男人拍拖 就係為咗呢樣嘢
「其實你係咪想同我結婚？」
拍拖以嚟，女朋友都一直問呢個問題，而相信每個女朋友心目中都存有呢個疑問。
Text, Iamge: 莎比亞
「如果唔係嘅話，我寧願你早啲同我分手，唔好嘥我時間。」
對於將來，女朋友嘅態度極為認真，而同時又對我嘅吊兒郎當灰心慨嘆⋯⋯唔通真係會分手咩⋯⋯只能夠等。
喺我角度，25歲嘅我話大唔大，話細唔細，行去街市都仲會畀阿姐嗌「𡃁仔」、仲覺得自己仍然有少少青春可以揮霍，成日將熱血、追夢、男人嘅浪漫掛喺口邊。
結婚呢個問題，我只能夠答女朋友一句⋯⋯
「我想結，但好遙遠。」
唔係心態上未玩夠嗰種未Ready，而係望住身邊一個個結婚，有啲已經有小朋友，我覺得同我係兩個世界，我未有能力可以負擔一個家庭，我冇信心可以畀到幸福一個人。
所有嘢，將會跳出愛情，唔係甜言蜜語就解決到，至少，我銀行戶口都係得萬幾蚊，儲多幾年，都唔會夠首期買樓⋯⋯
而呢個一生一世嘅承諾，我又係咪真係遵守到？到底，我嚟緊嘅人生有咩目標？
「男人一生到底為咗乜？」
直到最近，我嘅諗法清晰咗，彷似搵到答案。
自從同女朋友搬咗一間環境好少少嘅屋，同養咗一隻貓仔，我嘅人生都有轉變。
貓仔成日病，至今已經用咗接近一萬蚊去睇醫生，我嘅生活要開始死慳死抵，因為要照顧佢。
而女朋友養咗呢隻貓後，母愛愈嚟愈氾濫，每日放工後就即刻返屋企，同佢玩，抱佢，整嘢畀佢食。而當我踏入門口，佢就會抱住貓仔嚟到我面前：「爸爸返嚟喇！叫爸爸啦！」貓仔喵咗一聲，我哋個心都甜咗一甜。
Tag
莎比亞
