顯高

十個零P圖也能拉長比例的「視覺 顯高 法」

購物攻略

Text |Candy Choy

生得細粒絕對冇問題,其實最緊要啱比例,就好似好多荷里活名人Natalie Portman、Kim Kardashian、Lady Gaga…近啲再講埋亞洲區代表喇,宋慧喬、少時太妍、周迅、蔡依林等,全部都唔過5呎3吋咁,但可能就算俾你地見到佢地真身,都未必覺得咁矮,點解?其實都係識玩視覺效果啫!想跳出ig 框框,唔P圖都可以 顯高 ,以下呢十招唔覺眼嘅打扮,都可以幫你暗地裡拉長比例,而且又中trend,最緊要係唔駛你踩住對高踭鞋咁辛苦,試吓冇壞嘅。

條子服

直條衫、褲,從線條已經話咗俾你知,可以幫你拉長身形,而且仲要係今季嘅trend,著件條子off-shoulder衫,下身無論襯短打或者-5kg skinny jeans 都可以再拉長比例,著條子長褲、長裙,當然都有呢個效果啦!

 

短打孖寶

愈著短身嘅短褲、短裙,腿部線條就能拉長,而且夏天根本就係露腿嘅日子!如果你話你腿粗唔想露腿,下面仲有另一款啱你!

超長下身

冇諗過maxi dress 、闊褲竟然啱嬌小女生?其實長嘅下身,可以拉長腰線,順勢將雙腿拉長,不過記住長度唔好過腳眼,除非你著高踭鞋啦!

全單色

唔講唔知,原來全身著同一隻顏色都有 顯高 嘅作用,尤其係全黑,想著單色而唔俾人覺得悶,就要從剪裁著手,切忌太多層次或厚身質感,應揀剪裁利落款式。

尖頭鞋

唔需要一定著高踭鞋先增到高,著平底都得?講緊係尖頭鞋,唔單只望落對腳會拉長(尤其係淺色系),依家仲好興搭帶款,真係一舉兩得!

 

短髮都得?

嬌小女生長頭髮會顯矮,最好就係剪返個long bob ,可以見返膊頭同頸,視覺上會顯得高啲架。

 

丸子頭

就好似男生梳all back 咁,女生絕對都可以用髮型去增高,梳個丸子頭,可以輕鬆增高兩吋!

高腰下身

高腰剪裁嘅下身,無論係裙、褲定skinny jeans,都會提高腰線,令腿部睇起嚟更長,不過上衣就要tuck in 或穿cropped top,唔係就白費心機喇。

 

超幼belt

嬌小女生用belt 一定要用幼身款,因為粗belt 好易會將你個身cut開兩截咁,視覺上會覺得仲矮,反而幼belt 可以強調返腰線,自然顯高 。

 

V 領衫

V 領衫可以見到鎖骨、頸部線條,視覺上都會令比例拉長,有 顯高 作用。


你可能也喜歡

Recommended