許志安復出！神隱年半預計明年出碟 冇膽面對群眾幸有好老婆鄭秀文支持

原文刊登於：東方新地｜圖片：東方新地、ViuTV截圖、Instagram

許志安復出！冇膽面對群眾幸有Sammi支持

「安心偷食」發生已經一年半，幾乎賠上婚姻與事業的許志安，閉關思過十四個月，今年六月首度復出為ViuTV音樂節目《 Chill Club 》演出，休息多時歌藝未有生疏，加上獲老婆鄭秀文力撐，總算成功踏出復出第一步。事實上，自知「犯下彌天大錯」的安仔，重新出發面對群眾也跨越了很大的心理關口，幸好得身邊一班好友鼓勵及老婆鄭秀文的支持，才令他重拾自信。據知情者透露：「咁多年辛苦建立嘅形象同地位，一夜間就冇晒，對安仔嚟講係好大打擊，以前佢對自己好有自信，但『偷食』事件之後，佢根本冇膽面對群眾，除咗見一班老友之外，就算連圈中人佢都唔知點面對，好彩喺呢段時間，佢有Sammi嘅無限大愛，Sammi真係畀咗好多支持安仔，好似之前復出上台，安仔都有問Sammi意見，Sammi就鼓勵佢最重要係發自內心、真誠出發，將呢年多以嚟嘅領悟表達出嚟，無論如何都要面對同承擔，觀眾自然會感受到！」

接內地酒吧騷積極工作 錄新歌準備復出

已經ready復出的許志安，近日亦正式入錄音室錄歌，預計會錄三至四首新歌，計劃明年一月派台正式復出。據知情者透露：「雖然上年九月嘅演唱會取消咗，不過喺Paco（黃柏高）同公司同事鼓勵之下，安仔都有低調接內地酒吧show演出，好似上年12月都有返內地唱酒吧騷，一嚟唔想自己游手好閒，亦keep住練歌演出唔想歌藝生疏，一步步嚟等機會再上番大舞台，但因為疫情關係，唱咗兩場已經冇再做，直至近期內地疫情緩和，近日先計劃再返內地演出，亦正式入錄音室錄新歌，2021年會係佢一個新開始！」相信許志安人生最大成就，並唔係攞到多少個「最受歡迎男歌手」獎，而係搵到個對他不離不棄的好老婆鄭秀文！令他可以從谷底企番起身！