婚紗展

【藍橘子】《去 婚紗展 就見識到咩叫神級推銷》

網絡熱話

【藍橘子】《去 婚紗展 就見識到咩叫神級推銷》

Text:藍橘子 | Photo:電視劇截圖、電影截圖、Youtube截圖 | Edit:希彤

是咁的,上星期同女朋友去 婚紗展 ,諗住計劃定下年去外國影婚紗相。

原本我腦海幻想嘅婚展,係可以畀我慢慢諗,好休哉咁坐喺度飲住咖啡,

睇吓各式各樣嘅婚紗攝影舖有咩分別。

點知未行入會展會場,喺天橋已經被一班台灣人瘋狂派宣傳單張,

本來只係諗住拎一張撥涼,點知拎完第一張已經「賴嘢」。

(國語)「你不是這麼偏心吧?!來來來~這樣才高興嘛。」

另一個台灣人見到我拎咗張傳單,立即塞多張畀我。

結果未正式入到會展,手上已經有一大疊傳單…

幾經辛苦入到會場,見到間間都差不多,唔太識點揀,就諗住先拎價錢比較一下,

再挑選三、四間坐低聽。

但我嘅諗法錯得好離譜!因為就算你只係想拎個價錢,都起碼要花大半個鐘先拎到。

我同店員講:「我想睇吓個價錢先,因為我急尿,想去廁所沿途拎幾張傳單了解吓。」

佢話:「OK!價錢!得!無問題!阻你幾分鐘,講幾句!」

我一坐低,對面已經有位靚女店員等緊我。

我問:「我想知個價錢。」

店員:「好~無問題,我同你講解番個價錢。」

雖然佢口咁講,但實際上,佢拎咗部iPad不斷展示佢哋影嘅相,仲有口訣添 。

「嗱~台灣就清新啦,韓國就唯美啦,歐洲最高貴,想影香港就夠晒本土味!你想去邊影?」

「我想去布拉格,但更重要嘅係我急尿,想知個價錢先。」

「哦~~布拉格,睇吓呢啲相啱唔啱心水吖~」

靚女店員完全無視我嘅要求,繼續叫我睇相。

我真係急到忍無可忍,我企咗起身,同佢講去完廁所再返嚟傾過。

店員先拎咗個價錢表出嚟,「嗱嗱嗱~了解吓個價錢先。」

於是,我又坐番低…

影婚紗相最驚就係隱藏收費,女朋友望到個價錢,就開始問佢會包乜嘢,

仲會有咩額外費用。

於是,店員就轉攻向我女朋友,不斷向佢推銷,皺晒眉話幫到我盡,

又特登打電話問老闆,幫我誠懇地要求送多套婚紗同送多個相架畀我。

(以下係店員嘅足本真實對白)

「嗱~我真係畀老闆炒㗎啦。頭先老闆問我,佢問係咪我親戚定係我啲朋友,

點解要送咁多嘢啊~所以呢,如果有人問起,你記得同我夾口供,話係我朋友喎。」

做人最慘嘅係咩?

就係你嘅戰友離棄你!

我女朋友聽見之後非常感興趣,而我就坐喺旁邊,急尿急到反白眼咁制。

結果足足傾咗大半個鐘,先可以離開,我亦終於去到廁所。

之後我坐多幾間先發現,其實每一間都係同樣運作模式,難怪上網睇,

有好多網民話入去第一間就被佢氹咗畀錢。

結果我行咗五個鐘頭,都無簽到任何一間,但當我離開嘅時候覺得身心俱疲。

因為喺婚展你想格價、想比較晒咁多間有咩分別真係好困難,

即使你只係想問少少資料,都一定要付出半小時嚟聽佢推銷…

今次嘅經驗令我覺悟到,婚姻真係一門哲學。

你可能也喜歡

Recommended