吳千語箍煲成功 林峯 御准入住新愛巢

吳千語箍煲成功 林峯 御准入住新愛巢

林峯 雖然有個廈門李嘉誠老竇,但唔靠父蔭,在娛樂圈成功爬上一線歌視藝人地位,有錢有樣又多才多藝,仲出名錫女友錫到出血,但呢個鑽石筍盤早喺五年前被杭州出世、沙田屋邨長大的吳千語mark實。上月初驚爆二人分手,不過本刊收到可靠消息, 千語BB 上月知衰承諾戒蒲戒玩向峯峯箍煲, 承諾肯改過自新,峯峯心軟答應復合,最近更御准BB搬入15年購入、豪裝逾年、市值8千萬的複式薄扶林新愛巢,一切重新開始。鑽石盤又告封盤!

text: 東方新地|Edit:Cherie | photo:新傳媒資料庫、吳千語微博、林峯微博、Instagram、東星網

千語BB跟 林峯 兩個月冇見

37歲的 林峯 和23歲的吳千語,12年合作拍戲時撻着,曾公開講七次「好愛」千語BB 而有「吳七愛」之稱號,拍拖五年來人前人後恩愛放閃,曾一個月三度遊埠拍拖,林峯 對 千語BB 照顧得體貼入微,衣食住行遊埠全包。

千語BB無上限購物更是指定動作,年紀輕輕已孭住Hermes名牌手袋,港女恨到流晒口水。

峯語熱戀時,曾一個月內三次拍拖遊埠,足跡遍布東京、沖繩、米蘭、洛杉磯等地,林峯 出名錫千語,在香港出入有司機,坐飛機例必坐頭等。

愛屋及烏

林峯 錫千語錫到燶,更愛屋及烏,有指峯峯以月租9萬的堅尼地道金櫻閣2 千呎單位給千語及父母住,亦不時往探訪女友家人。

工作量唔多的千語BB,是中環名店常客,每每獲得店員為她開門、搬貨的熟客仔指定服務,近來已甚少見她出巡。

以往出活動都表現恩愛。

驚爆二月已分手

外界以為打風都打唔甩,上月突然傳出二人秘密分手,4月時 千語BB 出席活動時直認跟林峯兩個月冇見,被問到結婚,千語一時話四、五年後一時又話30歲後才考慮,感情破裂早有痕跡。有傳分手原因是 千語BB 不時放風聲要峯峯買過億舂坎角獨立屋、3百萬Aston Martin辣跑,又以開高級蛋糕店為名要求峯峯送舖,令她拍拖五年來一直得不到林父歡心,加上 千語BB 喜愛夜蒲,不時在飯局、夜店結識富二代,有傳她認識到富商新男友,令林峯忍心狠斬五年情。

峯峯去年底剃完光頭拍內地劇《獨步天下》扮皇帝後,緊接拍另一部網劇《大潑猴》,扮演孫悟空,在大熱天時拍外景,睇見都知辛苦,好友李晨曾往探班,一直未見千語蹤影,跟傳分手的時間脗合。

 

以前峯峯忙於開工,千語BB不時被影到與有米朋友夜蒲玩樂玩通頂,近來絕跡夜場,戒蒲修心養性博入門。

箍煲成功 入住新愛巢

但據可靠消息指, 千語BB 已𦧲掂峯峯復合,近來被目睹出入峯峯的薄扶林嘉林閣新居。新愛巢是峯峯於15年以6千2百萬購入的複式單位,現市值約8千萬,有傳 千語BB 嫌峯峯舊居帝景園未夠豪,多次要求搬屋,林峯 亦順應女友之意月租九萬租住中半山豪宅,並在附近租屋給 千語BB 父母住,但 千語BB 向峯峯發功買樓置愛巢,峯峯帶BB四圍物色睇樓後,BB睇中複式單位,峯峯唔理樓市巔峰就扑槌入市,裝修超過一年、花近五百萬,早前終於入伙。

大廈以複式單位設計為主,全部單位望海,峯語住高層A單位,景致更勝一籌,平台有一偌大游泳池。

戒喜愛夜蒲冧峯峯

峯峯出名錫 千語BB 錫到燶,但難忍女友無限苛索兼愛蒲,無奈才提分手,被分手的 千語BB ,失去才知珍惜,不想錯過鑽石筍盤 林峯,努力箍煲, 千語BB 工作以外就留喺屋企鑽研廚藝,作出好大轉變。加上 林峯 真係好冧千語BB,所以二人復合,而 千語BB 成新愛巢的女主人!

千語BB近來頻頻在家鑽研廚藝,峯峯有口福了!

提 千語BB 林峯 甜笑:未有結婚打算!

那邊廂,剛從內地返港的 林峯,周日(16日)單拖離開新居到中環超市上糧,復合後的峯峯春風滿臉,心廣體胖,身形變健碩。本刊記者上前訪問有問必答,問到他和 千語BB 有冇結婚打算?屋企人有冇施壓催婚?峯峯說:「冇冇冇,冇壓力﹗(會唔會去旅行充電?)應該會呀﹗(女朋友 千語BB 一齊去?)佢都好忙㗎﹗要忙自己嘢﹗」提到女友 千語BB ,峯峯難掩歡喜之情,笑到變腰果眼。

峯峯見到本刊記者,大方接受訪問,一講到千語BB立即笑到變腰果眼,隔住口罩都feel到佢甜到漏。
戴上口罩和cap帽的峯峯,未被途人認出,可以專心揀完食材後,再去挑選日版貴價杯麵。之前瘦到面凹身薄的峯峯,當日所見體形回復壯健,鬆身Tee都見胸肌、背肌健碩。

峯峯在座駕內放好食物,開車返回薄扶林新愛巢。

月尾結伴歐遊

復合後感情更勝從前,二人更計劃歐遊,千語BB六月中從內地拍劇煞科返港,一直進駐新愛巢,期間自守行為,絕跡夜場,朋友圈除了同是峯峯好友的名人設計師馬天佑之外,全部清一色女性朋友。近日 千語BB 跟閨密到南法度假,穿上泳衣的 千語BB ,明顯有腩肉。

近月千語BB在社交網不是貼出工作照,就是跟女性朋友約會飯局的相,隔絕異性洗底。
千語BB近來積極增肥、健身,現身處南法Saint-Tropez度假的千語,穿上泳衣腩肉清晰可見,增肥有成效。

在內地開工半年幾乎未停過的峯峯,下星期將出席廣州演唱會記招,據知他已向公司攞假,飛法國會合 千語BB 歐遊拍拖叉電,重拾熱戀之感覺。峯語重新開始,千語BB要珍惜,大把港女吼住呀!

據知峯峯完成手頭工作,會於月尾飛去法國會合千語BB歐遊過二人世界,千語早一步到南法等峯峯。

你可能也喜歡