【慎入含劇透】《 致命復活 》陳庭欣朱晨麗同愛上郭晉安？

最毒婦人心？

被綁架冇咗十年嘅郭晉安，前晚終於「久旱逢甘露」得嘗一吻，對方就係首集被姦殺的陳庭欣妹妹朱晨麗。監製林志華唯恐觀眾睇唔明，所以呢兩集都有刻意俾大家睇到某啲伏線，例如朱晨麗重溫家姐陳庭欣嗰本相簿，同埋嗰張床照。即係，朱晨麗一早知道郭晉安同佢家姐有姦情，但郭晉安一直到碼頭一夜，先知朱晨麗與陳庭欣之間關係。究竟至今為止，溫柔體貼，工作又非常能幹的朱晨麗有咩陰謀呢？

兄弟VS女人？

嚟緊下個禮拜，郭晉安會搵到當日有份綁架佢嘅幕後黑手。大篇幅舖排眉宇間以至小動作多多嘅張國強，好明顯就係嫌犯之一。張國強同郭晉安雖然係好兄弟，但原來十年前，張國強都情陷下屬陳庭欣！

朱晨麗之前刻意向郭晉安隱瞞佢同陳庭欣姊妹關係，經過碼頭一夜後好似自揭底牌，莫非朱晨麗同家姐一樣，鍾意咗郭晉安？定一切只係美人計，實情為家姐報復，讓郭晉安一嘗被情傷時的滋味？

但原來，當日害死陳庭欣嘅人並唔止一個。弱不禁風嘅萬綺雯，都有嫌疑。