。但當二人一同接受訪問時，師傅一開口便爆料說：「問過YoYo係咪復合？佢話唔係。」而YoYo即時用手踭撞師傅，並面紅兼尷尬說私人事沒回應。

至於問到YoYo可有機會追個仔時？師傅竟反問：「同邊個追？」YoYo見狀就再用手頂撞他，而師傅再說：「又撞我？佢唔想復合。」

YoYo嚇到口窒窒 12字回應

追問到YoYo是否不想復合時？YoYo即口窒窒說師傅為人風趣幽默經常講笑，又指師傅沒有爆料，只是將自己的想法用講笑形式講出來，未必是事實。至於是否與王浩信仍然一齊？YoYo就話希望多專注她的工作及事業，私人事不想講太多。

陳自瑤夫婦感情再露底

陳自瑤早前在節目《好聲好戲》表現出色奪冠，入行21年的她更有機會擔正做女一，王浩信回應時大講例牌讚美說話。到Yoyo出席電影首映禮，被問到她王浩信表示配音不及她，要向她好好學習時，近年總是避談夫妻關係的Yoyo第一時間哈哈大笑。Yoyo演技咁好，當然識得回應，她笑言：「過獎喇，佢冇參加過配音節目啫，佢係兩屆視帝，我喺演戲方面都要向佢學習！」兩夫婦隔空互相請教，關係更見疏離。

唔抗拒夫妻檔

對於有網民推舉Yoyo力爭視后，並與視帝老公爭取機會合作，Yoyo說：「多謝大家支持，但呢啲唔係我話事，我係小人物，等公司有安排。（唔抗拒？）我好聽話，等公司安排。（唔會尷尬？）冇諗，我好乖嘅，會珍惜機會。」Yoyo雖然口講唔抗拒，但她明顯唔雀躍、唔期待，網民亦心水清，睇穿Yoyo句句有骨，唔係真心讚老公。

擺風水陣催旺運勢

YoYo在活動中更透露獲李居明師傅指點，教她將錢箱、紅燈放在西南位，可以更紅及旺女主人，師傅即表示：「佢嘅配音節目《好聲好戲》紅到發紫，多謝佢之前收平價，依家請唔起啦！」YoYo即笑言：「梗係冇加價啦！」講到她被爆將於選美劇首次擔任女一，她坦言：「依家未正式收到通知，如果係當然好開心。」她亦多謝汪明荃加持，希望有機會請對方食飯飲茶。

王浩信恭喜陳自瑤：我同阿女都戥佢開心

王浩信對陳自瑤被讚有機會搶視后，他出席新劇《刑偵日記》宣傳時表示好戥太太開心：「我同阿女都戥佢開心，對我嚟講，佢得任何獎都開心值得恭喜，佢努力咗好多年，今年所有作品都表現得好好，多謝大家對佢嘅支持﹗」

王浩信講唔出陳自瑤節目名

當被問到會唔會鼓勵吓太太？王浩信表示：「一定會，睇佢喺配音嗰個節目（配音節目《好聲好戲》）呢，真係配得好好，真係唔容易，佢做得好好，要live一take過我都做唔到，我都要請教佢，同埋仲有帶貨（節目《識貨》）嗰啲都唔容易，佢壓力大之餘，但又做得咁好﹗」 記者話陳自瑤目標是搶視后，王浩信話：「希望佢有獎項，希望佢愈嚟愈好，我真係覺得佢一個好值得觀眾去支持嘅女演員﹗」

陳自瑤獲曾志偉欽點 入行21年首嚐女一滋味

入行21年已39歲的陳自瑤（Yoyo），等到頸都長終於做到女一，早前在節目《好聲好戲》成功奪得「傑出聲演總冠軍」人氣急升，獲汪明荃加持叫無綫開部戲畀Yoyo，副總經理曾志偉收到訴求，即欽點陳自瑤YoYo開拍新劇《選美的12夜》(暫名)，陳自瑤事業得意，婚姻關係卻依然未明朗。

陳自瑤人氣破頂 獲兩大阿姐加持

陳自瑤（Yoyo)去年在劇集《那些我愛過的人》演出備受肯定，在今年初台慶頒獎禮，當老公王浩信膺視帝時，Yoyo的木無表情被鏡頭捕獲，有網民讚她真性情是真正的視后。早前Yoyo於綜藝節目《好聲好戲》有亮眼超班演出，獲主席評判汪明荃公開力挺YoYo開劇當女主角，最近她在全新節目《識貨》再有鄭裕玲加持，讚她甚有進步豎起大拇指。

陳自瑤成監製搶手貨

得到兩位阿姐賞識，陳自瑤頓成劇集監製搶手貨，下月她將連踩兩劇，其中一套《選美的12夜》(暫名)更落實升呢做女一，終於恨到！據知陳自瑤將與馮盈盈和簡淑兒合演新劇，她會以女警身分潛入選美賽事中查案，同樣在《好聲好氣》中有突出表現的楊潮凱則是男主角。