學生分享天地 – Vicky: 如何踏上當化妝師的追夢之路 (上)

網誌

又到左同學仔分享既時間喇! 今次要同大家分享心路歷程既同學仔係即將完成專業化妝全修課程既Vicky。其實小編早前都有簡單訪問過Vicky,不過Vicky知道宜家仲有好多心郁郁想學化妝既朋友仔因種種原因而卻步,所以今次佢就同大家詳細分享下自己由決心學化妝到成為準化妝師既歷程,希望可以inpsire到大家啦!

大家好,我係Vicky。如果你問我點解會想做化妝師,我諗我會同你講我想追夢!正所為10個女仔9個都貪靚,我都唔例外,中學既時候我已經好貪靚好鍾意研究化妝品,仲希望第時可以成為化妝師添!之但係身邊既人成日都話化妝師宜家通街都係,出名既得幾個點會輪到自己,聽聽下自己都對呢個夢想卻步左。 直至上年大學畢業,初踏社會大學既我係一間Digital Marketing Agency入面做 account servicing,做得Digital Marketing Agency工作當然好有挑戰,每日諗新Idea,一次過應付幾個客同埋跟唔同既Campaigns,仲會不時OT工作。當然我係熱愛呢份工作既,之但係我又會開始問自己,人只活一次,到底點樣先叫活得無憾?對我黎講答案係活得隨心,可以實現自己想做既事先叫做活得無憾!所以係今年初,我決定學化妝!

而岩岩決定學化妝既我都同大家一樣迷惘過,網上既評論又成日好壞參半,搞到都唔知應該點揀化妝學校好。所以之後我決定親自到訪幾間心儀化妝學校聽講座,試堂同埋詢問化妝課程詳情;再根據課程內容, 價錢, 實習機會同埋口碑好壞黎決定報讀邊一間化妝學校。當然,經過一番考慮,最後覺得係Janice 到學化妝最岩自己,所以就報讀左呢到既專業化妝課程喇!

到左真正上堂,我先發現專業化妝並唔係想中咁易!一開始我上既係Basic化妝班,主要係教化靚女妝。個時我仲心諗我日日都會幫自己化妝,普通靚女妝點會難到我!但上堂後我先真係了解到要化好靚女妝,並唔係好似平時個啲天生麗質既Beauty YouTuber 係咁易掃幾下就靚晒。好似修飾輪廓咁,原來係要先分析model屬咩面形,再應用相對既打陰形方法漸層向前掃先可以最到最靚既效果。我仲記得Janice 講過,你幫一個靚女化妝化得靚唔係最叻,但作為化妝師可以將一個平凡女仔化到變成靚女咁先叫專業!所以之後我都有搵唔同面形既朋友仔做我練妝model。之但係,其實要搵人練妝都唔係一件易事,特別個時我仲番緊工,又要就自己放工同朋友既時間,所以個時我同同學仔都唔介意辛苦少少,book兩晚練妝輪流做大家既練妝model。

另外,初初學化妝個時我都同好多人一樣好擔心要花好多錢去買一大堆化妝品。好老實講,我先岩岩 fresh grad出黎做左一陣野並唔係賺到好多錢,讀專業化妝都已經洗左我一筆錢,如果仲要我初學化妝未肯定自己將來係咪會成功入行就洗多一大筆錢去買化妝品,負擔都真係好大!不過好彩既係番學校上堂或練妝都可以任用個度既化妝品,所以我每次練堂都會趁機試用唔同品牌既化妝品,試清楚邊啲化妝品真係適合先再慢慢買。同埋宜家好多開架品牌或韓牌既化妝品價錢平得黎都好好用,所以我都會係大牌同平牌之間再作取捨應買則買,咁就可以慳番唔少錢喇。

係我決定學化妝後,最多朋友問我既就係究竟要學幾耐?當我答佢大約1年左右啦,佢都會好大反應問點解咁耐?當然,其實如果你想好快學晒絕對可以一星期上兩堂趕進度,但相對黎講你就未必消化得晒所以技巧喇。其實學化妝並唔係上完堂就等於你完全掌握所有技巧,而係要經過不停練習先會功多藝熟。所以我都會循序漸進,讀完Basic班先讀新娘化妝,一星期一堂再練兩日妝咁先可以練好自己既手藝。

而當我初讀新娘化妝髮型班既時後,我都遇到過一個大難題,就係我最冇天份既新娘髮型設計喇。因為本身對set頭冇興趣,再加上我曾經俾捲髮器整親,所以我連平時出街都好少幫自己整頭,更何況係幫人set頭。為左衝破自己既心理障礙,平時除左不斷用假人頭練set頭,我都會主動約同學仔黎互相練習,練得多慢慢就有信心落夾用捲髮器,仲慢慢覺得set頭係好變化多端好有趣添!

好幸運地,經過努力練習,係岩岩既新娘班考試上可以獲得第一名,個下真係好開心。但當然啦,要成為專業化妝師我仲有好長既路要行,所以考完試後都要繼續熟練唔同既技巧先可以步入成功之路。

我認為做新娘化妝師最大既樂趣就係為新娘子係結婚呢個咁重要既時刻展示佢最靚既一面,令自己都可以感受到佢既喜悅。但宜家新娘化妝師競爭都唔細,所以我都會想學多啲唔同既化妝技巧黎充實自己。下一篇,我會再同大家分享埋我上專業化妝進修班同C&G班既情況,同埋點樣裝備自己成為專業化妝師,希望可以幫到大家啦!

你可能也喜歡

Recommended