第一日返工-11小時non-stop無停手

網誌

終於,我和Katrina可以成功去果園返工啦!

早在清晨六點,我們就要在Caravan Park門口集合,等Danny來載我們到果園,這意味著我們以後都要在零晨五點就要起身。這對我實在有點難度,因為我們住在Caravan中,其車身是用鐵造的,「冬涼夏暖」,我每一晚都會凍醒,在又凍又黑的環境下,真係「十萬個」唔願意起身!

不過,我當然起到身,加上經過星期六和日的訓練,我們已經可以在20分鐘內弄好三文治、換好衫。

我們的任務是「挑蘋果」。何解呢?原來「初生」的蘋果原來好似車厘子般細小,在一棵蘋果樹的樹枝上,那些小蘋果會連在一起生長,即是一條樹枝上會生了幾粒小蘋果,而我們就要趁小蘋果未長大之前,將比較細粒和唔靚的小蘋果拔掉,好讓high quality的小蘋果可以有足夠的空間成長。

想不到在蘋果的世界也有汰弱留強這回事。

原來蘋果的誕生,是要犧牲滿地的小蘋果的!

人齊後,農夫便即場示範如何用手將小蘋果向後拉掉,目的要令每一條樹幹上只留有一粒最靚的小蘋果。

睇完示範後,大家就各自拿一條梯,在自己那條row那兒各就各位。

開始的時候,我只顧影相,誰知突然有個人在我面前棵樹伸個頭出嚟:「要做快啲呀,你咁慢會俾人鬧!」於是我就加快手腳,但有時看見全部都很靚的小蘋果時,都好唔忍心「挑走」,覺得好浪費!誰料,我突然發現我大大落後於人,其他人都是機械手,我真的要努力追上他們先得!

就在這個時候,我經歷了可能每一個旅人都會經歷的事────我由樓梯的最高處跌咗落地下!!!!!

蘋果樹有7至8呎高,而把梯都有6呎高,當時我就是站在最高點挑緊蘋果,可能我太過貪心,伸手去挑左邊的蘋果,就在這個時候失去平衡,把梯連埋我成個人打橫咁跌咗落地,在凌空的時候係,時間變得好慢好慢,我都有時間就一就度力,最後只是左邊手臂和背脊先落地,無整傷個頭和塊面!(事後沒有看醫生,也沒有塗藥膏,也不覺得太痛。)趁無人發現,就快快爬起身。

跌完之後,我踏返上條梯時都腳震震,唔敢再亂嚟啦!

跌完之後人有三急,但SORRY,那個個果園無TOILET,所有人都要搵個隱蔽處就地解決!唉,無辦法,我唯有……忍!

明明之前問過返工時間係去到下午三點,但去到三點的時候,個個人都未走,我雖然覺得好唔對路,但唯一可以做的,就係繼續~做!

去到下午四點半,我已經做了9個小時,我真係覺得超級唔對路!我又熱、又餓、又倦、又渴、四肢無力、全身酸軟……我已經到達了幾乎虛脫的地步。

就在這個時候,我的救星出現了!之前提過的紋身漢就是我的救星!他是叫Vincent的馬來西亞沙巴人,他在這個時候走過來幫我「挑」最高的蘋果,他叫我只做最下面的就可以了,不用爬梯咁辛苦。

佢告訴我,因為工頭應允了這個apple farm,一定要在那天完成所有工作,所以個個未做完都唔敢走,仲話之後去第二個farm一定會好準時收工咁話。

最後,佢幫我做到下午六點幾(已經11小時non-stop無停手),我們才完成一條row!救命呀,真係好辛苦呀,真係企著沖緊涼都可以瞓得著呀!

那一刻,我真係無乜信心可以「做好呢份工」,亦深深明白「唔辛苦邊得世間財」的真諦!

我看著眼前白色的蘋果樹花心想:「只是第一天就這麼恐怖,以後如何是好?」

你可能也喜歡

Recommended