打工仔求生必備！「 職場卸膊操 」你練咗未？
職場求生，最緊要卸膊，千祈唔好睇少呢啲學問，事關就連出梗你納稅份人工嘅政府最高層，都喺傳媒面前將個波交嚟交去，污糟嘢無人肯上身，呢個時候，好想召喚經典作品「 職場卸膊操 」潤澤心靈！精彩金句來自香港劇團「W創作社」2013年舞台劇其中一場《職場卸膊操》，必備口訣，真係入心入肺句句金！
資料來源：W創作社 | 編導：黃智龍 | 演出：鄧世昌, 湯駿業, 陳淑儀
第 1 部 | 低層卸膊操－我真係唔覺得我錯囉！
當你老闆話你做錯嘢嘅時候，你就要講：
我都係照你意思去做
我都係照你意思去做
我都係照你意思去做（膝頭哥要提高多少少）
但係你老闆又會堅持你做錯嘢，咁你就要咁講：
上一手同事都係咁講
上一手同事都係咁講
上一手同事都係咁講（個圓圈要劃大少少）
為求自保，你仲要眼濕濕咁：
我真係唔覺得我錯囉
我真係唔覺得我錯囉
我真係唔覺得我錯囉（要眼泛淚光咁）
追加提示：非必要唔好立亂爆喊，重點係回應時要眼泛淚光咁、喺眼眶浪下浪下就最「perfect池」！
第 2 部 | 中層卸膊操－－呢單嘢唔係我跟開
低層卸膊so easy？係時候學一啲難度高少少的「中層卸膊操」，做中層最好嘅地方，就係可以將啲嘢“卸”畀其他department做，必學金句，就係：
呢單嘢唔係我跟開！
呢單嘢唔係我跟開！
呢單嘢唔係我跟開！
因為「呢單嘢」真係唔係你跟開，所以對腳一定要卸開啲先得
但如果對方夾硬非要你做不可嘅話，你要點麼同佢講呢？你應該話：
你咁樣我好難做㗎喎
你咁樣我好難做㗎喎
你咁樣我好難做㗎喎
到最後為咗速戰速決，咁你就要學識講：
我唔想俾人話我越權囉
我唔想俾人話我越權囉
我唔想俾人話我越權囉
個表情可以委屈少少
第 3 部 | 高層卸膊操－－我無印像我咁麼講過
如果你嘅下屬做錯事，作為高層嘅你要即刻同佢劃清界線、割蓆啦、撇清關係最重要！呢個時候你就要講：
今次我真係愛莫能助！
今次我真係愛莫能助！
今次我真係愛莫能助！
講嘅時候，個身要盡量側盡量扭，有咁開卸得咁開（係咪好有畫面呢？）
如果作為下屬，要反駁個上司的話，通常就會據厘力爭咁講：
喂你真係有咁麼講過嘅喎！
呢個時候個上司就要使出「絕招」：
我冇印象我有咁講過！
我冇印象我有咁講過！
我冇印象我有咁講過！
講嘅時候語氣要好firm，唔可以滴汗，好果斷、好堅持先可以突顯到你嘅無恥！
但係如果個下屬任然堅持話老細你真係有講過，呢種時候個老細就要用另一種語調嚟處理呢件事喇：
你諗下你適唔適合呢份工
你諗下你適唔適合呢份工
你諗下你適唔適合呢份工
去到呢個時候，雙方關係應該都已經好僵持－－大家各不相讓吖嘛，此時此刻，雙方都有機會同對方送上以下呢句：
你今次食自己啦！
你今次食自己啦！
你老味食自己啦！
對了，事已至此。講得出口其實都已經無分「今次、下次」，加句粗口又何妨呢？
