男人努力工作 其實都係為咗⋯

網誌

遇上了一位幸福的貨Van司機,一趟車程中,他跟我分享了他的家庭有多美滿。

粗聲粗氣的大嚿佬,卻笑容滿面地替我把一件件家具搬上車,我有點不好意思:「唔使啦,我自己嚟得喇!」

但他繼續把我身旁的細雪櫃抬上車:「搬一搬啫,冇所謂啦。」

友善熱心的貨Van司機可遇不可求,有些會無緣無故全情黑面,又或如他所說:「好多司機都繑埋雙手㗎,你一個人要搬咁多嘢,遇到我你真係好彩。」

他身水身汗的仗義幫忙,只是好人好事的開始。

開車後,我們先寒暄起來,問他最近的生意如何、問我在哪裡讀書、他說他最近才轉揸貨Van。

言談間,他總是一臉幸福的說每一句,直至他談及他的老婆仔女,我便知道笑臉迎人的箇中因由了。

他:「我有兩仔兩女,最大嗰個九歲。有小朋友真係好困身㗎,今朝想瞓耐啲都唔得,幾個一起身就跳晒上嚟。」

他喜歡熱鬧,說自己只有一個妹妹,兩個小孩其實仍會很悶:「本來諗住生多一個,點知我老婆送咗對龍鳳胎畀我!」聽說生龍鳳胎是需幾輩子修來的福氣。

「哈,不過佢哋出世之後,我就同老婆講要延遲退休喇!」他再說:「以前我做過車行、整車,你有咩車嘅問題可以而家問我呀!」

當他解釋了新手買歐洲車較安全,二手的話車齡最好五年內後,話題又轉到他四個仔女身上。

他很高興大仔二女能就讀國際學校,性格獨立,也爽快直率,沒有主流學校考試制度下的比較,兩個小朋友都能愉快學習,唯一要進步的是廣東話,但國際學校的學費很貴,一個月便要萬多元,他說以後的生活就是全力搏殺好好照顧老婆仔女,供書教學。

當談及子女教育,他說:「佢哋幾個都當我係朋友咁㗎,出街行路都搭住我膊頭,我唔打佢哋㗎,佢哋打我就真!」

常有人說男人的魅力不在外表,當看著這個總是把家庭掛在口邊,提起子女會不期然傻笑的貨Van司機,我便知道,是在於那股背負著整個家庭,盡力換來幾口子幸福的拼勁。沒有埋怨,反而樂在其中,娶了個好老婆,看著一堆小孩愉快成長,已經足夠,已是所有。

對我來說,一切很遠,組織家庭也是遙遙無期,但在這短短數十分鐘的車程, 聽了個好爸爸的故事,沾了些幸福,已是乏味生活中的一件樂事。

你可能也喜歡

Recommended