血拼過後冇飯開！？7－11 宵夜 救你一命

7月，衝著夏季大減價而來既你、你、你，朝9晚11大出血，回神過來大叫肚餓時，坐得舒服又好食既餐廳都收得七七八八，唔想同人迫拉麵、居酒屋？！不如去七仔執份特上 宵夜 ，可以帶返酒店沖個涼先慢慢嘆之餘，質素高、種類多，美味遠超港式七仔。七七子經過多個月「七仔食堂」既生活，忍住飽嚴選出8大必食零嘴，餓唔餓都歡迎埋黎睇埋黎揀。

第8位 足料飯團

人已散，肚已餓，當然想隊2,3個飯團，極速飽肚，但餓還餓，都要揀擇。七七子食過Lawson、Family Mart、Circle K既飯團，發覺七仔完勝之處係足料，基本上咬第一口已經食到料，例如吞拿魚飯團夠沙津醬，三文魚子飯團食食下會跌幾粒出黎，當中自己就最鍾意金版三文魚子飯團（JPY220)及蝦沙律飯卷（JPY150)。

第7位 九州拉麵すみね

唔講你未必知，日本七仔食品分為普通版同金版，當見到個LOGO係金色，就知係正野！而眾多杯麵／碗麵之中，獲得金色LOGO有一風堂、山頭火等，不過人在日本，當然要買香港食唔到既すみね拉麵（JPY278)！來自北海道札幌的すみね、味噌湯底濃厚，麵質彈口，難以想像加熱水等3分鐘就有去拉麵店既食感。
第6位 半熟煮玉子

食杯麵／碗麵當然要加餸，半熟煮玉子一包兩隻，被湯底浸住既半煮蛋，一咬開有少少流心，加上蛋白位本身極之入味，放入熱辣辣既拉麵一齊食，獨食兩隻都唔算太過份。
第5位 明太子燒魷魚

其實日本七仔近呢半年嘔心瀝血製作居酒屋即食系列，原來送酒之外，唔少日本人會買多個白飯當加料。經過日食夜食，明太子燒魷魚率先跑出，魷魚肉厚，食感好過唔少三流居酒屋，加上明太子冇慳住落，極度夠味。店員會覺得係冷盤而唔會問要唔要加熱，個人認為加熱更岩香港人口味。

第4位 黑椒燒雞腎

黑椒燒雞腎成功來到第4位，由推出開始，七七子約一星期食兩盒，而且經常斷貨，所以見到一定入貨。平日食叮叮雞腎會好擔心太硬太乾，但七仔卻將雞腎的JUICY完整保留，另外附有檸檬汁，一開始就停不了。
第3位 下酒小食包：枝豆、炭火燒雞、栗米等

七仔即食架上可找到各款三角包包，枝豆、燒薯仔、炭火燒雞、醬油粟米、厚燒火腿、乾燒蝦仔等等，每季配合時令推出新口味。最重要係呢個三角包裝設計，一打開就好似隻船一樣，不用為碗碟費心，所以話日本人既野，以人為本。
 
第2位 碎蛋三文治

夏天日日30度，唔想食熱野，更加唔想半夜12點飽到撐，不如試試七仔輕食三文治，雖然話佢「輕」，用料出手好重，單睇碎蛋三文治，蛋厚過包。廣告亦見七仔強調白麵包彈力及鬆軟度一流，食落有如新鮮白麵包，女士們最適合不過。

第1位 生火腿片配蔬菜條

攰起上黎，真係冇咩胃口，不如買一包生火腿片及蔬菜條，睇落菜肉均衡，而且冇澱粉質。一包50g的生火腿片，沒有肥肉而且味淡，跟蔬菜條捲堆一齊食，感覺高級而健康。蔬菜條條內有大根、甘荀、青瓜及椰菜，入口JUICY，絲毫不覺已上架好幾小時，沾上味噌沙律醬，突出蔬菜鮮味，輕盈首選。