呃足一世

網誌


聽過V的開解,C的心情得以平伏,決定跟男友重新開始,早幾天C打電話給我,跟她閒話家常了一會,我忍不住問C:「你點知你男友偷食架?快啲教我,等我小心啲啦。」
C答:「有一日收信時忽然心血來潮拆開佢封月結單嚟睇,見到佢上個月係花店買咗紮花,初時都有啲忐忑,唔知應唔應該問佢,但諗咗一晚終於忍唔住第二朝天未光就叫醒佢問,當時佢呆咗唔識答,咁你都知咩事啦,跟住佢咪和盤托出囉 !」
我應道:「啊,原來要得閒check check月結單!」
怎知C接著說:「如果可以時光倒流俾我揀多次,我一定唔會拆封信嚟睇。」

我甚為驚訝,說:「吓,點解呀?唔睇你咪一路唔知囉。」
C答:「我以前都好似你咁,咩事都尋根問柢,就是怕被呃的感覺,亦享受拆穿了的優越,但係呢一次我拆穿嘅係我發夢都冇諗過嘅嘢,第一次覺得寧願唔知好過知。」
我完全不明白C的說話,我可不願意一世被騙。
C再說:「我真係好多謝V,係佢令我諗通咗,其實由我知道有第三者以後,我每日就好似一個私家偵探咁,不停從各方面去check我男友,因為好驚佢仲呃我,就算咩都check唔到,我都會諗好多假設性既嘢嚟問佢,佢一答得模稜兩可我就覺得佢仲呃我,又覺得佢仲有嘢隱瞞,攪到大家都好唔開心,我成個人都好似癲咗咁。但係果晚聽完V講嘅嘢,我突然”叮”一聲醒咗,發現我不停問不停去check佢,係為咗咩先?既然佢咁努力唔俾我知,咁點解我仲要係度尋找真相? 係想搵到證據,嚟證實佢仲呃我?除非我要分手,否則知道嚟做咩呢?況且如果佢真係要呃我,點都有辦法唔比我知,就係咁,我突然放低咗。果晚我返到屋企,同我男友講:『如果你真係要呃我,你就要肯定可以呃我直至死都唔知。』他聽後呆了,然後跪在地上眼泛淚光對我說:『對唔住,我以後都唔會再呃你架啦,我唔知可以點做令你信我,但係我係真心知錯,希望你可以原諒我。』」

我聽到這裡也有點眼濕濕,更為好友可以重新開始而高興。

那晚回到家,我跟老公說:「老公,如果你要呃我,就要肯定可以呃到我死為止,千祈唔好俾我知道真相呀!」
老公從身後拿出我的月結單答:「老婆,如果你要呃我,就…不如俾cash啦,又話上個月無買過嘢,咁係Chanel碌果四千幾蚊係咩嚟架?嘩!係Mercibeaucoup,仲離譜,碌咗成萬蚊………….」
我忘記了,通常check月結單的都是他,而一定不會是我。

你可能也喜歡

There are 11 comments

Add yours
  1. Jovi

    如果一個女人仲好愛個男人,而呢個男人犯左一次錯係可以原諒的,其實呢個case 好似電影大丈夫咁! 不過有時又諗,如果個男人係愛自己就唔會去滖..因為會令到你會傷心嫁麻,愛一個人都應該唔想佢傷心! 所以我覺得再犯既話,又真係幾難再原諒了。

  2. Vivian

    我都係甘同我老公講, 如果要呃我一定要呃得徹底啲, 到我死個刻都唔好俾我知。

    睇前段個心”銀住銀住”, 但一睇到最尾真係笑死, 你老公既急才得好得。

  3. Michellelau

    Hi
    幸好故事是大團圓的結果,人生總有遺憾不完美,過程只是一種經歷,最重要是Happing ending嘛!

    Btw, 我老公真係好識把握機會嚟串我架!


Comments are closed.

Recommended