有人同我講:『拍拖拍到咁,好Cheap啫!』

網誌

身邊不乏一啲有錢情侶,食好、住好、買好、個個月旅行當食草。

錢唔使擔心,因為屋企搞大生意;有車、有樓、仲有工人做家務。

每日都會將啲寫意生活貼上FB、IG:「Enjoy Life!」

本來呢啲離地生活,當然同我呢啲低下層相隔一整個宇宙,點知竟然喺一個舊同學飯局相遇。

一入餐廳,佢就好鄙視咁問大家:「嘩乜嚟呢啲地方食嘢?」已經係六百幾蚊嘅酒店Buffet,對我嚟講已經好貴⋯⋯

再之後,大家傾下近況,講下拍拖生活,佢竟然同我講:「你拍拖拍到咁,好Cheap啫!」

我講咗啲乜?

我話,平時拍拖都係去食吓粉麵茶記,兩個人一百蚊唔使,星期六、日先食好啲,可能放吓題、邊吓爐⋯⋯

佢:「啲嘢唔係人食㗎喎⋯⋯好心拍拖就食豪啲啦。」

我笑一笑:「慳錢嘛,冇理由日日食幾百蚊嘢。」

點知佢話幾百蚊已經好慳⋯⋯

再下一個話題,我話平日同女友都係喺旺角尖咀行下街,Window Shopping吓。

佢:「嗰啲地方好臭好迫⋯⋯咁你都去?」

我諗起,佢日日出入名店,對佢嚟講,潮特旺中呢啲係鬼地方。

到咗講住邊,我話喺長沙灣租住先咋,萬一蚊租,二百幾呎啦,唔算太大,但都夠住⋯⋯

佢好似發現火星咁,碌大隻眼:「真係㗎!?Are you Kidding?我個Kitchen廁所都大過你,點住得落呀!?呢啲係咪叫劏房?」

到咗旅行,當然開正佢呢個旅遊達人嗰瓣,不停畀我哋睇啲周遊列國相。

我話嚟緊同女朋友去台北,短短地去幾日。

佢大笑咗出嚟:「哈哈哈,嘩XXX(我全名),你拍拖拍到咁,好Cheap啫!食又差、住又差、連去旅行Relax吓都咁頹,同你拍拖真係慘過乞食喎⋯」

我聽完,嬲到企喺身一拳就打埋去!!!講笑,當然冇,佢唔識尊重人,我都識尊重其他朋友,尊重自己。

我只係輕輕咁話:「我女朋友同我都覺得好幸福。每對情侶都有自己嘅相處方式,喺你眼中,我哋係窮啲,不過係我哋最開心嘅日子。」

再食咗一陣,呢位火星朋友早走,話頂唔順啲嘢食,要去食番啲『人食嘅嘢』平復下。

有時我都會質疑自己,女朋友同我一齊係咪好屈就?如果同啲有錢仔一齊實好無憂無慮。

飯局完畢,走嘅時候,我又再諗起呢個問題,不過女朋友Send咗個WhatsApp畀我:「返嚟未?幫我買碗腐竹雞蛋糖水!(心心)」

對女朋友嚟講,呢碗唔使廿蚊嘅糖水,就已經好甜。

廿蚊就買到幸福,又真係幾Cheap嘅~

你可能也喜歡

Recommended