令大多數情侶 分手嘅原因
我同女朋友好幾次差啲分手。
唔係鬧交發悔氣嗰隻，而係真係認真諗，不如分開，或者對我哋係一種解脫。
捱過一次又一次難關，令我哋體會到最易令情侶分手嘅原因係咩。
唔係有第三者，都唔係感情變淡，而係⋯⋯
Text, Image: 莎比亞
因為我同女朋友一齊住，所以提早經歷「相見好同住難」嘅階段。
「難」在於，我哋成日會為著生活嘅瑣事而鬧交，小事會變成大事，之後嬲到分手。
例如佢一番到屋企，就會話我點解將隻襪亂扔，我就會覺得佢小小事都嘈到拆天，把聲好煩好討厭。
當然，佢都同樣地覺得我好討厭。
久而久之，每日都出現小問題，每日都會嘈，兩個人嘅生活，慢慢就會充斥住呢啲瑣事，甜蜜嘅感覺都逐漸被取代，變成大問題。
我哋嘗試過忍耐同遷就，但講就容易，容忍都係會好谷氣，今次唔嘈，下次一次過嘈晒兩樣，鬧得更加勁。
每次事後，我哋都會覺得「唉，又為呢啲無聊嘢嘈⋯⋯」，好唔值得。
但我敢100%保證，冇任何方法可以解決呢個相處上嘅問題，兩個唔同嘅人相處，必然有不和。消極地接受，都係一種積極。
所以依家鬧交，好難容忍，但鬧幾句就算，唔太認真看待對方嘅說話。
唔好將鬧交呢樣嘢睇成一件好嚴重嘅事，當做行行下路無啦啦扑親，起身再行過。
最緊要，千祈唔好中途放棄，因為呢條路，你哋要行成世。
唔啱行到啱。
————————————–
