阿茂整餅之：腸仔包

Apr 2 2012

我發覺我鍾意整包多過甜品，雖然搓麵糰真係可以搓成半個鐘（有次要45分鐘），但因為媽咪不太愛吃甜品，所以甜品呀蛋糕呀果D整完之後永遠都係無人吼，一係山長水遠拎番公司，一係自己一條友食鬼哂佢（食完唔想磅重）。但係整麵包呢，一焗完媽咪就會好捧場，都未放涼已經爭住試食，之後大家都可以日日當早餐或下午茶食，感覺受歡迎好多。

整過兩種好健康的包包（阿茂整餅之：七穀麵包＆阿茂整餅之：薯仔香草麵包）之後，媽咪一路試，就一路話：「不如你以後唔好整蛋糕啦，整麵包健康D，我又可以食，你又唔驚肥囉！」哈，又係既，同埋整麵包個感覺真係唔同D，可能蛋糕多人整啦，我就想整麵包囉，哈！

今次整我好鍾意食既腸仔包，不過搓麵糰真係好難，搓左好耐但焗完都係唔夠一絲絲，我懷疑真係要買部麵包機幫手。媽咪見我咁鍾意整麵包，又咁認真研究，竟然主動問我係咪想買麵包機，我現正認真考慮中，我咁鍾意整，幾百蚊唔係問題，無位放先係問題，加上其實我又想買個大D既焗爐………………. 😛

好失禮 … 第一次整，雞手鴨腳包得唔夠實，一路焗D包一路彈開哂，真係慘呀D腸仔，赤裸裸咁嘜比人睇到哂 🙁

搓好麵糰就發酵，最好發酵溫度係20-38度，我整時得10幾度，於是要連杯熱水放入焗爐先發到。

發酵後，分成幾份。（睇相先發覺好似發得唔夠 … ）

之後包住條腸，再發酵。（發完酵已經好似包得唔多實，但發完酵suppose係唔再郁佢 … ）

再掃一層蛋液。D包一遇到蛋液就好似癲左咁，同對面舊包一刀兩斷，死都唔肯痴埋一齊 … 於是焗完就變左咁，穿哂lone，好慘呀！不過唔緊要，賣相麻麻地，但食落都OK，媽咪同我一兩日就搞掂哂！ 🙂

腸仔包食譜:

A.
高筋粉150g
低筋粉50g
細砂糖30g
鹽1/4匙
即溶酵母粉2g
全蛋50g
牛奶70g
B. 無鹽牛油15G
C. 腸仔，芝麻（我無落）

做法:
1. 材料A 混合，搓成光滑麵糰。
2. 加入牛油，再搓至光滑且透明薄膜的麵糰。
3. 放入器皿內蓋上保鮮膜，待發酵80分鐘。

4. 麵糰分成5等分，再蓋上保鮮膜待松弛10分鐘。
5. 取出一份麵糰丰捍成長型，包入香腸。
6. 麵糰坍均勻地刷上蛋汁及沾上芝麻。再蓋上保鮮膜待松弛30分鐘。
7. 放入已預熱烤箱，180度焗18分鐘便完成。

食譜from：香噴噴腸仔包出爐了…(附上食譜)

Tips from www.leisure-cat.com
1. 若想省一點發酵時間，可開焗爐至最高溫一分鐘後，熄爐，把已搓好及蓋好的麵糰放入焗爐待發酵，可省1/3時間。
2. 暖水份量是1份滾水，2 份水室溫清水。
3. 欲知發酵狀態，可使用手指測試，在手指沾上麵粉，插入麵糰中，然後柚出手指，其洞若末緊縮，即發酵完成﹔反之，若縮緊，則發酵不夠﹔若麵糰下陷，則發酵過度。