不斷努力卻從不滿足的人

網誌

你會不斷去推動自己要好勤力嗎?

必須要自己不停地工作,唔俾自己停落嚟嗎?

每次一停落嚟,休息嘅時候,會覺得好內疚,
會覺得好自責,會覺得自己好廢好無用,好浪費時間 嗎?

不斷去做下一個project,去完成一個新目標,
唔係工作就進修,唔係做進修就創作,
總之係不斷又不斷又不斷…..冇一刻係唔係做緊嘢。
但是完全多少個目標都好,卻沒有一點自豪感…
你會這樣嗎?

曾經我是這樣的。

雖然有一啲人會覺得,或者我嘅工作都有一啲嘅成就,都值得驕傲丫。
但係我想話畀你聽,幾年之前嘅我從來都唔覺得自己得到過啲乜嘢,亦都唔覺得自己有絲毫的自豪的地方。

每一次無論我嘅project得到過幾多個掌聲都好,
或者有任何嘅讚美和誇獎都好,
我都覺得好反感,我覺得佢地只係畀面,係假架唔係真架!
什至我會討厭讚美,我覺得佢哋玩我,我唔覺得佢哋真係認同我。
我依然是那麼渺小,一d價值都。
如果我冇工作嘅時候,我嘅自信更加跌到谷底!
多年來我嘅工作上的榮耀同埋光輝,一啲都比唔到任何溫暖比我自己。我要不斷去做去做去做,永遠覺得自己做唔夠,並唔係因為貪心或者虛榮,而係從來唔覺得自己獲得過什麼。

我是存在在一個不斷質疑質疑再質疑自己的狀態,
質疑到我自己都覺得煩卻又停止不了。

接觸兒童心理治療學之後的這幾年,我慢慢發現原來其實一切係嚟自原生家庭。

因為欠缺原生家庭既認同,由細到我要不斷去做好多野去證明畀其他人睇,我值得被重視的,我不是沒有用的。這種模式慢慢成為我看待已經成為咗我看待自己嘅價值觀,成為左一份執著,
而我也成為了只是一個不斷向前推動推動嘅機器。

坦白講,我覺得以前我嘅創作只係一個表面無靈魂無故事,
又或者因為我嘅價值觀本來就出現咗問題所致…
後來呢幾年醒覺左,我先至開始可以真正投入創作,
先至開始覺得我嘅創作裏面有啲靈魂,有左故事….
而因為覺誤左,知道點解自己會咁,

先慢慢開始接受到自己,慢慢認同自己嘅能力。

我好像慢慢懂得為自己而活,
三十幾年了,終於頭一次覺得我在生存中……

好記得老師嘅其中一句 “每個父母對小朋友既成長,同價值觀既建立都好重要。 一個係經常被父母批評同不斷要求既家庭下成長嘅小朋友;又或者係一個經常會將個小朋友同兄弟姊妹比較嘅家庭成長下嘅小朋友, 都會好容易質疑自己 ,否定自己嘅價值。 如果父母唔及時改正過嚟,久而久之小朋友就會慢慢喺呢一種自我質疑既價值觀之下長大。長大之後既佢哋,雖然都可以改變自己,但係就要花好大好大嘅力度去幫自己跳出呢個陰影。”

我用左三十多年在這個陰影下 掙扎, 用好大嘅力度先至 拖番自己出嚟。我沒有怪任何人,因為我都成年了,自己的生命由自己負責,自己想點唔想點,我哋絕對有能力改變,只係夠唔夠堅持,夠唔夠決心,想唔想改變。

成長就是很妙的一回事,
好似好獨立,
其實背後又牽連著整個原生家庭。
家長情緒一到, 無心插柳嘅一句,
冇注意到嘅嗰一刻,咁啱嘅嗰一個行為或者說話….
就咁啱傷害左個小朋友….
你永遠都唔知道原來嗰一刻嘅嗰一句,
或者嗰一個行為咁樣就影響咗佢一世,
而且佢就記足一世!

我知道的,都是沒有心的,我真的知道的….

現在知道了,所以我放下了…….
做父母和子女是一種接納和寬恕的學習,
不必要誰怪誰。

人生就係咁㗎啦,
係唔同嘅事情裏面得到發現/受到啟發,
然後承認,再接受,繼而再去嘗試改變,
因為努力去改變過,你先至感覺到自己嘅存在價值,
因為掙扎過你先至知道珍惜。

成長了,能獨立了,生命嘅主權就係屬於你,
成長與否亦都係你嘅手中。
成長發生的一切質疑呀,恐懼呀,憤怒呀,一切的經歷都不過為造就更好的你,
別害怕你為什麼是今天的模樣,
因為明天的你將會係更加好同埋更加快樂。

Fb: maysumofficial

你可能也喜歡

Recommended