你一定有這7種 好姐妹

以下7種 好姐妹 ，你又會諗起邊個？

第1種——八卦

女仔最鍾意就係同好姐妹講是非㗎喇，講吓邊個女仔嘅情史啊、邊個同邊個一齊咗，而一班好姐妹裡面，總有1、2個係天文台，有咩八卦消息同猛料都係由佢爆出嚟，仲勁過私家偵探。

Text: SIZZ

第2種——男人婆

唔係個個女仔都係斯斯文文、好女仔㗎，身邊總有個姐妹粗粗魯魯、講嘢勁大聲兼粗俗，成個男人婆咁。

第3種——天真

有1種姐妹性格仲天真過天真嬌，生性善良，由細到大都係乖乖女，從來唔會學壞，成日都反應遲鈍，係1個問題少女，最常問嘅1句一定係「點解嘅？」。

第4種——開放

唔係個個女仔都怕怕醜醜，總有1個好姐妹會肆無忌憚講咸濕笑話，當其他人紅都面晒嘅時候，佢總會笑到啲腸啊、內臟啊……跌晒落地，仲會好大膽分享自己嘅性經，幫大家增長性知識。

第5種——大姐姐

有1種姐妹骨子裡有種霸氣同責任感，尤其是有細佬妹嘅大家姐，習慣咗照顧身邊嘅人，自自然然佢喺其他人面前，都會成個大家姐咁款。

第6種——愁

有種姐妹係阿愁，次次見親佢都不停吐苦水，或者半夜三間喊住打俾你，叫你出嚟飲酒傾計，其實多數都係呻感情事。

第7種——貪玩

有種姐妹寧舍貪玩，諸多鬼主意，細個會搵你一齊整蠱老師，大個間唔中就會提議大家去邊度玩，次次都係佢做搞手。

諗起你邊位好姐妹呢？你又係邊種好姐妹？

延伸閱讀：
▲ 孖住瘦 ！ 好姐妹 雙人運動 8 MOVES

如欲率先接收資訊，請讚好我們的FB專頁並於「已讚好」選單設定「搶先看」，多謝支持。
More Facebook: https://www.facebook.com/morehk.hk