減齡又減吋！任何身形都能駕馭的 工人褲

Text ｜Candy Choy

呢排逢星期日就見到蒙嘉慧嘅港台劇《有倉出租》工短褲造型，可惜俾人話佢襯白布鞋太平凡兼扮後生，其實都係劇情需要啫，又唔駛吓吓踩人着衫嘅，同埋話晒都40有2，莫講話四字頭，三字頭都未必咁着 工人褲 ！不過識得襯，係真係可以雙贏，既可以減齡，仲可以遮你最怕見到嘅pat pat、大脾肥肉，咁就唔怕着 工人褲 啦！

蒙嘉慧呢個look係劇嘅造型就冇計啦，但如果你都想着工人短褲，其實少少改動就可以減齡又有型！

嘉玲姐襯ankle boots再加飾物本來好減齡，不過條scarf似乎多咗。

外表成熟嘅高圓圓雖然已經36歲，但着完工人褲即刻後生到似廿幾歲！

牛仔工人短褲 最減齡

牛仔工人短褲絕對可以減齡，雖然襯白色係最靚，但都唔一定要襯白色tee咁悶！手臂粗可以轉一字膊衫、恤衫、長袖tee，再加少少accessories，即刻回春！

喇，大家都係白布鞋、牛仔工人短褲同白色衫，但佢就識加啲colorful嘅飾物點綴，布鞋嘅鞋帶仲綁到似人氣嘅綁帶鞋咁，即刻young晒！

呢個就加咗幾分法式簡約味，ankle boots 加紳士帽同百搭間條衫，唔會俾人話扮後生。

想女仔少少，(唔係女人呀)，可以襯高踭鞋同白色喱士恤衫，再搵外套／恤衫綁腰玩layering，顯瘦又減齡。

跌膊亦係最易減齡嘅方法。

入面着件吊帶表心，輕輕露肉，sexy又青春。

NG!

手臂粗應該着喇叭袖款嘅一字膊，貼身反而仲包住咗肉肉位。

下半身即瘦一個碼！

有肚腩、pat pat 大或者腳粗就驚咗唔敢着 工人褲 ？對症下藥就冇問題啦！

腰粗+腳粗+pat 大

放棄揀牛仔工人長、短褲或貼身款，揀高腰、褲管闊嘅工人褲就可以完全遮住肉肉位，腰線變高，顯瘦得嚟仲可以拉長雙腿比例！嬌小女記住加返對厚底/高踭鞋就更事半功倍啦！

范冰冰不嬲都好叻遮肉肉，恤衫襯闊腳 工人褲 ，有型又顯瘦！

嬌小女都着到！

工人長褲就唔啱嬌小女着？你睇得155cm嘅Miroslava Duma咪又着到！闊腳工人長褲嘅話，一對高踭已經幫到手，咁短褲呢？

嬌小女着工人短褲，襯bralettes 加ankle boots可以拉長比例。

我細粒但下身肥…

下半身肥嘅嬌小女，可以着呢種吊帶闊腳 工人褲 ，七分嘅長度，露出腳眼位，容易令雙腳顯長。