女朋友一齊打機 後果可以好嚴重

網誌

如果女朋友會一齊打機就好喇!

曾經,我咁樣諗過,以為係一件非常美好嘅事。

唔會再有人叫我唔好打機,女友唔會再怪我打機唔理佢,拍拖嘅時間就係瘋狂打機,真係諗起都幸福呀。

女朋友最想聽嘅唔再係「我愛妳」,而係「歡迎來到傳說對決」。

但諗深一層,其實都唔係一件好事⋯⋯

有一日,佢同你講,喂!我都download咗你隻Game一齊玩呀!

你答佢:「吓⋯⋯唔啱妳玩㗎!」

佢好有信心咁講:「放心啦,我啱啱先五連殺呀!」

你心諗,梗係啦,啱啱電腦嚟⋯⋯求求妳⋯⋯別送頭⋯⋯

打得機邊個唔想贏,但帶住女朋友打,你預咗有六成輸,成隊打少個,全程你都要保護佢,但你保護佢,隊友又怪你唔支援。生活上有「朋友VS女朋友」嘅難題,估唔到打機都要面對「隊友VS女朋友」嘅抉擇⋯⋯

「你想我死先定你死先?」曾經,你哋喺拍拖嘅時候討論過呢個問題,你答佢:妳死先,因為我死先得番妳一個,妳會好傷心。

但打機就唔同,一定係要你死先,如果唔係佢死先就會怪你:「搞錯呀!係咪男人嚟㗎!推個女人出去死!」不過,你死咗之後,得番佢一個,都係好快畀人殺咗,呢個時候你嘅隊友又一個省略號⋯⋯

你係一個好易呷醋嘅男仔,不過好彩女朋友身邊都係得啲姊妹,不過當佢一齊打機嘅時候,你會知道,Game入面好多狗公,一見佢係女仔頭象,一定會撩佢同Add佢,有次佢仲接受咗人哋邀請,同人哋開Game⋯⋯你個心沉咗一沉,好似見住佢同人開房咁⋯⋯帽已綠。

你哋嘅拍拖生活,本來都幾豐富,不過打機之後,一食飯坐低,佢就拉拉你衫尾:「帶我打排位!」去到邊打到邊,話題都係講嚟緊有咩新英出,啲隊友有幾廢,頭先嗰場明明贏都變輸⋯⋯

本來,女朋友成日問你嘅係:「如果我變到好醜,你仲要唔要我?」

但而家,佢會問你:「如果我場場都雷輸你,你仲會唔會同我玩?」

你諗起一句至理名言-「與其坐在單車上笑,寧願在寶馬上哭」,你深吸一口氣答:「與其打爆對手而笑,寧願同妳輸到哭⋯⋯」

明明打機係一件開心事,但係,你喊咗。

原來因為好感動,因為女朋友終於拎到MVP。

你可能也喜歡

Recommended