綠葉夫妻當 楊證樺、沈可欣戲裏演到戲外

綠葉夫妻當 楊證樺、沈可欣戲裏演到戲外

恭喜楊證樺、沈可欣第二胎母子平安,BB成功出世!早前在TVB劇集《踩過界》在「疏忽照顧兒童案」飾演聾啞夫婦的 楊證樺 (Man)和沈可欣(Janice)獲網民大讚演技出色,更想不到兩人現實中也是綠葉夫妻,並育有一名一歲半兒子楊宏志 (Eugene),阿Man笑言兒子是他的福星,自哥哥出世後,兩人獲得更多演出機會,甚至一齊做夫妻角色,「監製一諗起要搵人做夫妻,就會諗起我哋。」

入行20年的阿Man至今演出劇集超過100部,試過一日有6齣劇集有他份兒,最為人熟悉是2010年在《巾幗梟雄之義海豪情》做宮崎隊長,獲金牌監製李添勝公開大讚專業。至於 Janice於2000年讀演藝入行,兩人早已認識十多年,但真正走在一起只是近幾年的事,對於戀情十分低調,很多藝員同事直至他們結婚才得悉,還以為他們在拍戲!

Text:Ling |Source:Sundaykiss |Edit:venusos

綠葉夫妻當 楊證樺、沈可欣戲裏演到戲外

今日中午,楊證樺於facebook上載合照,指沈可欣母子平安,BB成功出世!

 

作為圈中夫婦,一家三口想出外享受天倫樂十分困難,而且作為綠葉夫婦,時間表分分鐘比一線小生花旦更密麻麻,筆者相約他們一家三口做專訪,足足約了半年,前排他們日日夫妻檔上陣拍攝新劇《平安谷之詭谷傳說》,之後劇集一部接一部,直至暑假前終於成事,這個訪問亦促成阿Man一家三口難得的合家歡時間。

綠葉夫妻1
楊證樺和沈可欣在TVB默默耕耘多年,一直安於自己位置,因為他們明白每套劇集都是team work,要有主角、配角和綠葉才能成就一套劇集,正如每個家庭都會分工合作,每人都有自己崗位。
綠葉夫妻2
兩人不希望兒子接受填鴨式教育,會為兒子選擇一間快樂學習的幼稚園,不想有太多比較。

「《平安谷》拍嘅時間好長,好多群眾戲,成日廿幾三十人一齊開工,有次BB發燒入院,我哋要一齊請假幾個鐘去醫院,劇組都好好叫我哋專心陪阿仔,唔使返去。」Janice說。夫妻檔拍戲有個照應當然開心,但自有小朋友後,她覺得一齊開戲會忽略了兒子,需由婆婆和工人姐姐幫手湊。「我哋仲有《跨世代》係一齊拍,最好梗係你返工我喺屋企,我返工就到你湊。」

綠葉夫妻3
兩人忙於工作時,湊B的重任就交託婆婆了。
綠葉夫妻4
3個月大的Eugene眼仔碌碌。

《踩過界》演聾啞夫婦

無論戲份多少,兩人對每個角色也十分認真,一邊湊仔一邊刨劇本。去年底為準備拍攝《踩過界》, 飾演失聰人士的阿Man和聾啞人士Janice,到聾啞中心跟老師學習三堂並拍片記錄,一放工就睇片練習,每日練十個鐘,練足一個月,Janice更需學習手語,壓力非常沉重,她說:「我都係靠死記,每日學少少累積上去,好似砌積木咁砌啲對白。不過同老公一齊拍嘅好處係可以喺屋企對劇本,佢又幫我睇啲手語做得啱唔啱,好彩BB嗰陣唔難湊,練一陣又睇吓佢。」

兩人夫妻檔在《踩過界》合演聾人夫妻,拍攝前練手語練足一個月,每日逐句對白練上去,非常專業。

那段時間兩人更需為兒子的健康奔波,因兒子打完一歲針後發過幾次燒,一次阿Man為《深宮計》試造型時,收到外母的電話稱兒子發燒,即刻撲返家送他入醫院,經檢查之下證實為扁桃腺發炎,「阿仔需留院兩日,我就全晚陪住佢,放低所有工作。」

拍攝當日Eugene好喜歡玩舖頭門口的開關掣。

反對囝囝做童星

自Janice懷有BB後,兩夫妻的拍攝機會接踵而來, Janice大住個肚都有戲拍,「《愛・回家》有場戲講兩公婆有間麵檔,拍我大肚煮麵。」阿Man笑言BB未出世已有演出機會,但他們不太贊成讓兒子做童星,因為見過很多童星拍劇的辛酸,放假都要帶功課入廠做,失去了童年。「呢個世界太成人,會令小朋友變得老積,影吓相拍廣告都無妨,因為拍攝唔辛苦,以開心為主,但拍劇好辛苦,要你做呢樣嗰樣又要喊。」Janice更見過BB演員被刻意弄哭,非常心痛。他們眼見很多童星拍劇並不享受,只是家長逼迫子女參演,「小朋友做到唔等於真係想做。」

Janice經歷了十多小時的陣痛後,順產誕下BB,生完一刻 覺得自己像打了幾場拳賽,累到虛脫。

雖然兩人不會讓兒子做童星,但長大後就由他自己選擇,阿Man發覺兒子有遺傳他們的演藝潛質。「有次我帶佢去買鞋仔,佢一聽到舖頭播disco音樂,即刻跟住beat跳舞,可能遺傳咗我。」

曾當舞蹈員參加新秀入行

不說不知,原來阿Man曾當舞蹈員,1996年在美國紐約參加「全球華人新秀歌唱大賽」(同屆冠軍為何韻詩),取得當地冠軍後回流香港,沒有參加香港舉辦的總決賽而直接加入TVB。為甚麼不參賽與何韻詩較量?「我知我輸梗㗎喇,諗諗吓覺得演員條路長啲,咪直接簽TVB藝員約。細個發明星夢先參加歌唱比賽,但歌星好講機遇,有機會當然都想做。」

阿Man既要拍劇,,又要打理餐廳生意,每日收工後都會抽時間陪囝囝落街玩。

阿Man入行前一直當舞蹈員,但有感舞蹈員生涯短暫,做演員卻可以做到老。「Dancer可以跳到幾多歲吖?30幾歲都硬晒啦,就算轉做排舞師都有限,做演員就可以做到80歲,演出範圍亦闊好多,我鍾意做日本人都得呀。」阿Man在默默耕耘下,終憑2010年無綫劇《巾幗梟雄之義海豪情》的日本人宮崎隊長,獲金牌監製李添勝及觀眾大讚,即使未必講得出真名 楊證樺 ,觀眾都一定認得宮崎隊長。

今時今日大家仍記得《巾幗梟雄之義海豪情》的宮崎隊長。

太太Janice則於2000年底演藝學院畢業入行,兩人合作拍劇無數,但從來不過電,直至幾年前timing到,兩人恰巧搬到附近居住,約食飯多見面後終於走在一起,但他們沒有刻意宣揚感情事,所以2015年註冊結婚時,有藝員同事以為他們拍劇,Janice笑說:「嗰日有其他同事嚟觀禮,即刻將啲相擺上facebook,有同事睇到就問拍緊咩劇?我話係真㗎!之前有人問咪講拍緊拖,冇人問就唔會講囉。」

阿Man和Janice在TVB認識多年,直至近年才走在一起,Janice笑說︰「身邊啲人都覺得難以置信,問我哋真定假。」

 

40歲順產生到虛脫

遲來的緣份仍能促成小生命到來,Janice以40歲之齡順產誕下囝囝Eugene,無懼風險,「我一直都有check住唔怕,因為我覺得順產比較好feel、順其自然,媽媽生仔一定痛,女人係要經歷下,而且順產對BB好啲,對媽媽身體恢復都好啲。」

阿Man指自己是事業型,未結婚前將事業擺第一位,經常出去應酬以擴大自己的人際網絡,但有小朋友後變成住家男,應酬大大減少,妻兒才是第一位。

Janice陣痛了十多小時,無想過生仔如此勞累,令人虛脫, 「痛我就預咗,但痛完之後嗰種攰係想像唔到,好似打咗好多場拳、跑咗好多個圈咁,好辛苦!」當刻Janice誓言生第二個一定會開刀,但看到BB健康成長,都會再選擇順產。「生唔生第二個就順其自然啦,始終都年紀大,呢一兩年都冇就算了。醫生話整個生育年齡都高咗好多,我都唔算太高,一路check住都陀得好安全。」

阿Man和Janice去年補擺喜酒兼BB百日宴,楊明(後右三)擔任伴郎。

見到個仔就叉足電

兒子轉眼間已一歲半,阿Man和Janice形容他是一個開心BB,臉上經常掛上笑容,惟他沒有耐性,比較忟憎、心急,Janice說:「佢學行會向前『舂』,因為佢太心急想行,搞到成日仆親。」阿Man笑稱兒子最喜歡出街,對身邊的事物十分好奇,即使自己忙拍劇又忙於打理餐廳生意,就算多勞累都會陪兒子出街玩。「一見到個仔就好似叉咗電,幾攰都唔記得咗,有時拍完劇返到屋企,個仔話想行街街,我都會帶佢落去行一行。」

Eugene性格活潑,表情多多,阿Man覺得兒子的確有有遺傳他們的演藝潛質。
兩人教仔最重視禮貌,學業其次,將來做個開心快活人就夠。

演技精湛的阿Man和Janice,當然有應用在湊仔之上,兒子有隻心愛公仔名叫Stephen,每晚都要攬實睡覺,阿Man和Janice就利用Stephen與兒子談天哄他入睡,因為兒子對床前故事沒甚興趣,阿Man笑說:「佢係比較自我啲,我哋講故事佢冇咩反應,鍾意自己發掘嘢玩、周圍摸嘢,好似一個工程師。」看着兒子一天一天長大,阿Man猶如看到自己的童年,每日都用心教導他,並學習如何做個好爸爸。「唔可以迫佢做佢唔想做嘅嘢,適當時候都要話佢、要say no,但唔畀佢又會扭計,究竟點樣取得平衡呢?湊仔真係一個好大學問。」

父母覺得Eugene像個工程師,喜歡四圍探索。
Eugene最鍾意玩一隻名叫Stephen的公仔。

你可能也喜歡