點解男友咁忙 都有時間打機?

網誌

成日都遇到一個問題,女朋友會問:「你又話忙、又話攰,點解仲有時間打機?」

然後就會開始嬲,嬲你唔陪佢,嬲你講大話,甚至覺得你唔再鍾意佢⋯⋯

面對呢個問題,好多男仔都懶得解釋,選擇以「唉,唔打囉」,或者「我係想打機唔想陪妳㗎喇,咁又點?」嚟解決,但當然只會深化咗呢個『女友VS打機』嘅矛盾。

今日我嘗試解答一下,點解男人,就算幾辛苦,都要抽時間嚟打機!

首先,女朋友妳要明白,打機同妳Shopping一樣,係天性嚟。大部分男仔基本上由小學已經打機,係一個細細個就培養嘅習慣,比起妳嘅出現、比起拍拖更早開始。

所以,如果以時間上嚟講⋯⋯並唔係佢因為打機而阻住你哋拍拖,而係你哋拍拖阻住佢打機⋯⋯

OK!有少少打橫嚟講,冇得咁樣比較,咁第二個原因,男人嘅娛樂比起女人少好多⋯⋯女人可以去做個Facial、睇下衫、同女人堆吹下水已經好滿足,但男人唔係睇女、睇波,就係打機。我諗妳都唔係好想佢睇女㗎,至於波又唔係成日有得睇,咁就得番打機⋯⋯

OKOK!妳覺得一齊拍拖已經係好好嘅娛樂,咁要出動以下呢個原因。

男人打機,或者打X機,都係最有效嘅減壓方法。毋須理由,就係做嘢做到攰、就係好辛苦好大壓力,先要Relax Play一下。休息為咗走更遠嘅路,打機都係為咗再次努力!男人打機,輕鬆完,就會好有動力!

至於打機等於唔愛妳、唔想陪妳,絕對係錯誤諗法,兩樣嘢分開的,正如妳唔會話男朋友掛住食飯唔陪妳、掛住去廁所所以忽略妳,所以公平一點,男友唔會怪妳Shopping,妳都唔好怪男友打機啦~

但有一個位,要幫番女朋友,就係如果打機打到唔覆女朋友、或者真係長時間打機而唔陪女朋友,咁又可能要控制一下,因為你嘅女朋友都真係需要你。

打機同女朋友,未必係永遠嘅敵人,一個醒目嘅女朋友畀男朋友打一陣機(但唔係要同時陪妳傾電話/Facetime),畀少少100%自由佢,佢打完之後,一定會更愛妳!

你可能也喜歡

Recommended