防寒

韓國線記者教路!著得靚又唔會冷親 12、1月遊首爾10件防寒必帶裝備

生活品味

首爾早前開始下雪,加上天氣乾燥,真的很冷!首爾市政府現時已在大部分商場及室內景點放暖氣,所以也不用擔心太冷!不過12月、1月去旅行時,就要面對「室外凍、室內暖」的情況,究竟要如何襯衫?又有甚麼是必帶呢?這次就讓一年去幾次首爾的韓國線記者A君為大家推介10件防寒必帶裝備,就不用煩惱啦!

撰文:A君的泡菜日誌 | 編輯 :venus.y | 圖片: IG |資料來源:GoTrip

唔怕凍,又好睇!10件防寒必帶裝備

首爾12月天氣概要

12月上旬:平均溫度4度,最高溫6度,最低溫負1度。

12月中旬:平均溫度1度,最高溫4度,最低溫負3度。

12月下旬:平均溫度負1度,最高溫度3度,最低溫負5度。

雖然天氣預報話12月首爾天氣勁凍,但A君的韓國朋友話體感溫度並不是太凍(因為冇風),有陽光的情況下如果著大褸其實會覺得熱,加上好多商場都有暖氣,所以穿搭打扮重點一定要方便穿脫!不過要留意,首爾已經開始落雪,地上溶雪時,雙腳會感到超級凍,所以一定要著長褲或打底褲,唔好學韓妹show長腿喇!

1. 學識洋葱式穿搭 拉鏈衛衣最實用

想夠保暖又唔要著得臃腫,最緊要係學識洋葱式穿搭,即是三層的穿衣守則(內衣+衛衣+外套),這樣面對室外室內的溫差時,就可以方便穿脫!不過A君推介大家要著4層,即係「內衣+T-shirt+拉鏈衛衣+外套」,因為去首爾,食燒肉、參雞湯等熱辣辣食物是常識吧!A君經常面對暖氣+熱湯食物時,真係熱上加熱,但除衛衣淨著底衫又好尷尬,反而「T-shirt+拉鏈衛衣」就可以應付食飯時的超熱情況!

2. 防水外套 防風亦防雪

不少人睇完天氣報告,見到唔落雨就會放棄防水外套,其實A君覺得防水外套好重要,因為首爾天氣變化大,突然落雪的情況真係經常會發生。防水外套唔怕溶雪時弄濕衣物令你凍親,又可以防風,真係好方便!

3. 發熱內衣 唔好揀高領

去首爾,發熱內衣真係好重要,不過建議唔好揀高領款,前文都講過,入室內真係好熱!而且建議要買細一個碼,因為發熱內衣要夠貼身先會有發熱效果,同埋最好揀長袖款,穿著時可以令熱力唔會咁快散走。

4. 用口罩 避免吸入冷風

有時見到韓星去到邊都戴口罩,都會覺得佢哋懶有型!其實口罩好保暖,冬天去首爾絕對係必備品!事關首爾好乾,吸入冷風時會抽走身體的水份,實在好辛苦!雖然戴口罩都幾辛苦,不過可以揀日韓都有出的保濕口罩,又或者布款,呢類款式冇常用口罩咁焗!

5. 絲襪+leggings 兩層保暖大法

走在街上,會發現韓妹即使幾凍都唔會著長褲,反而一條leggings打天下!原來內有乾坤,佢哋內裡要再著一條密針絲襪(佢哋稱為大媽保暖打底褲),再穿leggings時,就唔怕臃腫又夠時尚感!

6. 冷帽、頸巾、手套 一定要戴

前文都講過,去首爾穿搭襯衫一定要方便穿脫,但A君都知道好多女仔接受唔到著防水褸同衛衣,如果你堅持要著衣櫃入邊嗰件心愛好靚但唔保暖的大褸,咁就記得要戴齊冷帽、頸巾、手套喇!因為頭、頸、手都感到暖時,體感溫度都會上升,咁就唔怕覺得凍啦!(好多韓妹都用呢招,令自己可以show長腿!)

7. UGG雪靴必死 寧願著普通高筒boots

A君自問好怕凍,上年冬天去首爾就懶醒著UGG毛毛靴,點知就出事了!因為當時首爾有落雨落雪,條街結冰時就真係超級滑,舉步難行啊陰功!所以寧願著普通高筒boots(有少少踭更好),就千祈唔好貪少少保暖效果而著毛毛靴(如果你嗰對唔係膠底就另計)!

8. 唔想爆嘴角 必備潤唇膏

又一個A君中伏經歷!上次去首爾,突然爆嘴角,返香港睇醫生,先知原來有「氣溫敏感」,即係突然面對不是自己習慣的氣溫,皮膚有敏感反應!所以唔想好似A君咁爆嘴角,口唇有敏感反應開始變乾時,就要立即用潤唇膏紓緩,仲要即刻飲水呀!

9. 一定要買救急暖貼

買暖貼,當救急用就好,千祈唔好太過依賴!平日最緊要著夠衫,暖貼則隨身帶備,突然落雨落雪遇上大風,先將暖包貼在腰腹部保暖。但係記得千祈唔好貼在皮膚上,容易過熱燙傷或皮膚敏感呢!

10. 貪靚要帶 常用保濕mask

好多人都會話:「去到先買啦!」雖然都有道理,不過冬天去首爾,都係帶定幾塊自己常用的保濕masks更穩陣,因為A君上次去,天氣太乾急買保濕mask,最後皮膚敏感起粒粒,唔用mask塊面又乾到裂,最後要買貴價低敏牌子先有改善,荷包大出血呀!

有什麼餐廳適合慶祝生日或週年紀念?

香港其實有很多特色餐廳,即睇:打卡餐廳Cafe推介海景餐廳推介香港酒吧高質推介,適合打卡,又是情侶拍拖、慶祝生日、紀念日,甚至閨蜜聚會的好去處!

有什麼拍拖好去處推介?

情侶約會可以去這拍拖好去處,既玩味又能滿足女生愛打卡的要求。在特別日子到影相好去處拍照留念都是很好的選擇!另外也可到Art JammingTufting,最後可以去按摩店放鬆身心。

你可能也喜歡

Recommended